Dual PanelRamal
1Ring tanggal roras, sasih sane kaping dasa miwah taun sane kaping dasa sajeroning tiang maselong, Ida Sang Hyang Widi Wasa tumuli masabda ring tiang, sapuniki:
2“Ih manusa, uman-umanja ratune di Mesir. Orahang teken ia, unduk iane muah sakuub gumi Mesire lakar kasisipang.
3Orahang sabdan Ulun Sang Hyang Widi Wasa Sang Maha Luur, ane tumiba teken ratune di Mesir kene: Ulun ene musuh kitane, ih kita buaya gede ane medem di tukade. Kita ngorahang mungguing Tukad Nile ento gelah kitane muah kita ane ngae tukade ento.
4Ulun lakar nyangket cadik kitane, tur ngawanang bene ane di tukad kitane pada neket sig awak kitane. Sasubane keto Ulun lakar nengteng kita pesu uli Tukad Nile, ngajak sakancan bene ane neket sig awak kitane.
5Ulun lakar ngentungang kita muah sakancan bene ento ka tegal melakange. Awak kitane lakar ulung di tanahe tur lakar kadepin ditu tusing murugan. Ulun lakar maicayang awak kitane dadi amah-amahan kedis muah sato.
6Sasubane keto sakancan wong Mesire lakar nawang mungguing Ulun ene Ida Sang Hyang Widi Wasa.” Ida Sang Hyang Widi Wasa ngandika, sapuniki: “Wong Israele nylelegang ibanne buat ngidih bantuan sig kitane wong Mesir, nanging kita tan bina buka tungkede ane lemet.
7Dikalan iane nyleleg sig kitane, kita laut lung tur natunin palannyane, tur ngawanang tundunnyane lih.
8Sawireh keto, ane jani Ulun Sang Hyang Widi Wasa Sang Maha Luur ngandika teken kita, mungguing Ulun lakar nekaang jlema buat nyiatin kita aji pedang, tur anake ento lakar ngamatiang jlema muah buron kitane.
9Gumi Mesire lakar dadi uug-uugan ane suung mangmung. Ditu kita lakar nawang mungguing Ulun ene Ida Sang Hyang Widi Wasa. Sawireh kita ngorahang, mungguing Tukad Nile ento gelah kitane tur kita ane ngae,
10dadinne Ulun ane dadi musuh kitane muah musuh Tukad Nil kitane. Ulun lakar nadiang sakuub gumi Mesire ento dadi uug-uugan ane suung mangmung, ngawit uli kota Migdole bedaja nganti teked ka kota Aswan ane bedelod, muah sakancan rurunge ane ngungsi ka tepi siring gumi Sudane.
11Tusing ada jlema wiadin buron ane lakar mentas ditu. Petang dasa taun makelonne tusing ada anak ane lakar nongos ditu.
12Ulun lakar nadiang gumi Mesire gumi ane paling suung mangmunga di gumine. Petang dasa taun makelonne kota-kota di gumi Mesire lakar enu suung, uugan teken kota-kotane ane lenan. Wong Mesire lakar dadiang Ulun pangungsi. Ia lakar pada jerih ngungsi di sakancan gumine tur nongos di pantaran bangsa-bangsane ane lenan.”
13Ida Sang Hyang Widi Wasa Sane Maha Luur ngandika sapuniki: “Sasubane petang dasa taun, Ulun lakar ngamulihan wong Mesire uli di pantaran bangsa-bangsane tongos Ulune laad nyambehang ia,
14tur Ulun lakar nglugrain ia nongos di Mesir sisi kelodne, sig umahnyane ane jati mula. Ditu ia lakar dadi kaprabon ane lemet,
15kaprabon ane paling lemeta, tur ia tusing taen buin lakar mrentah bangsa-bangsa ane lenan. Ulun lakar nadiang ia tan paji, kanti ia tusing lakar nyidayang mrentah bangsa-bangsane ane lenan buat nuutang pepinehne.
16Wong Israele tusing enu buin nyagerang pitulungannyane. Unduk gumi Mesire ento lakar dadi painget buat wong Israele, kenken pelihne ia nyleleg sig wong Mesire ento. Ditu wong Israele lakar nawang mungguing Ulun ene Ida Sang Hyang Widi Wasa Sang Maha Luur.”
Ida S
17Ring tanggal apisan, sasih sane kaping pisan, taun sane kaping pitulikur sajeroning tiang maselong, Ida Sang Hyang Widi Wasa ngandika ring tiang sapuniki:
18“Ih manusa, Sang Prabu Nebukadnesar, ratune di Babel magegebug ka Tirus. Ia mrentahang prajurite negen barang ane baat pesan kanti tendasne pada lengar tur palannyane pada koplar. Nanging katuyuhan sang prabu muah wadua balannyane ento tusing mapikolih apa-apaan.
19Sawireh keto ane jani kene sabdan Ulun Sang Hyang Widi Wasa Sang Maha Luur: Ulun lakar maicayang gumi Mesire teken Sang Prabu Nebukadnesar. Ia lakar nyarah tur ngrampas gumine ento, tur ia lakar nyuang sakancan kasugihan gumi Mesire, buat anggona upah wadua balannyane.
20Ulun maicayang gumi Mesire teken ia, makadadi upah ayah-ayahannyane sawireh wadua balannyane suba ngayah teken Ulun. Ulun Ida Sang Hyang Widi Wasa Sang Maha Luur, suba ngandika buka keto.
21Yen paundukane ento suba kasidan, Ulun lakar ngawanang wong Israele dadi kukuh bakuh, tur lakar nglugrain kita Yeheskiel ngraos, tur sakancan anake lakar madingehang raos kitane apanga ia nawang mungguing Ulun ene Ida Sang Hyang Widi Wasa.”