Alkitab Mobile SABDA
[VER] : [BALI]     [PL]  [PB] 
 <<  Bilangan 18 >> 

Indik

1Ida Sang Hyang Widi Wasa masabda ring Dane Harun, sapuniki: “Kita muah pianak-pianak kitane makamuah wong Lewine makejang patut negen ukuman uli saluiring kapelihan ane masangketan teken ayah-ayahane di Kemah Linggih Ulune, nanging tuah kita muah pianak-pianak kitane dogen ane patut negen kapelihan-kapelihan sajeroning ayah-ayahan darma kapanditane.

2Ajakja kadang wargan kitane mai, nah ento suku Lewine, buat magae bareng-bareng ngajak kita, muah nulungin kita dikalan kitane muah pianak-pianak kitane ngaturang ayah di Kemah Linggih Ulune.

3Suku Lewine patut nyalanang tetegenan marep teken kita muah pianak-pianak kitane tur nglaksanayang ayah-ayahannyane di Kemahe ento, nangingke ia tusing dadi ngusud barang-barange ane suci ane ada di Tongose Ane Suci muah di pamorboran aturane. Yen prade ia ngusud, ia muah kita lakar mati.

4Ia ajaka makejang patut magae bareng-bareng ngajak kita tur nyalanang saananing tetegenan muah ayah-ayahan di Kemah Linggih Ulune. Nanging anake ane tusing maan kawenangan buat magae ditu, tusing dadi bareng ajak kita ditu.

5Tuah kita muah pianak-pianak kitane dogen ane patut nyalanang tetegenan ngaturang ayah di Tongose Ane Suci muah di pamorboran aturane, apanga Ulun tusing buin duka teken bangsa Israele.

6Ulun ane suba nyelik kadang wargan kitane, nah ento wong Lewine uli pantaran bangsa Israele, makadadi paican Ulune teken kita. Ia suba kanehang pabuat Ulun apanga ia nyidayang ngaturang ayah sajeroning Kemah Linggih Ulune.

7Nanging tuah kita muah pianak-pianak kitane dogen ane dadi nyalanang darma kapanditan, ane dadi maekin pamorboran aturane muah saananing ane ada di Tongose Ane Maha Suci. Ento ane dadi tetegenan kitane muah pianak-pianak kitane, sawireh Ulun suba nglugrain kita tegak dadi pandita. Asing-asing anak ane tusing maan kawenangan buka keto ia lakar mati, yen ia maekin barang-barange ane suci ento.”

Indik

8Ida Sang Hyang Widi Wasa malih masabda ring Dane Harun sapuniki: “Ingetangja! Sakancan aturan istimewa ane katurang pabuat Ulun, ane tusing katurang malantaran maborbor, ento makejang dadi pikolih kitane. Ento paicayang Ulun teken kita muah katurunan kitane makadadi pikolih salawas-lawasne.

9Uli pantaran aturane ane paling sucina ane tusing maborbor di pamorboran aturane luire: aturan sesajen, aturan panyupat dosa, muah aturan panaur danda, ento dadi pikolih kitane. Saluiring ane katurang teken Ulun makadadi aturan ane suci, ento dadi pikolih kitane muah pianak-pianak kitane.

10Kita patut ngajiang barange ento makadadi barang suci, tur daarja ento di tongose ane suci. Tuah anak muani-muani dogen ane dadi naar barange ento.

11Sajaba ento, sakancan aturan istimewa ane lenan, ane aturanga baan wong Israele, ento masih dadi pikolih kitane. Ento paicayang Ulun teken kita, teken pianak-pianak kitane ane muani-muani muah teken pianak-pianak kitane ane luh-luh. Pidabdabe ento maguna kanti salawas-lawasne. Asing-asing anggota kulawarga ane suba suci manut sopacaraning agama, dadi naar aturane ento.

12Ulun maicayang teken kita sakancan ane paling melaha uli pantaran pamupon gumine ane alapa paling maluna, ane ngatiban aturanga baan wong Israele teken Ulun, luire: lengis saitun, yeh anggur muah gandum.

13Ento makejang dadi pikolih kitane. Sawatek anggota kulawargan kitane, ane suci manut sopacaraning agama, dadi naar aturane ento.

14Saluiring ane ada di Israel, ane suba saking sujati katurang teken Ulun, ento dadi pikolih kitane ajak makejang.

15Sawatek anake ane lekad paling keliha, wiadin wewalungan ane lekad jumun daana, ane aturanga baan wong Israele teken Ulun, ento dadi pikolih kitane. Nanging kita patut nampi pipis panebus buat asing-asing rare ane lekad paling keliha muah sakancan panak wewalungane ane leteh ane lekad jumun daana.

16Rare-rarene ento patut katebus dikalaning ia matuuh abulan. Panebus ane katetepang buat ento limang keteng pipis perak, manut aji ane katetepang di Perhyangan Agung.

17Nanging sampi, biri-biri muah kambing, ane lekad jumun daana ento tusing dadi tebus. Wewalungane totonan sing dadi tuara katurang teken Ulun. Getihne briokang di pamorboran aturane, tur mulukne borbor makadadi aturan rayunan. Bon aturane ento ngledangin pakayunan Ulune.

18Ben wewalungane ento masih dadi pikolih kitane patuh buka tangkah muah batis ane durian ane kenawan, uli aturan istimewane ento.

19Sakancan aturan istimewane ane katurang baan wong Israele teken Ulun ento paicayang Ulun teken kita muah pianak-pianak kitane luh muani, buat salawas-lawasne. Ento makadadi pikukuh prajanjian Ulune ane tusing dadi buungang teken kita muah katurunan kitane.”

20Ida Sang Hyang Widi Wasa malih masabda ring Dane Harun sapuniki: “Kita tusing lakar maan duman cecatu. Di gumine ane janjiang Ulun ento, tusing ada tanah angan atebih ane lakar dadi eduman kitane. Ulun ene Ida Sang Hyang Widi Wasa, ane dadi duman kitane.”

Duman

21Ida Sang Hyang Widi Wasa masabda ring Dane Harun, sapuniki: “Sakancan aturan apahdasan ane aturanga baan wong Israele teken Ulun, suba paicayang Ulun teken wong Lewine. Ene makadadi upahnyane buat ngetangang Kemah Linggih Ulune.

22Wong Israel ane lenan tusing dadi buin maekin Kemahe ento, apanga ia tusing nibakang danda pati buat dewekne padidi.

23Ngawit uli jani, tuah wong Lewine dogen ane dadi ngetangang Kemah Linggih Ulune muah negen ayah-ayahane ditu makejang. Pidabdabe ene masih kamanggehang pabuat katurunan kitane ngantos salawas-lawasne. Wong Lewine lakar tusing ngelah duman cecatu di Israel.

24Sawireh ane dadi duman cecatunnyane, suba paicayang Ulun teken ia, nah ento sakancan aturan apahdasan ane katurang baan wong Israele makadadi aturan istimewa teken Ulun. Ento krana Ulun suba ngandikayang teken wong Lewine ento, mungguing ia tusing lakar maan duman cecatu di Israel.”

Atura

25Ida Sang Hyang Widi Wasa ngandikayang ring Dane Musa,

26mangda dane ngrauhang titahe puniki ring wong Lewine, sapuniki: “Di kalan kitane nampi aturan apahdasan uli pantaran wong Israele, ane kapaicayang baan Ida Sang Hyang Widi Wasa teken kita, kita patut ngaturang apahdasan uli aturane ento ka ayun Ida Sang Hyang Widi Wasa, makadadi aturan istimewa.

27Aturan istimewane ene lakar kajiang patuh teken gandum muah yeh anggur ane anyar ane katurang baan ipetani.

28Malantaran cara buka keto kita masih lakar ngaturang aturan istimewa ane dadi druen Ida Sang Hyang Widi Wasa ane suba tampi kita uli bangsa Israele. Aturan ane istimewa pabuat Ida Sang Hyang Widi Wasa ene patut serahang kita teken Harun.

29Kita patut ngaturang pahan ane paling melah uli pantaran aturan ane tampi kita ento.

30Sasubane pahan ane paling melaha ento aturang kita, sisanne dadi juang kita buka ipetani nyuang sisan pamuponnyane, sasubane ia ngaturang aturan.

31Sisanne ento dadi daar kita ngajak kulawargan kitane, dijaja keneh kitane madaar, sawireh ento makadadi dedaaran kitane ngayah di Kemah Linggih Ida Sang Hyang Widi Wasa.

32Kita tusingja lakar pelih naar barange ento, yen kita suba ngaturang pahan ane paling melaha di ajeng Ida Sang Hyang Widi Wasa. Nanging eda pesan kita ngletehin aturan wong Israele ento malantaran naar sakancan ane katurang ento, satonden pahan ane paling melaha aturang kita. Yen kita mamurug titahe ento, kita lakar kena danda pati.”


  Share Facebook  |  Share Twitter

 <<  Bilangan 18 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran