Alkitab Mobile SABDA
[VER] : [BABA]     [PL]  [PB] 
 <<  Yohanes 12 >> 

1Sbab itu, anam hari lbeh dhulu hari Paska, Isa pergi Bait-Ani, di tmpat Lazarus, yang Isa sudah bangkitkan deri antara orang mati.

2Jadi di sana dia-orang buat satu perjamuan-malam kerna Isa: dan Marta-lah yang mlayan; dan Lazarus pun satu orang di antara orang-orang yang dudok meja sama-sama Isa.

3Sbab itu Mariam ambil s-kata punya minyak wangi, yang t'ada champur dan yang banyak herga punya, dan minyakkan kaki Isa, dan sapukan kaki-nya sama rambot-nya: dan dngan itu minyak wangi punya bau smerbak satu rumah.

4Ttapi Yudas Iskariot pula, ia'itu anak-murid-nya yang nanti srahkan dia, kata,

5"Knapa ini minyak tidak di-jualkan herga tiga-ratus dinar, dan duit-nya boleh sdkahkan k-pada orang miskin?"

6Dia kata bgini bukan sbab dia pdulikan orang miskin; ttapi sbab dia satu pnchuri, dan dia-lah yang pegang pundi-pundi, dan ambil apa yang di-masokkan di situ.

7Sbab itu Isa kata, "Diamkan ini prempuan, spaya dia boleh simpan ini kerna hari yang sahya nanti di-kuborkan.

8Kerna orang miskin kamu slalu ada sama kamu; ttapi sahya ini kamu t'ada slalu."

9Jadi kbanyakan punya orang Yahudi dapat tahu yang Isa ada di sana, dan dia-orang datang bukan saja deri sbab Isa, ttapi spaya dia-orang boleh tengok Lazarus juga, yang dia sudah bangkitkan deri antara orang mati.

10Ttapi kpala-kpala imam pakat mau bunoh Lazarus pun;

11kerna deri dia punya sbab banyak orang Yahudi sudah undor pergi perchaya sama Isa.

12Besok-nya banyak skali orang yang sudah datang hari-bsar, bila dia-orang dngar yang Isa sudah datang di Yerusalim,

13dia-orang ambil plpah pokok khurma, dan pergi kluar jumpa sama dia, dan bertriak, "Hosanna: berkat-lah dia itu yang datang dalam nama Tuhan, ia'itu raja Isra'el."

14Dan Isa pula, bila dia sudah dapat satu kaldai muda, dudok di atas-nya, sperti ada tersurat,

15"Jangan-lah takot, hei anak-prempuan Sion: tengok-lah angkau punya raja datang tunggang anak kaldai."

16Ini smoa murid-murid-nya t'ada mngerti mula-mula; ttapi bila Isa sudah di muliakan, bharu-lah dia-orang ingat yang ini smoa sudah di-suratkan deri-hal dia, dan orang buat ini smoaa k-pada dia.

17Jadi sgala orang itu yang sudah ada sama-sama dia bila dia triak Lazarus kluar deri kubor, dan bangkitkan dia deri antara orang mati, smoa-nya bersaksi.

18Dan deri kerna ini juga orang-banyak sudah pergi mlawat sama dia, ia'itu kerna dia-orang sudah dngar yang dia sudah buat ini tanda.

19Sbab itu orang Farisi kata satu sama lain, "Tengok-lah, bagimana kamu smoa ta'boleh buat apa-apa: tengok, satu dunia punya orang sudah pergi ikut dia."

20Di antara orang yang datang mau smbahyang tempo hari-bsar, ada bbrapa orang Grik:

21dan ini orang smoa datang k-pada Filipus, orang Bait-Saida di tanah Galil, dan minta sama dia, dan kata, "Tuan, kita mau tengok Isa."

22Filipus datang katakan itu hal sama Andrias; dan Andrias datang dngan Filipus, dan katakan sama Isa.

23Dan Isa jawab sama dia-orang, dan kata, "Waktu-nya sudah sampai yang Anak-manusia msti di-muliakan.

24Dngan sunggoh-sunggoh sahya bilang sama kamu, kalau satu biji trigu blum jatoh di tanah dan mati, dia tinggal s-biji juga; ttapi kalau mati, dia berbuah banyak.

25Orang yang sayang sama nyawa-nya, nanti hilang nyawa-nya; dan orang yang bnchi nyawa-nya dalam ini dunia, nanti pliharakan dia kerna hidop yang kkal.

26Kalau siapa-siapa layankan sahya, biar dia ikut sama sahya; dan di mana-mana sahya ini ada, di situ juga ada sahya punya playan: kalau siapa-siapa layankan sahya, Bapa nanti hormatkan sama dia.

27Skarang hati sahya terkachau; apa sahya boleh katakan? Ya Bapa, slamatkan-lah sahya deri-pada ini waktu ksusahan. Ttapi kerna ini sbab-lah sahya sudah datang sampai ini waktu.

28Ya Bapa, muliakan-lah nama Bapa." Jadi satu suara kluar deri langit, "Sahya sudah muliakan, dan sahya nanti muliakan lagi."

29Itu orang-banyak yang berdiri di situ, dan dngar itu suara, kata yang itu bunyi guntor; lain orang pula kata, "Satu mla'ikat sudah berchakap sama dia."

30Isa jawab kata, "Bukan-nya kerna sahya ini suara sudah datang, ttapi kerna kamu smoa.

31Skarang ini dunia di-hukumkan: skarang ini dunia punya raja nanti di-buangkan kluar.

32Dan sahya ini, kalau sahya sudah di-tinggikan deri atas bumi, sahya nanti tarek smoa orang datang k-pada sahya punya diri."

33Dia kata bgini mau tandakan bagimana hal kmatian-nya.

34Sbab itu orang-banyak jawab sama dia, "Kita sudah dngar deri dalam taurit yang Almaseh itu ada kkal sampai s-lama-lama-nya: bagimana pula tuan kata, 'Anak-manusia msti di-tinggikan?' siapa ini Anak-manusia?"

35Sbab itu Isa kata sama dia-orang, "T'ada brapa lama lagi trang itu ada antara kamu. Baik-lah kamu berjalan s-lagi kamu ada trang itu, spaya jangan kamu kna kglapan: dan orang yang berjalan dalam glap ta'tahu di mana dia ada pergi.

36S-lagi kamu ada trang itu, perchaya-lah sama trang itu, spaya kamu boleh jadi anak-anak trang." Ini smoa Isa chakapkan, kmdian dia undor dan smbunyikan diri-nya deri-pada dia-orang.

37Ttapi mski pun dia sudah buat bgitu banyak tanda-tanda di dpan dia-orang, t'ada juga dia-orang perchaya sama dia:

38spaya nabi Yash'aya punya perkata'an boleh di-bnarkan, ia'itu, "Ya Tuhan, siapa-kah yang sudah perchaya kita punya khabar? Dan k-pada siapa-kah tangan Tuhan sudah di-nyatakan?"

39Itu sbab-lah dia-orang ta'boleh perchaya, kerna Yash'aya ada kata lagi,

40"Dia-orang punya mata Allah sudah butakan, dan hati-nya dia sudah kraskan; Spaya jangan pula dia-orang nampak dngan mata-nya, dan mngerti dngan hati-nya, Dan bertobat pula, Dan sahya smbohkan dia-orang."

41Ini smoa Yash'aya sudah chakapkan, sbab dia sudah tengok dia punya kmulia'an; dan dia chakap deri-hal dia.

42Ttapi dalam pada itu, antara pnghulu-pnghulu pun ada banyak juga yang perchaya sama dia; ttapi deri sbab orang Farisi dia-orang t'ada mngaku, spaya jangan kna buang deri rumah-smbahyang:

43kerna dia-orang suka manusia punya kmulia'an lbeh deri-pada Allah punya kmulia'an.

44Dan Isa bertriak kata, "Orang yang perchaya sama sahya, bukan-nya dia perchaya sama sahya, ttapi sama dia yang hantarkan sahya.

45Dan orang yang tengok sahya, dia tengok dia yang hantarkan sahya.

46Sahya ini sudah datang dalam dunia mnjadi satu trang, spaya barang-siapa yang perchaya sama sahya jangan tinggal dalam glap.

47Dan jikalau siapa-siapa dngar perkata'an sahya, dan t'ada juga pliharakan, bukan sahya ini yang hukumkan dia: kerna sahya sudah datang bukan mau hukumkan ini dunia, ttapi mau slamatkan ini dunia.

48Orang yang tolakkan sahya, dan t'ada trima sahya punya perkata'an, dia ada satu yang nanti hukumkan dia: itu perkata'an yang sahya sudah chakapkan, itu-lah juga yang nanti hukumkan dia tempo hari pnghabisan.

49Kerna sahya bukan sudah chakap deri diri sndiri; ttapi Bapa yang hantarkan sahya, dia-lah yang kasi sahya psanan-nya, apa yang sahya patut katakan, dan apa yang sahya patut chakapkan.

50Dan sahya tahu yang dia punya psanan ia'itu-lah hidop yang kkal: jadi apa-apa yang sahya chakap, sperti Bapa sudah kata sama sahya, bgitu-lah sahya chakap."


  Share Facebook  |  Share Twitter

 <<  Yohanes 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran