Dual PanelPamah
1Puniki pangandikan Dane Musa, sane nikayang dane ring sawatek wong Israele duke wenten ring tegal melakang dangin Tukad Yordane, ring Lebak Yordane nampek ring kota Supe, ring pantaran kota Paran klawan kota Topel, Laban, Haserot miwah Di-Sahab.
2(Bangsa Israele mamargi saking Gunung Sinai, tumuli rauh ring Kades-Barnea, nglintangin Pagunungan Edom, wenten solas rahina suenipun mamargi.)
3Ring tanggal satu, sasih sane kaping solas, taun sane kaping petang dasa, sasampun bangsa Israele makaon saking Mesir, Dane Musa raris ngrauhang ring wong Israele saananing sane kapituduhang antuk Ida Sang Hyang Widi Wasa ring dane, buat miteketin wong Israele.
4Daweg punika Dane Musa sampun ngaonang Sang Prabu Sihon, ratun wong Amorine, sane malinggih ring Hesbon, miwah Sang Prabu Og, ratune ring panegara Basan, sane mrentah kota Astarot miwah Edrei.
5Irika Dane Musa ngawitin nlehtehang pituduh Ida Sang Hyang Widi Wasa punika, ring dangin Tukad Yordane, ring tanah Moab, sapuniki pangandikan danene:
6“Ida Sang Hyang Widi Wasa Widin iragane sampun masabda ring iraga ring Gunung Sinaine kadi asapuniki: ‘Suba makelo pesan kita nongos di gununge ene.
7Ane jani, kema embus kemah-kemah kitane, laut majalan ngungsi pagunungan wong Amorine, muah sig sawatek wewidangan di kiwa tengennyane di Lebak Yordane, di pagunungan, di bukit-bukite muah di lebak-lebak daerah ane bedelod, muah neked ka Segara Tengahe. Kema jani ka gumi Kanaane, tur ngliwat di Pagunungan Libanon ngantos neked di Tukad Eprate ane gede.
8Ulun ene Sang Hyang Widi Wasa suba nyanjiang gumine ento makejang teken leluur kitane Abraham, Ishak, Yakub, muah teken katurunannyane. Kemaja kita majalan tur nongosja di gumine ento.’”
Dane
9Dane Musa ngandika ring bangsa Israele sapuniki: “Daweg iraga kantun ring Gunung Sinai, tiang sampun mabaos ring parasemeton mungguing tanggung jawab mimpin semeton abot pisan pabuat tiang. Tiang tan mrasidayang ngamargiang indike punika newek.
10Ida Sang Hyang Widi Wasa, Widin semetone ngardi semeton kantos akeh pisan sakadi bintang ring langite.
11Dumadak Ida Sang Hyang Widi Wasa, Widin leluur parasemetone ngwuwuhin parasemeton ngantos tikel ping siu, tur nadosang semeton bangsa sane wibuh, sakadi sane sampun janjiang Ida marep ring semeton.
12Nanging kadi asapunapi jaga antuk tiang newek negen tanggung jawab sane abot, buat muputang sakancan wicaran parasemetone?
13Duaning punika, pilihja ring pantaran suku bangsan semetone anak lanang sane wicaksana, midep miwah sampun madue pangalaman. Tiang jaga ngamanggehang semeton punika dados pamimpin parasemetone.
14Parasemeton nagingin pinunas tiange punika.
15Duaning punika tiang sampun ngambil pamimpin sane wicaksana tur madue pangalaman sane sampun selik semeton saking pantaran suku bangsan semetone, tur tiang raris ngangkat ipun dados pamimpin parasemetone. Wenten sane dados pamimpin pasukan siu diri, pamimpin pasukan satus diri, pamimpin pasukan seket diri, pamimpin pasukan dasa diri. Sajaba punika tiang taler sampun ngangkat pamimpin buat ngapalain suku-suku bangsan semetone.
16Samaliha duk punika tiang mrentahang parapamimpin semetone kadi asapuniki: ‘Becikang nabdab wicara-wicara sane wenten ring pantaran bangsan semetone, tur tepasinja saha adil wicaran anake sane mawicara nglawan nyama-nyamaannyane, wiadin nglawan wong sunantara sane wenten ring pantaran semetone.
17Sajeroning nepasin wicara, sampunang semeton mapilih kasih. Asing-asing anak mangda katepasin antuk dasar sane pateh tur sampunang maminayang anak. Sampunang semeton ajerih ring sapasira jua, santukan tetepasan semetone punika rauhipun saking Ida Sang Hyang Widi Wasa. Yening wenten wicara sane kalintang abot pabuat semeton, patut semeton ngrauhang wicarane punika ring tiang, mangda tiang sane nepasin.’
18Rikala punika tiang sampun ngaturang pakeling ring parasemeton, ngeniang paindikan sane lian-lianan sane patut laksanayang semeton.”
Mata-
19“Sasampune punika iraga raris pada ngamargiang sapatitah Ida Sang Hyang Widi Wasa ring iraga. Iraga makaon saking Gunung Sinai, tur mamargi nglintangin tanah melakang sane linggah tur madurgama punika, tumuli ngungsi ka pagunungan wong Amorine. Rikala iraga rauh ring Kades-Barnea,
20tiang raris mabaos sapuniki: ‘Sane mangkin semeton sampun rauh ring pagunungan wong Amorine. Tanahe punika sane kapaicayang pabuat iraga antuk Ida Sang Hyang Widi Wasa, Widin iragane miwah Widi sane kasungsung antuk leluur iragane. Cingakinja, tanahe punika wenten irika. Rarisang mrika tur malinggih irika anut ring titah Ida Sang Hyang Widi Wasa. Sampunang semeton bimbang wiadin ajerih.’
21(1:20)
22Parasemeton sareng sami raris pada rauh ring tiang, sarwi mabaos kadi asapuniki: ‘Ngiringja iraga ngutus makudang-kudang anak ngriinin iraga, buat nyelehin jagate punika, mangda ipun raris ngwehin iraga gatra ngeniang margi sane pacang entap iraga, miwah kota-kota sane wenten irika.’
23Indike punika kamanah antuk tiang becik pisan. Duaning punika tiang raris milih anak roras diri, adiri saking asing-asing suku bangsane.
24Anake makaroras punika raris kesah tur mamargi ngungsi pagunungan, raris rauh ring Lebak Eskol, tumuli nyelehin jagate punika.
25Ipun sareng sami raris pada mawali ring iraga, tur makta woh-wohan sane keniang ipun irika. Samaliha, ipun taler makta gatra mungguing jagate sane kapaicayang antuk Ida Sang Hyang Widi Wasa ring iraga punika gemuh landuh.
26Nanging semeton sampun piwal ring titah Ida Sang Hyang Widi Wasa, Widin semetone malantaran nenten kayun lunga mrika.
27Parasemeton raris pada ngamigmig, sarwi mabaos sapuniki: ‘Ida Sang Hyang Widi Wasa bendu teken iraga. Ida ngajak iraga makaad uli tanah Mesir, tur iraga serahang Ida sig wong Amorine, apanga matianga.
28Apa lakar alih kema, iraga suba jejeh pesan. Nyama-nyamaan iragane ane utus iraga suba ngorahang teken iraga, mungguing bangsane ane ditu sitengan tur prawiraan teken iraga, tur kota-kota ane tongosina mabenteng tegeh kanti nganteg ka langite. Ia suba pada ningalin raksasa ditu.’
29Daweg punika tiang matur ring parasemeton, sapuniki: ‘Sampunangja ajerih ring jadmane punika!
30Ida Sang Hyang Widi Wasa Widin parasemetone, sane mamargi ring ajeng parasemetone, Ida pacang mayuda pabuat parasemetone, sakadi sane sampun aksi semeton ring Mesir,
31miwah ring tegal melakange. Semeton sampun ngaksi mungguing Ida Sang Hyang Widi Wasa, Widin parasemetone sampun nuntun semeton ring margi kantos prasida rahayu rauh ring genahe puniki, tan bina kadi ibapa ngandong pianaknyane.’
32Nanging yadiastun tiang sampun mabaos kadi asapunika, durung taler semeton pracaya ring Ida Sang Hyang Widi Wasa.
33Ida tansah ngriinin semeton buat ngrereh genah makemah. Ida mamargi ngriinin semeton malantaran saka geni rikalaning wengi, tur antuk saka ambun rikalaning rahina, buat mitujuhin semeton margi.”
Ida S
34“Ida Sang Hyang Widi Wasa mireng pakrimik parasemetone, mawinan Ida raris duka pisan. Ida tumuli masumpah asapuniki:
35‘Aukudko uli pantaran jlemane ane jaat ene tusing lakar ngentap gumi ane suba janjiang Ulun teken leluur kitane.
36Tuah Kaleb pianak Yepune ene ane lakar ngentap tanahe ento, sawireh ia tetep satia teken Ulun. Kaleb muah katurunannyane lakar icen Ulun gumine ane suba entasina ento.’
37Ulihan semeton, Ida Sang Hyang Widi Wasa taler sampun duka ring tiang, tur Ida masabda sapuniki: ‘Kita Musa, kita masih tusing lakar ngentap gumine ento.
38Nanging entegangja keneh Yosua pianak Nune parekan kitane ento. Ia ane lakar mimpin bangsa Israele buat ngaug gumine ento.’
39Sasampun punika Ida Sang Hyang Widi Wasa raris masabda ring iraga sareng sami kadi asapuniki: ‘Pianak-pianak kitane ane enu cenik-cenik buina ane tonden nawang lepas beneh, ane orahang kita lakar kajarah baan musuh-musuh kitane, ia ane lakar icen Ulun tanahe ento, tur ia ajaka makejang lakar nongos ditu.
40Nanging kita ajak makejang, kemaja malipetan ka tanah melakange ngentasin jalane ane ngungsi Teluk Akabane.’
41Semeton tumuli masaur sapuniki: ‘Semeton Musa, tiang sareng sami sampun madosa ring Ida Sang Hyang Widi Wasa. Nanging sane mangkin tiang sareng sami jaga mayuda sakadi sane katitahang antuk Ida Sang Hyang Widi Wasa, Widin iragane.’ Semeton suang-suang tumuli sayaga jaga mayuda tur semeton marasa elah jaga ngebug gumi sane mabukit-bukit punika.
42Nanging Ida Sang Hyang Widi Wasa raris masabda ring tiang kadi asapuniki: ‘Eda baanga ia maperang, sawireh Ulun lakar tusing ngiangin ia, tur ia lakar kakalahang baan musuhnyane.’
43Tiang sampun ngrauhang sabdan Ida Sang Hyang Widi Wasa ring semeton, nanging semeton sareng sami nenten nglinguang. Semeton sareng sami raris brontak ring Ida Sang Hyang Widi Wasa, tur maduluran manah sane sumbung semeton raris ngungsi gumine sane wenten ring pagunungan punika.
44Wong Amorine sane nongos ring pagunungan punika raris medal nglawan semeton. Ipun sareng sami akeh pisan sakadi nyawane asebun. Ipun raris nguber parasemeton ngantos rauh ring Horma, tur ngaonang semeton irika ring Pagunungan Edom.
45Sasampune punika semeton raris pagelur nunas ica ring Ida Sang Hyang Widi Wasa, nanging Ida nenten kayun mireng wiadin nglinguang semeton.
46Sasampun punika iraga raris masandekan ring Kades kantos sue pisan.”