Alkitab Mobile SABDA
[VER] : [BABA]     [PL]  [PB] 
 <<  Wahyu 3 >> 

1Dan k-pada eklisia yang di Sardis punya mla'ikat, tulis bgini; Ini-lah smoa yang di-katakan oleh dia itu yang ada itu tujoh Roh Allah, dan itu tujoh bintang: sahya tahu angkau punya perbuatan, ia'itu angkau bernama hidop, ttapi angkau ada mati.

2Berjaga-lah, dan ttapkan apa-apa yang ada tertinggal lagi, yang hampir mau mati itu: kerna sahya t'ada dapat jumpa satu pun perbuatan kamu sudah smpurna di dpan Allah sahya.

3Sbab itu ingat-lah bagimana angkau sudah trima dan sudah dngar; dan turut itu, dan bertobat. Sbab itu, jikalau angkau t'ada jaga, sahya nanti datang sperti pnchuri, dan angkau skali-kali t'ada nanti tahu apa waktu-kah sahya nanti datang atas angkau.

4Ttapi angkau ada sikit nama-nama orang di Sardis yang t'ada kotorkan dia-orang punya pakaian; dan dia-orang nanti berjalan sama-sama sahya dngan pakai puteh; kerna dia-orang ada layak.

5Dia yang mnang nanti di-pakaikan puteh bgini, dan t'ada skali-kali sahya nanti hapuskan nama-nya deri dalam kitab hidop, dan sahya nanti mngaku dia punya nama dpan Bapa sahya, dan dpan dia punya mla'ikat smoa.

6Orang yang ada kuping, biar dia dngar apa Roh kata sama itu eklisia smoa.

7Dan k-pada eklisia di Filadelfiah punya mla'ikat, tulis bgini; Ini-lah smoa yang di-katakan oleh dia itu yang kudus, dia yang btul, dia yang ada Da'ud punya kunchi, dia yang buka dan t'ada orang boleh tutop, dan tutop dan t'ada orang boleh buka:

8sahya tahu angkau punya perbuatan (tengok-lah, sahya sudah mnghadapkan dpan angkau satu pintu yang terbuka, yang satu orang pun ta'boleh tutop) sahya tahu yang angkau chuma ada sikit kuasa saja, dan sudah simpan sahya punya perkata'an, dan t'ada sangkalkan sahya punya nama.

9Ingat, sahya nanti kasi orang deri antara kumpolan Setan, yang katakan diri-nya orang Yahudi dan yang bukan Yahudi, ttapi pmbohong; sahya nanti paksa dia-orang datang smbah dpan kaki angkau, sampaikan dia-orang tahu yang sahya sudah kaseh sama angkau.

10Deri sbab angkau sudah simpan sahya punya perkata'an deri-hal sabar, sahya pun nanti simpan angkau deri-pada waktu pnchoba'an yang nanti datang atas smoa dunia, spaya boleh choba orang yang tinggal atas bumi ini.

11Sahya datang dngan sgra: baik-lah angkau pegang apa-apa yang angkau ada itu, spaya jangan satu orang pun ambil angkau punya makota.

12Orang yang mnang, sahya nanti jadikan dia satu tiang dalam sahya punya Allah punya ka'abah, dan dia skali-kali t'ada nanti kluar lagi deri situ: dan sahya nanti tulis atas dia nama Allah sahya, dan nama negri Allah sahya, ia'itu Yerusalim yang bharu, yang kluar deri shorga turun deri-pada sahya punya Allah, dan sahya sndiri punya nama yang bharu pun.

13Orang yang ada kuping, biar dia dngar apa Roh kata sama itu eklisia smoa.

14Dan k-pada eklisia di Laodikiah punya mla'ikat, tulis bgini; Ini smoa-lah yang di-katakan oleh Amin itu, ia'itu saksi yang kperchaya'an dan btul itu, dan permula'an sgala kjadian Allah:

15sahya tahu angkau punya perbuatan, yang angkau sjok pun t'ada, panas pun t'ada: baik juga kalau angkau ada sjok atau panas.

16Jadi, sbab angkau ada suam, ia'itu panas pun t'ada, sjok pun t'ada, sahya nanti smburkan angkau kluar deri mulut sahya.

17Sbab angkau kata, "Sahya kaya, dan sudah dapat kkaya'an, dan t'ada terkurang apa-apa;" dan sbab t'ada tahu yang angkau-lah itu orang yang chlaka, dan malang dan miskin dan buta dan tlanjang:

18sbab itu sahya kasi nasihat sama angkau, bli-lah deri sahya mas yang sudah di-suchikan oleh api, spaya angkau jadi kaya; dan bli pakaian puteh, spaya angkau ada pakaian, dan jangan ternampak angkau punya tlanjang punya hal malu; dan bli minyak mau minyakkan angkau punya mata, spaya angkau boleh nampak.

19S-brapa banyak orang yang sahya kaseh, sama dia sahya kalot dan ajarkan: sbab itu jadi-lah rajin, dan bertobat.

20Ingat, sahya ada berdiri di pintu dan mngtok: jikalau barang-siapa dngar sahya punya suara dan buka pintu, sahya nanti masok k-pada dia, dan nanti makan sama-sama dia, dan dia pula sama-sama sahya.

21Dia yang mnang, sahya nanti kasi dudok sama-sama sahya di atas sahya punya takhta, sperti sahya pun sudah mnang, dan dudok sama-sama sahya punya Bapa di atas dia punya takhta.

22Orang yang ada kuping, biar dia dngar apa Roh kata sama itu eklisia smoa.


  Share Facebook  |  Share Twitter

 <<  Wahyu 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran