Alkitab Mobile SABDA
[VER] : [ARALLE]     [PL]  [PB] 
 <<  Filipi 4 >> 

1Ingkämmua' ang kukalemui, diongnga'too ang mampamasannangngä' lambi' kupokale'dekoa'. Dahi, ingkämmua' solasohongku ang kukalemui anna kukarohhengngi, la noa indee: yaling di salu katuhoammua' la tontong lolokoa' umpamatoho kapampetahpa'ammu dai' di Dehatanta.

2Kupalau si'da-si'da pano di solasohongku ta Euodia anna ta Sintike anna malai sika tuho mesa inaha sinnoa ang sihatang nababe tau ang mampetahpa' dai' di Dehata.

3Anna kupalau toe' mating di dioa' sampengkähängku ang mala dipetahpa', ke la malai umpasikapiai sumule inde derua bahine. Inde to deruai sahing si naduluiä' mengkähäng kahha' di allo-allo ang puha, umpepainsangnging Kaheba Mapia. Noa tunne' ta Klemen anna ingkänna tau senga' ang mamposolaiä' mengkähäng. Tiuki' asammi sanganna yaling di Suha' Katuhoang yaho di suruka.

4Kahsi lolomokoa' aka' sangkalebumokoa' Dehata. Kusulei sala bou kuoatee la tontong lolokoa'too kahsi!

5Anna mapia toe' ke nainsang asangngi tau naoate malunä' inahakoa', aka' marungku'mi kasuleanna Dehata.

6Dakoa' la malaya' ungngoloi aka siamo. Ampo' yaling di ingkänna kaha-kaha la tontong lolokoa' ma'sambayang malau dai' di Puang Alataala. Samai kapahalluammua', palau tomande'i dai' di Puang Alataala sitonda ma'kuhhu'sumanga'.

7Ponna ke umpanoaia' yatoo, ya' la unsa'ding kamasahkeang ang nabea Puang Alataala. La nadakai loloa' inahammu anna pihki'mu aka' mesamokoa' Kristus Yesus. Yato kamasahkeang ang nabeakoa' Puang Alataala la nakapusa'i hupatau anna daine' mala napähäng.

8Mane ahai, ingkämmua' solasohongku, kupalau mating ke la malai supung ang mapia anna ang sihatang dipudi la umpayalingnga' di inahammu, noanna: kara ang tahpa', pembabe ang tahpa', katahpa'ang, kamaseroang anna ang la mapia dipihki'. Noa tunne' ke ahai aka-aka ang mahasa bahtu'raka sihatang la dipa'käyyängngi, dia tuntone' ang la umpayalingnga' di inahammu.

9Ingkänna yato ang puha kupaturuingkoa' pahallua' la umpembabeing. Anna ingkänna pembabemu la situhu' yato tula'ku ang puhaa' unghingngi anna pembabeku ang puhaa' ungngita. Ponna ke umpanoangnga', ya' la naposolai lolokoa' Puang Alataala, ang nakasulei kamasahkeang.

10Kahsi liuä' kusa'ding dinoa lambi' ma'kuhhu'sumanga'ä' dai' di Dehata aka' mala boukoa' unduluiä' yaling di ma'kahupa-hupa ongkoso' dinoa ang kupake yaling inde di kamasuhsaangku sinnoa yato ang dolu. Dai kuoatee ungkalimpängngimä', ampo' ahanaete' dake'a' aha tempomu umpembabeing.

11Dai aka' kakuhangangku lambi' ma'kara noaä' yato langngena', aka' kuinsang kupengkaolaangnging katuhoangku situhu' yato aka ang aha.

12Yaling di salu katuhoangku haling kusa'ding kakuhangang anna kabosa'ang. Kuinsang toe' umpamasannang inahangku ungngoloi ingkänna kaha-kaha, noa bohoä', noa manonoä', noa kekulle mai'di, noa memase-maseä'.

13Kubela ungngoloi ingkänna kaha-kaha ang manghoaä' aka' napamatoho inahangku Puang Yesus Kristus.

14Ampo' kupemapia toing nei' yato naongei unduluiä' yaling di kamasuhsaangku.

15Oa' ingkämmu solasohongku diting di jumaa' Filipi, naonge la umpelleiä' Poropensi Makedonia dolu, dianto ang naonge kupampahandu'i umpepainsangnging Kaheba Mapia diting, ungnginsammia' ungngoatee dioa' supu jumaa' ang mambeaä' ongkoso'.

16Anna dai yatoo supu ampo' pemmai'dike' si umpakatuingkä' yatoo naonge kakuhangangngä' di hao di Tesalonika.

17Dai aka' pemalaä' untahimbo pebea lambi' ma'tula' noaä', ampo' masannangngä' ke tuhtuang kehängngängngi boana pembabe mapiammua' yaho di suruka.

18Mane ahai, yato ingkänna ang umbeaä' puha asammi kutahimbo. Anna mala dioatee la'bi puha nei' andana yato aka ang kupahallu. Dai aha kakuhangangku aka' ingkänna yato ang umpapebahaingkä' di ta Epafroditus, kutahimbo asammi. Ingkänna yato ang umbeaä' sihapang tunuang bobahängngo' ang dipopenomba di hao di olona Puang Alataala. Nakärä'i liu anna masannang inahanna natahimbo.

19Anna Puang Alataala ang kupenombai la umpasundung ingkänna kapahalluammua' situhu' katomakakaanna ang dai aha mallondo, aka' sikentemokoa' Kristus Yesus.

20Dipamatande sanganna Puang Alataala Ambetaa' mengkalao dinoa lambi' sapano-panona! Aming.

21Palambi'ingkä' salama'ku pano di ingkänna to mampetahpa' yaling di Kristus Yesus, dianto ang napasähä' Puang Alataala. Anna salama'na toe' are' mating ingkänna solasohonta ang kusibahaing dinne.

22Kupalambi' asang toing mating salama'na ingkänna petauanna Puang Alataala ang tohho yaling inde di bohto mahoa', la'bi-la'binna yato ang si tohho di hao di dasanna tomaraya.

23Ke la malai Dehatanta Puang Yesus Kristus umbehekoa' para-para.


  Share Facebook  |  Share Twitter

 <<  Filipi 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran