Alkitab Mobile SABDA
[VER] : [ARALLE]     [PL]  [PB] 
 <<  Roma 1 >> 

1Pano di ingkänna solasohongku di lau' di Roma. Hao mai di Paulus, sabua'na Kristus Yesus. Napilleiä' anna nasuo umbaha Kaheba Mapia ang sule yaho mai di Puang Alataala.

2Inde Kaheba Mapia inang puhang nadandi Puang Alataala ungngolai ingkänna nabinna dolu, sinnoa ang tiuki' yaling di Suha' Masero.

3Inde Kaheba Mapia untula' didiona Änä'na Puang Alataala, dianto Puang Yesus, To Dilanti' la Mepasalama', Dehatanta. Situhu' mentolinona, Puang Yesus dianto Peänä'anna Tomaraya Daud. Ampo' situhu' mendehatanna setonganna Änä'naete' Puang Alataala, aka' masero sinnoa Puang Alataala. Maleso indee aka' napatuho sumule Puang Alataala di hoi' mai di alla'na to mate umpake kakuasaanna, anna dianto indee mampatandaang dioate inang Änä'na si'da Puang Alataala.

4(1:3)

5Ungngolai tula'na inde Puang Yesus, nabehe liuä' Puang Alataala anna napadahiä' rasulna, anna malaä' umpepainsangnging inde Kaheba Mapia pano di tau ang tadia to Yahudi di umba-umba naongei di lino, anna kupakuhui mampetahpa' anna untuhu'i Puang Yesus, lambi' sanganna Puang Yesus dipamatande.

6Dahi, ingkämmua' to Sahani diting di Bohto Mahoa' Roma, mai'dikoa' diting tadia to Yahudi ampo' natambai tumokoa' dio Puang Alataala mendahi to pentindo'na Puang Yesus, To Dilanti' la Mepasalama'.

7Dianto suhunna anna kupapebahai inde suha' mating. Aka' nakalemuikoa' Puang Alataala sibaha natambaikoa' mendahi to pentindo'na ang masero. Kuhannuang Ambeta Puang Alataala anna Puang Yesus Kristus la mambeakoa' behe anna kamasahkeang.

8Oa' ingkämmu solasohongku, uhu-uhuna ma'kuhhu'sumanga'ä dai' di Puang Alataala Dehatangku yaling di sanganna Puang Yesus Kristus aka' dioa'. Aka' kuhingngi umba noa kapampetahpa'ammua' kainsangang di umba-umba naonge di lino.

9Mengkähängngä' sibaha sangkalebu inahangku ungkähäng pengkähängang ang nabeaä' Puang Alataala, dianto umpepainsangnging Kaheba Mapia didiona Änä'na. Nainsang Puang Alataala ihsi inahangku, dianto umba kupanoa kusambayangngi lolokoa'.

10Kusambayangngi lolokoa', solasohongku, anna kupalau liu dai' di Puang Alataala ke la malai nabuhkeiingkä' lalang umba ke malaä' mating kupellambi'ikoa'.

11Aka' pemala liuä' kupellambi'ikoa', umba ke malakoa' kubea behe di hao mai di Inaha Masero ang la umpamatohoa' kapampetahpa'ammu.

12Pahtuyungku anna mala toi kodi' matoho kapampetahpa'angku, lambi' la malaingkea' sipakatoto'-toto' yaling di kapampetahpa'ang.

13Oa' solasohong, pemalaä' anna malaia' ungnginsang umba noa pemmai'dimä' mopahtuyu la mating kupellambi'ikoa', ampo' aha lolo pekalakahta. Pahtuyungku anna pemalaä' mating umba ke malai aha boana pengkähängku diting di bohtomua', sinnoa aha boa pengkähängku di alla'na tau ang tadia to Yahudi di hao di bohto senga'.

14Aka' kusa'ding keindangngä' pano di ingkänna tau, anna supung lalang ang la mala kuola umbaya' inde indangku dianto umpepainsangnging Kaheba Mapia pano di ingkänna tau, dai aha kupasisenga'-senga' to haoraka mai di bohto mahoa', bahtu' to haoraka mai di bohto saohko'; dai kupihki' pahsikolaraka, tadiaraka.

15Dianto suhunna anna pemala liuä' umpepainsangnging inde Kaheba Mapia mating di dioa' ang tohho diting di Bohto Mahoa' Roma.

16Dä' masili umpepainsangnging Kaheba Mapia. Aka' menna ang umpetahpa' inde Kaheba Mapia la napasalama' kakuasaanna Puang Alataala di hao mai di dosa. Dolu inde Kaheba Mapia dipepainsangnging pano di to Yahudi, ampo' dinoa dipepainsang tuming nei' pano di tau ang tadia to Yahudi.

17Yaling inde di Kaheba Mapia taitaa' umba noa lalang lambi' naangka'ingkea' Puang Alataala maroho di olona. Lalang indee supung ungngolai kapampetahpa'ang pano di Puang Yesus, dai aha lalang senga'. Sinnoa ang tiuki' yaling di Suha' Masero dolu, naoate, "Tau ang naangka' maroho Puang Alataala, dianto tau ang la ullambi' katuhoang lambi' sapano-panona aka' kapampetahpa'anna."

18Napalanda' kakeaha'anna Puang Alataala yaho mai di suruka pano di ingkänna dosanna anna kakarakeanna hupatau ang umpa'bali katahpa'ang ungngolai pembabe karakenaii.

19Aka' maleso pano di ingkänna hupatau naoatee aha Puang Alataala, aka' Kalaena Puang Alataala ang mampakalesoing.

20Aka' moinnakato daingkea' mala ungngita Kalaena Puang Alataala, ampo' mengkalaoke' uhuna anna dipapiai inde lino anna nainsammi hupatau naoate inang aha Puang Alataala. Aka' di hao mai di ingkänna ang napapia, taitaa' umba noa kadehataanna anna taita toe' kakuasaanna ang dai aha kapuhaanna. Dahi dai aha tau ang la mala mangngoatee, "Dä' ko ungnginsang Puang Alataala."

21Sika nainsang siang naoate aha Puang Alataala, ampo' dai sika napakeangka' anna dai napa'kuhhu'sumanga'i. Pihki'naii tuhtuang sikahaoang Puang Alataala, nasuhung mendahi malillimmi inahannaii, lambi' dang sika ungnginsang pepakuhu ang tahpa'.

22Sika unsanga kalaena manähäng, ampo' setonganna to maho!

23Dai sika naaku umpenombai Puang Alataala ang tontong lolo aha. Supung sika umpenombai tau-tau pampapia kalaena ang napasinnoa hupatau, dansi, ile bahtu' olo'-olo' senga'ke' ang dai la aha lolo.

24Dahi, aka' dai sika naaku umpenombai Puang Alataala, nasuhung napabei tomande' untuhu'i pampemala kalaenaii umbabe kakarakeang, lambi' sika membabe tasampa' pano di solana.

25Dai sika naaku umpehingngii pepakuhu ang tahpa'; supung umpehingngii kalosengang. Datoe' sika naaku umpenombai To Metampa; supung pampapianna Puang Alataala ang sika napenombai anna napehingngii. Ampo' setonganna To Metampaete' ang sihatang dipenombai lambi' sapano-panona. Aming!

26Dahi, aka' dai sika naaku umpenombai Puang Alataala, nasuhung napabei tomande' untuhu'i pampemalannaii ang tasampa'. Moi bahine dang membabe situhu' ang sihatang nababe bahine, ampo' inde mai bahine siala sambahinena!

27Noa tunne' muane: dang sika siala bahine, ampo' umpemala supu sammuanena! Muane umbabe ang tadia babe sibaha solana muane, lambi' katämpä'anna sika untahimbo tahungkung ang sihatang, bala'na pembabe karakenaii.

28Aka' dai sika naaku ungngakui Puang Alataala yaling di pihki'naii, dianto anna napabei tomande'mi Puang Alataala pihki'naii mendahi karake, lambi' sika umbabe ang dai sihatang nababe.

29Punno yaling di inahannaii dosa anna pihki' karake, sinnoanna: kaso'bängang, mengkero karake, ma'sihiate, pemala papateang, pa'siba'diang, ma'bulitu', umpa'pihki' karakeing solana, ma'kara-kara bu'bu', ungkahiri' Puang Alataala, dai meada', malängkä' inaha, anna pemala supu dipa'käyyängngi. Umpeäng lolo lalang anna malai tuhtuang kehängngäng yato kakarakeang ang nababe. Sika umpa'bali to baha'naii,

30(1:29)

31dai keaka', dai umpasulepano pa'dandinna, dai aha pa'kalemunna anna dai undului solana.

32Sika ungnginsang pahentana Puang Alataala ang naoate menna ang mampanoa yatoo sihatang ditahungkung mate. Ampo' moinnakato noa, tontong lolo siang sika napanoa, anna ang handang naposala aka' sika napokahsi liu ke ahai solana ang mampanoa toe'.


  Share Facebook  |  Share Twitter

 <<  Roma 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran