Dual Panel1Indee Melkisedek dianto tomaraya Bohto Salem dolu anna imanna Dehata ang Handang Malängkä'. Tahpana sumule Abraham di hao mai di pa'tolla'ang naonge untaloi sangngaka-sangngaka tomaraya, ya' suleng inde Melkisedek natammui anna nabehei.
2Puhai yatoo, naalang Abraham bahe sampulona ingkänna aka-aka ang nahampa'i yaling di pa'tolla'ang anna nabeai pano di Melkisedek. Sanganna inde Melkisedek bahtuanna: 'Tomaraya ang Maroho.' Anna, aka' untomarayai Bohto Salem ang bahtuanna: 'Kamasahkeang,' mala disangai: 'Tomaraya Kamasahkeang.'
3Ponna tabata tohodolunna, dai aha tiuki' pengkalaoanna didiona ambena, indona, bahtu' peneneanna. Datoi aha tiuki' didiona pampahandu'anna bahtu' katämpä'anna katuhoanna. Mala dioatee indee Melkisedek sinnoa Änä'na Puang Alataala aka' tontong mendahi imang lambi' sapano-panona.
4Yaling inde di tohodolunna taita umba noa kamalängkä'anna Melkisedek. Panone' di Abraham, ya' malängkä' toe' aka' naponene ingkänna to Israel. Ampo' moinnakato noa, Abraham umpakeangka' Melkisedek lambi' umbea bahe sampulona ingkänna aka-aka ang nahampa'i yaling di pa'tolla'ang.
5Situhu' atohanna ada' Yahudi, peänä'anna Lewi ang mendahi imang pahallu untahimbo bahe sampulona aka-aka di hao mai di solana to Israel moinnakato anna peampoanna asangngi Abraham.
6Indene' Melkisedek, tadia peänä'anna Lewi, ampo' moinnakatoo noa untahimbo toe' bahe sampulona di hao mai di Abraham. Dia tuke', moinnakato anna halii Abraham untahimbo pa'dandinna Puang Alataala, ampo' tadia Abraham ang umbehe Melkisedek, ampo' Melkisedek-ete' ang umbehe Abraham.
7Anna maleso tainsang taoatee tau ang dibehe madihoi'ang nei' andana tau ang mambehe. Dahi Melkisedek malängkä' puha nei' andana Abraham.
8Panone' di ingkänna seimangang, si untahimbo toe' bahe sampulona di hao mai di solana to Israel. Ampo' si mate asang toe' sinnoa ingkänna hupatau. Ampo' indene' Melkisedek untahimbone' bahe sampulona di hao mai di Abraham anna dai aha tiuki' kamateanna, mala dioatee tuho loloke'.
9Dia tuke', mala dioatee seimangang, bahtu' peänä'anna Lewi ang si untahimbo bahe sampulona, puha umbaya' bahe sampulona pano di Melkisedek ungngolai Abraham peneneannaii.
10Aka' Lewi ampo kuntu'na Abraham, dahi naonge Abraham anna umbeai yato bahe sampulona pano di Melkisedek, ya' yalingke' di kalaena inde ta Lewi ampona.
11Puang Alataala ungngängkä' sangngaka-sangngaka di alla'na peänä'anna Lewi mendahi imang ang la umbahanang to Israel yaling untuhu'i atohanna. Ampo' hupatau dai mala mendahi maroho ungngolai pengkähänna yato seimangang. Dianto anna pahallung kende' imang senga', dianto mesa imang ang sinnoa Melkisedek, tadia mesa peänä'anna Lewi hapanganna Harun.
12Dahi, ke dibala'i seimangang ang peänä'anna Lewi anna malai aha imang senga', ya' pahallu toe' dibala'i atohanna ada' Yahudi.
13Ang ditula' dinoa dianto Dehatanta Puang Yesus ang sule di hao mai di peneneang senga'. Dai aha di alla'na solasohonna ang mendahi imang.
14Tainsang taoatee Puang Yesus umponene Yehuda, dai umponene Lewi. Anna dai aha kasikenteanna Yehuda anna seimangang situhu' atohanna ada' Yahudi ang nauki' Nabi Musa.
15Anna maleso puha nei' ke taitaia' anna taoaitee kende'mi mesa Imang senga', ang sinnoa Melkisedek.
16Tadia aka' atohang ang mangngoatee: supung peänä'anna Lewi ang mala mendahi imang, ampo' inde Imang senga' diängkä'mi aka' kakuasaanna anna katuhoanna ang dai aha kapuhaanna.
17Aka' aha tiuki' yaling di Suha' Masero naoatee, "Dionto imang lambi' sapano-panona, sinnoa siang Melkisedek dolu."
18Dahi yato atohang ang masae dang dipake aka' malamma anna dai kekuna.
19Aka' dai nabela yato atohanna ada' Yahudi umpamaroho tau. Ampo' dinoa Puang Yesus mebea panghannuang ang mahasa puha, anna yaling yatoo mala tadungku'i Puang Alataala.
20Dia tuke', Puang Yesus mendahi imang aka' popindaanna Puang Alataala.
21Dai aha imang senga' ang tiängkä' noa. Ampo' tahpana Puang Yesus diängkä' mendahi imang, mopindang Puang Alataala naoatee, "Kodi' Puang Alataala kupopindai anna dai la tirende tula'ku: Dionto imang lambi' sapano-panona."
22Aka' inde popindaang maleso tainsang taoatee Puang Yesus umpamatoto' mesa pa'dandiang ang mahasa puha andana yato pa'dandiang ang dolu.
23Ahake' bou mesa: seimangang ang peänä'anna Lewi mai'di, anna tau biasa asang. Ponna mateng mesa, ya' pahallu aha ang mambala'i.
24Ampo' tuhone' Puang Yesus lambi' sapano-panona, anna pengkähänganna tontong lolo, mendahi imang, dai aha ang mambala'i.
25Dianto anna ma'kuasai lambi' sapano-panona umpasalama'ingkea' ang mendungku' pano di Puang Alataala yaling di sanganna. Aka' tuho lolo anna tontong napehumala'ingkea' dai' di Puang Alataala.
26Dahi Puang Yesus dianto Handang Pongkahana Imang ang tapahallu, aka' masero, dai aha kasalaanna bahtu' dosanna. Dinoa dipasähä'mi di hao mai di to madosa anna dipadai'i di ongeang ang handang malängkä' yaho di suruka.
27Dai sinnoa imang biasa ang pahallu umpopenomba penombaang allo-allo: ang napadolu dianto aka' dosanna toboe', mane dosannai tau senga'. Ampo' indene' Puang Yesus pihsang supu umpopenomba penombaang dai' di Puang Alataala naonge umbehoi Kalaena dipatei. Yato penombaanna dai pahallu dipa'sule-sulei.
28Tau ang mendahi handang pongkahana imang yaling di atohanna ada' Yahudi malamma aka' hupatau biasa. Ampo' puhanna atohang ada' Yahudi dibea ungngolai Nabi Musa, Puang Alataala mopinda aka' la ungngängkä' Änä'na mendahi Handang Pongkahana Imang. Anna inde Änä'na dianto To Pepasalama' ang sundung lambi' sapano-panona.