Dual PanelPanga
1Ida Sang Hyang Widi Wasa ngandika ring tiang sapuniki:
2“Ih manusa, uman-umanja parapamrentah Israele. Ramalangja ia, tur orahang teken ia sabdan Ulun Sang Hyang Widi Wasa Sang Maha Luur ane katiba teken ia kene: Ih kita parapangangon bangsa Israele, sengkala kita. Kita tuah ngitungang dewek kitane dogen, nanging tusing taen ngitungang biri-birine.
3Kita nginum susunnyane, ngae panganggo aji bulunnyane, tur nampah laut ngamah ben biri-birine ane paling melaha. Nanging kita tusing taen ngrunguang biri-birine ento.
4Kita suba tusing rungu teken ane lemet, tusing ngubadin ane gelem, tusing medbed tatun biri-birine ane matatu, tusing ngalih tur ngajak mulih biri-biri ane paling tur kasasar wiadin nyerepang ane ilang. Nanging tungkalikannyane kita makeneh nyapa kadi aku marep teken biri-birine ento.
5Sawireh biri-birine ento tusing ngelah pangangon, dadinne ia pada sambrag tur kasarap baan satone galak.
6Aketo biri-birin Ulune ngumbara di bukit-bukite ane tegeh muah di gunung-gununge. Ia pada sambeh di sakuub mrecapadane, tur tusing ada anak ane ngrunguang wiadin ngalih ia.
7Ane jani, ih kita parapangangon, padingehangja sabdan Ulun Sang Hyang Widi Wasa, ane katiba teken kita.
8Sawireh Ulun ene Widi ane jumeneng langgeng, kita patut madingehang sabdan Ulune apang melah. Biri-birin Ulune ubera baan sato-satone galak laut matianga tur amaha, sawireh tusing ada pangangonnyane. Pangangon Ulune tusing nyak ngalih biri-birine ento. Ia tuah pada ngrunguang dewekne padidi dogen, tur tusing rungu teken biri-birine ento.
9Sawireh keto ih parapangangon biri-birine, padingehangja sabdan Ulune.
10Ulun ene Sang Hyang Widi Wasa Sang Maha Luur, jani Ulun ngandika teken kita mungguing Ulun ene musuh kitane. Ulun lakar mancut biri-birin Ulune uli sig kitane, tur tusing lakar buin nglugrain kita dadi pangangonnyane. Ulun tusing lakar buin nglugrain kita tuah ngitungang dewek kitane dogen. Ulun lakar ngrahayuang biri-birin Ulune uli sig kitane, tur tusing nglugrain kita ngamah biri-birine ento.”
Panga
11“Ulun Ida Sang Hyang Widi Wasa Sang Maha Luur, ngorahin kita, mungguing Ulun ngraga ane lakar ngrunguang tur miara biri-birine ento.
12Patuh buka pangangone miara biri-birinnyane ane sambeh pablesat, laut buin punduhanga. Ulun lakar ngamulihang biri-birine ento uli di sakancan tongosnyane sambeh pablesat dugas dinane ane peteng dedet ento.
13Ulun lakar mesuang ia uli gumi sunantarane, tur munduhang ia, tur ngamulihang ia ka guminnyane suang-suang. Ulun lakar nuntun ia mulih ka gunung-gunung muah tukad-tukad Israele, tur lakar ngangonang ia di tegal pangonane ane lumlum.
14Ulun lakar nglugrain ia ngamah padang saha rahayu di tegal pangonane di gunung muah di pangonane ane padangne lumlum di tanah Israel.
15Ulun ngraga ane lakar dadi pangangon biri-birin Ulune, tur Ulun lakar ngalihang ia tongos masayuban. Ulun Sang Hyang Widi Wasa Sang Maha Luur ane suba masabda buka keto.
16Ulun lakar nyerepang biri-birine ane ilang, tur ngamulihang ane paling kasasar, medbed tatunne ane matatu muah ngubadin ane gelem. Nanging ane mokoh siteng ento lakar sirnayang Ulun, sawireh Ulun ene pangangon ane nyalanang paundukan ane patut.
17Sawireh keto ane jani, ih biri-biri ingon-ingon Ulune! Ulun Sang Hyang Widi Wasa Sang Maha Luur, ngorahin kita, mungguing Ulun lakar nepasin kita suang-suang tur nganehang ane melah uli ane jele, nganehang biri-biri klawan kambinge.
18Ada makudang-kudang di pantaran kitane ane tusing lega kenehne ngamah padang ane paling melaha. Malahan kita nyekjek padang ane tusing amah kita. Kita nginem yeh ening tur ngubek yehe ane tusing inem kita.
19Dadinne biri-birin Ulune ane lenan laut ngamah padang ane jekjek kita muah nginem yeh ane ubek kita ento.
20Sawireh keto ane jani Ulun Sang Hyang Widi Wasa Sang Maha Luur ngorahin kita, mungguing Ulun lakar nepasin biri-birine ane siteng klawan biri-birine ane lemet.
21Kita nyeeg biri-biri ane sakit ka sisi laut senggot kita pesu uli pepunduhannyane.
22Nanging Ulun lakar ngrahayuang biri-birin Ulune, tur tusing nglugrain ia buin kasangsarain. Ulun lakar nepasin asing-asing biri-birin Ulune, tur nganehang ane melah klawan ane jele.
23Ulun lakar ngicen ia ratu adiri ane buka parekan Ulune Daud, buat dadi pangangonnyane, tur pangangone ento lakar matiningin biri-birine ento.
24Ulun Sang Hyang Widi Wasa lakar dadi Widinnyane muah sang ratu ane buka parekan Ulune Daud lakar dadi pamrentahnyane. Keto sabdan Ulune.
25Ulun lakar ngardi pasubaya ngajak ia, nah ento prajanjian ane ngamanggehang karahayuannyane. Ulun lakar ngaadang sakancan satone ane galak-galak uli di gumine ento, apanga biri-birin Ulune prasida nongos saha rahayu di pategalan muah medem di alas-alase.
26Ulun lakar ngamertanin ia tur nglugrain ia nongos di ilehan bukit Ulune ane suci. Ditu Ulun lakar ngamertanin ia aji ujan bales, dikalane ia merluang ujan.
27Punyan kayune lakar pada mabuah. Pategalane lakar pada mupu gandum, tur asing-asing anak lakar pada nongos saha rahayu di tanahnyane suang-suang. Dikalan Ulune megat anten kaulan Ulune, tur mebasang ia uli sig anake ane nganggon ia panjak, ditu ia lakar pada nawang mungguing Ulun ene Sang Hyang Widi Wasa.
28Bangsa-bangsa kapire tusing buin lakar ngrampas ia muah satone galak-galak tusing buin lakar ngamatiang tur nyarap ia. Ia lakar pada idup saha muponin rahayu, tur tusing ada anak ane lakar matakutin ia.
29Ulun lakar ngicen ia pategalan ane mokoh, tur Ulun nyuudang sayahe di gumine ento. Bangsa-bangsane ane lenan tusing enu buin ngadesemin ia.
30Asing-asing anake lakar nawang, mungguing Ulun nyayubin Israel, tur ia dadi kaulan Ulune. Ulun Sang Hyang Widi Wasa Sang Maha Luur ane masabda buka keto.
31Ih biri-birin Ulune, ingon-ingon ane angonang Ulun, kita dadi kaulan Ulune muah Ulun dadi Widin kitane.” Sapunika sabdan Ida Sang Hyang Widi Wasa Sane Maha Luur.