Alkitab Mobile SABDA
[VER] : [BABA]     [PL]  [PB] 
 <<  Galatia 3 >> 

1Hei orang Galatiah yang bodoh, siapa-kah sudah knakan obat-guna sama kamu, yang di dpan mata kamu juga Isa Almaseh sudah di-nyatakan dngan hal tersalib?

2Ini saja sahya mau dapat tahu deri-pada kamu smoa, kamu sudah trima Roh Alkudus deri sbab buat sperti hukum-taurit-kah, atau deri sbab dngar dngan perchaya?

3Kamu bgitu bodoh-kah? kamu sudah mula'i dngan yang rohani, dan skarang kamu mau habiskan dngan perkara dunia-kah?

4Sudah-kah kamu tahan bgitu banyak susah dngan sia-sia? kalau btul sia-sia juga.

5Tuhan yang mmbri Roh k-pada kamu, dan buat m'ujizat di antara kamu, itu smoa deri sbab buat sperti hukum-taurit-kah, atau deri sbab dngar dngan perchaya-kah?

6Sama sperti Ibrahim sudah perchaya sama Allah, dan itu sudah di-bilangkan k-pada dia mnjadi kbnaran.

7Sbab itu biar-lah kamu tahu yang smoa orang yang ada perchaya, dia-orang-lah mnjadi Ibrahim punya anak.

8Dan kitab pun, sbab sudah tengok lbeh dhulu yang Allah ada bnarkan orang bangsa-asing deri sbab perchaya, sudah lbeh dhulu khabarkan khabar yang baik itu k-pada Ibrahim, ia'itu, "Dalam angkau sgala bangsa-asing nanti dapat berkat."

9Jadi itu, orang yang perchaya dapat berkat sama-sama Ibrahim yang perchaya.

10Kerna s-brapa banyak orang yang harap mau buat sperti hukum-taurit, dia-orang kna kutok: kerna ada tersurat, "Kutok-lah atas orang yang t'ada ttap dalam smoa perkara yang tersurat dalam hukum-taurit, spaya buat itu."

11Nyata-lah yang di dpan Allah satu orang pun t'ada di-bnarkan oleh hukum-taurit, kerna "Orang yang bnar nanti hidop deri sbab perchaya;"

12dan hukum-taurit itu bukan-nya deri-pada perchaya asal-nya; ttapi, "Orang yang buat itu smoa nanti hidop dalam-nya."

13Almaseh sudah tbuskan kita kluar deri-pada kutok hukum-taurit itu, dalam hal dia sudah mnjadi satu kutok kerna kita: kerna ada tersurat, "Kutok-lah orang yang bergantong di atas kayu:

14spaya di atas orang bangsa-asing pun boleh datang berkat Ibrahim dalam Isa Almaseh; ia'itu spaya oleh perchaya kita boleh trima Roh yang sudah di-janjikan.

15Hei sudara-sudara, sahya ada chakap chara manusia: kalau perjanjian manusia skali pun, bila sudah ttap, satu orang pun t'ada sblahkan atau tambahkan.

16Allah punya perjanjian smoa sudah di-chakapkan k-pada Ibrahim, dan k-pada dia punya bneh. Bukan dia bilang, "K-pada sgala bneh," sperti fasal banyak orang; ttapi sperti fasal satu orang, "Dan k-pada angkau punya bneh," ia'itu Almaseh.

17Jadi, ini-lah yang sahya bilang; satu perjanjian yang dhulu Allah sudah ttapkan, itu hukum-taurit yang sudah datang ampat-ratus tiga-puloh tahun kmdian ta'boleh batalkan sampaikan itu perjanjian jadi t'ada kuat.

18Kerna kalau psaka itu datang deri hukum-taurit, itu t'ada lagi deri perjanjian; ttapi Allah sudah anugrahkan k-pada Ibrahim deri sbab perjanjian.

19Kalau bgitu apa-kah itu hukum-taurit? Itu hukum-taurit sudah di-sambongkan deri sbab orang punya ksalahan, sampai datang itu bneh yang k-pada-nya Allah sudah berjanji; dan itu hukum-taurit sudah di-prentahkan oleh mla'ikat dngan satu orang tngah punya tangan.

20Orang tngah itu bukan satu orang punya; ttapi Allah itu satu saja.

21Kalau bgitu ada-kah hukum-taurit itu mlawan Allah punya perjanjian smoa? Tidak skali-kali: kerna jikalau sudah di-bri satu hukum yang boleh kasi hidop, tntu-lah kbnaran itu datang deri-pada hukum-taurit juga.

22Ttapi kitab sudah tntukan smoa-nya terkurong dalam dosa, spaya itu perjanjian yang datang deri sbab perchaya dalam Isa Almaseh boleh di-kasikan k-pada orang yang perchaya.

23Ttapi s-blum perchaya datang, kita sudah kna jaga di bawah prentah hukum-taurit, terkurong mnantikan itu perchaya yang kmdian nanti di-nyatakan.

24Jadi itu hukum-taurit sudah mnjadi kita punya guru yang bawa kita k-pada Almaseh, spaya kita boleh di-bnarkan deri sbab perchaya.

25Ttapi sdang perchaya sudah datang, t'ada lagi kita ini di bawah satu guru.

26Kerna kamu ini smoa anak-anak Allah oleh perchaya dalam Isa Almaseh.

27Kerna s-brapa banyak orang di antara kamu yang sudah di-baptiskan k-dalam Almaseh, sudah ambil Almaseh mnjadi pakaian-nya.

28T'ada lagi orang Yahudi atau orang Grik, t'ada lagi hamba atau orang bebas, t'ada lagi dlaki atau prempuan: kerna kamu smoa satu dalam Isa Almaseh.

29Dan jikalau kamu ini Almaseh punya, tntu-lah kamu mnjadi kturunan Ibrahim, dan waris pun sperti perjanjian itu.


  Share Facebook  |  Share Twitter

 <<  Galatia 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel