Dual PanelIda S
1Ida Sang Hyang Widi Wasa malih ngandika sapuniki:
2“Ih manusa, ngramal muah warah-warahangja sabdan Ulun Sang Hyang Widi Wasa Sang Maha Luur. Kita patut ngwarah-warahang sabdane ene: Dina ane ngresresin suba teka.
3Dinane ento suba paek, nah ento panemayan Ida Sang Hyang Widi Wasa lakar malaksana. Dina ane peteng dedet muah keweh pabuat bangsa-bangsane.
4Lakar ada perang di Mesir muah kakewehan ane gede di Sudan. Di Mesir liu anak lakar kamatiang. Gumine lakar karampas tur lakar kadepinin uug.
5Perange ento masih lakar ngamatiang prajurit-prajurit ane sewana uli Sudan, Lidia, Libia, Arab, Kub muah uli pantaran kaulan Ulune.”
6Ida Sang Hyang Widi Wasa ngandika sapuniki: “Ngawit uli Migdol ane bedaja kanti neked di Aswan ane bedelod, sakancan ane nindihin gumi Mesire lakar mati di pasiatan. Wadua balan Mesire ane sumbung lakar kasirnayang. Keto sabdan Ulun Sang Hyang Widi Wasa Sang Maha Luur.
7Gumine ento lakar dadi gumi ane paling suung mangmung di gumine, tur kota-kotannyane lakar kadepinin uug maglaturan.
8Dikalan Ulune nedunang api ka gumi Mesire muah sakancan ane nindihin ia pada mati, ditu ia lakar nawang mungguing Ulun ene Ida Sang Hyang Widi Wasa.
9Dikalan teka panemayannyane ento, tur Mesire kasirnayang, Ulun lakar ngutus utusan malayar buat nundung wong Sudane ane tusing sumangsaya, tur ia lakar pada tengkejut. Dinane ento lakar teka.”
10Ida Sang Hyang Widi Wasa Sane Maha Luur ngandika sapuniki: “Ulun lakar mrabotang Sang Prabu Nebukadnesar ratune di Babel buat nelahang kasugihan gumi Mesire.
11Ia muah wadua balannyane ane angkara murka lakar teka tur ngusakang gumine ento. Ia lakar pada ngebug gumi Mesire aji pedang tur gumine ento lakar bek aji bangken jlema.
12Ulun lakar ngenyatang Tukad Nile, tur nyerahang gumi Mesire sig kakuasan jlemane ane jaat. Wong sunantarane lakar ngusakang sakuub gumi Mesire. Ulun Sang Hyang Widi Wasa suba masabda buka keto.”
13Ida Sang Hyang Widi Wasa Sane Maha Luur ngandika sapuniki: “Ulun lakar nyirnayang arca-arcane muah widi-widine ane palsu di Mempis. Tusing ada anak ane enu mrentah gumi Mesire, tur Ulun lakar nengkejutang rakyate makejang.
14Gumi Mesir sisi kelod lakar dadiang Ulun suung mangmung, tur Ulun lakar nedunang api sig kota Soane ane bedaja. Ulun lakar nyisipang ibukota Tebese.
15Ulun lakar nglugrain kota Pelusiume benteng Mesire ane gede ngrasayang pidukan Ulune. Ulun lakar nyirnayang kasugihan kota Tebese.
16Ulun lakar nedunang api sig gumi Mesire, tur kota Pelusiume lakar nandang sangsara. Tembok-tembok kota Tebese lakar bah, tur kotane ento lakar katempuh baan blabar.
17Paratrunane di kota Heliopolis muah Bubastis lakar mati di pasiatan muah rakyate ane lenan lakar kejuk kanggon tawanan.
18Peteng dedet lakar nibenin Tahpanhes dikalan Ulune ngalahang kakuasan Mesire muah nelahang kakuasan ane sumbunganga. Guleme lakar nglikub gumi Mesire, tur rakyat sakancan kotannyane lakar katawan.
19Dikalan Ulune nyisipang gumi Mesire buka kene, ditu ia lakar nawang mungguing Ulun ene Sang Hyang Widi Wasa.”
Kawis
20Ring tanggal pitu sasih sane kaping pisan, taun sane kaping solas, sajeroning tiang maselong, Ida Sang Hyang Widi Wasa ngandika ring tiang sapuniki:
21“Ih manusa, Ulun suba ngelung liman prabu Mesire. Tusing ada anak ane medbed wiadin nabehin apanga ia sida seger tur kereng buin buat ngisi pedang.
22Sawireh keto, ane jani kene sabdan Ulun Sang Hyang Widi Wasa Sang Maha Luur: Ulun ene musuh raja Mesire. Ulun lakar ngelung limannyane dadua, nah ento limanne ane enu seger ane buin aneh. Ditu pedangne lakar ulung uli di limanne.
23Ulun lakar nyambehang wong Mesire di sakuub gumine.
24Sasubane keto Ulun lakar nguatang liman raja Babele tur nyerahang pedang Ulune sig limannyane. Nanging Ulun lakar ngelung liman raja Mesire, tur ia lakar duuh-duuh tur mati di arepan musuhne.
25Ulun lakar ngawanang ia lemet nanging nguatang raja Babele. Dikalan Ulune maicayang pedang Ulune teken ia, tur ia ngamengang pedange ento marep ka Mesir, makejang anake pada nawang, mungguing Ulun ene Sang Hyang Widi Wasa.
26Ulun lakar nyambehang wong Mesire ka sakuub gumine. Ditu ia lakar nawang, mungguing Ulun ene Sang Hyang Widi Wasa.”