Dual PanelIndik
1“Luihangja Ida Sang Hyang Widi Wasa, Widin semetone, malantaran semeton Marerainan Paskah di nuju bulan Abibe, santukan ring bulan Abib punika, rikalaning wengi, Ida sampun mebasang semeton saking tanah Mesir.
2Rarisangja ka genah pangubaktine, tur tampahja irika salah tunggal biri-biri wiadin banteng semetone anggen ajeng-ajengan sajeroning Rerainan Paskahe, buat ngluihang Ida Sang Hyang Widi Wasa, Widin semetone.
3Rikalaning semeton ngajengang ajeng-ajengane punika, sampunang semeton ngajengang roti sane maragi. Pitung rahina suenipun semeton patut ngajengang roti sane tan paragi, sakadi sane sampun margiang semeton ritatkala semeton gegison kesah saking jagat Mesir. Ajengangja rotine punika sane pacang kawastanin roti kasangsaran, mangdane sapanjang umur semetone, semeton jaga eling ring rahina rikala semeton rarud saking tanah Mesir, jagat genah semetone nandang sangsara.
4Sajeroning pitung rahina ring sakuub wewidangan panegaran semetone sampunangja wenten anak sane nyepel ragi ring umahnyane. Samaliha ulam wewalungan sane katampah rikalaning sore rahinane sane kaping pisan, patut kajengang ring wengine punika, tan dados kantun kantos rauh benjang semengannyane.
5Tampahja wewalungan pabuat Rerainan Paskahe punika ring genah pangubaktine sane asiki punika, tur sampunang ring genahe sane lianan, ring wewidangan jagat sane kapaicayang ring semeton antuk Ida Sang Hyang Widi Wasa, Widin semetone. Tampahja wewalungane punika rikala surup suryane, ring dauh wengi, sakadi daweg semetone makaon saking Mesir.
6(16:5)
7Lablabja ulame punika raris ajengang ring genah pangubaktine sane asiki punika tur benjang semengan rarisang semeton budal.
8Sajeroning nem rahina ngawit saking rahinane punika semeton patut ngajengang roti sane nenten madaging ragi, tur ring rahinane sane kaping pitu, semeton patut mapunduh mabakti ring ayun Ida Sang Hyang Widi Wasa, Widin semetone, samaliha sampunang ngambil karya ring rahinane punika.”
Rerai
9“Ngawit saking semeton ngampung gandum, wilangja pitung uku suenipun.
10Ring uku sane kaping pitu punika, wentenangja Rerainan Unduh-unduh, buat ngluihang Ida Sang Hyang Widi Wasa, Widin semetone. Ring rerainane punika semeton patut saking suka lila, ngaturang aturan ring ayun Idane, satinut ring merta sane sampun paicayang Ida ring semeton.
11Pada masuka renaja ring ayun Ida Sang Hyang Widi Wasa, sinarengan ring oka-okan semetone, parekan miwah panyeroan semetone, miwah suku Lewi, wong sunantara, soroh anake ubuh-ubuh miwah balu-balune sane wenten ring kotan semetone.
12Elingangja mangda semeton ninutin pituduh-pituduh puniki, sampunang lali mungguing sane riin semeton pecak dados panjak ring Mesir.”
Rerai
13“Sasampune semeton puput nyosoh gandum miwah meres woh anggur semetone makasami, rarisangja ngwentenang Rerainan Pondok Daun, pitung rahina suenipun.
14Ring rerainane punika semeton sareng sami patut masuka rena sinarengan ring oka-okan semetone, parekan miwah panyeroan semetone, miwah suku Lewi, wong sunantara, soroh anak ubuh-ubuh, miwah anake balu-balu sane wenten ring kotan semetone.
15Luihangja Ida Sang Hyang Widi Wasa, Widin semetone, masrana semeton ngluihang rerainan punika pitung rahina suenipun, ring genah pangubaktine sane asiki punika. Pada maliang-liangja semeton santukan Ida Sang Hyang Widi Wasa sampun ngamertanin pamupon miwah pakaryan semetone.
16Sawatek anak lanang bangsa Israel patut rauh ngaturang bakti ring ayun Ida Sang Hyang Widi Wasa ping tiga ataun, ring genah pangubaktine inggih punika ring Rerainan Paskahe, ring Rerainan Unduh-unduhe, miwah ring Rerainan Pondok Daune. Asing-asing anak patut makta aturan,
17amunapija ipun nyidayang satinut ring merta sane sampun kapaicayang ring ipun antuk Ida Sang Hyang Widi Wasa, Widin semetone.”
Indik
18“Ring sabilang kota sane kapaicayang ring semeton antuk Ida Sang Hyang Widi Wasa, Widin semetone, semeton patut ngadegang hakim miwah pamrentah sane lianan. Anake sane kadegang punika patut nepasin rakyate saha adil.
19Sampunangja ipun tan adil wiadin pilih kasih sajeroning ipun nibakang tetepasan samaliha ipun tan dados nampi tetombokan. Santukan tetombokan punika ngawinang anake buta, yadian anake punika wicaksana wiadin jujur tur ngawinang ipun nibakang tetepasan sane iwang.
20Semeton patut tansah jujur tur adil, mangdane semeton mrasidayang ngaug tanah sane kapaicayang ring semeton antuk Ida Sang Hyang Widi Wasa, Widin semetone, tur semeton pacang nutugang tuuh irika.
21Yening semeton ngwangun pamorboran aturan pabuat Ida Sang Hyang Widi Wasa, Widin semetone, sampunang semeton ngenahang arca taru Dewi Asera ring samping pamorboran aturane punika.
22Samaliha sampunang semeton ngwangun tugu panyungsungan pabuat widi-widi sane lianan, santukan Ida Sang Hyang Widi Wasa bendu ring paindikane kadi asapunika.