Alkitab Mobile SABDA
[VER] : [BERIK]     [PL]  [PB] 
 <<  Matius 15 >> 

1Jepga angtane safna Farisimana afwenefener ane guru-guru Hukumu Nabi Musa aa jes tulistababilim aa jei ne towas-towastababuwenaram jei mese, jei Yesusminip ga aa ge jalbili kota Yerusalemwer, ga aane tenebana,

2"Jeje bafa angtane Aamei Is jei ne tikwebaatinennerem, osiri asal-asala nemna aa jes ne towastababilim jeiserem jei jam naaweyan? Jemna tafna jam ne wirtabaabiyen gwanan jam twenabe!"

3Yesus ga tamawola, "Jeje bafa aamei Uwa Sanbagiri aa jes balbabilirim ijama onsobaabiyen, jengga osiri asal-asal ilemanaiserem ga jes isa onsobili?

4Uwa Sanbagiri aa gul, 'Aamei ga waakenfer isa nwini iye yo uwa jebar.' Ane Jei gamjon aa gul, 'Tanna iye yo uwa kabwakfer aa jei gam gitminirim, tane jeiserem ga sene tamtamtana jamer futu.'

5Jengga aamei syefer ga enggam ima towas-towastababili: Angtane afa ene afa jeta jam gam gitminirim enggame, 'Apgal jigala ip is ajes golmiliserem ibe, ai apgal jigala jeiserem ames gulbana Uwa Sanbagirfe.',

6afa angtane jes gemerserem gam gitmini, aamei syefer gane towas-towastababili enggame, angtane jeiserem jei safnant ene yo jeta gamjon jam teteyan. Aamei gam ijewera towas-towastababilirim, aamei osiri fwatermana asal-asala ilemanaiserem ga jetefener ima towas-towastababili, ane Taterisi Uwa Sanbagirmana ga ijama firulbaanuwili.

7Aameiba angtane akar-akarem ijeya gwenaram! Nabi Yesaya bunarsusfer enggam mesam nasbil im temawer:

8'Uwa Sanbagiri Jei enggam gunu, anggwabura aaiserem Ase aarememfener gane gaartena, jengga ini jemna bijua Amniwer.

9Jei Ai As jewer ne pujitenerem, jam sege elbesini, aam temawer taterisi jei aa jes ne towas-towastababuwenaram, jei enggam ne balbabili taterisi jeiserem ga Amna, jengga taterisi jeiserem Amanyan, taterisi jeiserem jei angtanemana.'"

10Jepga Yesus ga angtane unggwanfer jeiserem ga jenbebili Jemnip ge jalbife. Jei enggam ga balbabili, "As imsa sarbasi, waakenfer ga isa sarbisini!

11Tumilgala angtane aa jes gane tumilirim, jeiserem jeme je angtane jam kabwaktayan. Fas, jengga ula kapka aaremawer totinyeleiserem, angtane ga jei gam kabwaktana."

12Jewer ga angtane Jei aa jei ne tikwebaatinennerem ga aa ge jalbili Jemnibe, ane ga aane tenebana, "Aamke tousa Aamei Ijes bilirim, taterisi jeiserem jeme ini angtane safna Farisimana je enggam ge folbamini Aamei Is jam ne nasbala gamserem?"

13Yesus ga tamawolbaabili, "Nanansi seyafter Uwa Amna taman waaken-girip jam tonolyenaiserem, galap gase mulstesa tisakarabaner.

14Angtane safna Farisimana, jei safnant ijama sarbabiyen! Jei angtane nwe kofa gemerserem. Afa angtane nwe kofa jei angtane nwe kofa nafsi jam gam tebasfelerem, nawersamer ga gangge janton o mwonabe."

15Petrus ga gunu, "Seisya taterisi jeiserem jem igiserem as nasipmi."

16Yesus ga balbabili, "Aamke gemerje ijama saryan?

17Aamei imsa towaswebili, tumilgala angtane aa jes gam tumilirim, tumilgala jeiserem ga witifinip gam kawetena, ane unu gamserem ga gam nana witifiniwer.

18Jengga ula kapka aaremawer totinyeleiserem ga iniwer gam tawetya, jeiserem angtane ga jei gam kabwaktana.

19Angtanem iniwer taweyalaiserem ga enggala aas galserem: ula kapka angtane gemer aa jei gam gunurum jelem inibe; angtanes munbof; maaryens gam gwebili; angtane naura jei wini anggwayanaiserem jebar makanap gangge dorwena; apgal jigala jam komkomulsiliserem; angtane aa jei gam afaf-afaftababilirim angtane nafsi jem temawer; syefer nasowelaiserem angtane nafsi jem temawer.

20Jeiserem angtane je gane kabwaktana; jengga gam ke tafa kabwakmer twenaiserem. Wowo, jeme angtane jam kabwaktayan."

21Yesus ane angtane Jei aa jei ne tikwebaatinennerem tamna jeiserem ga aane mirsotefala, ane ga aa ge sofobili ona kota Tirus ane Sidon jem gwetmanabe.

22Kanan wini jep aa jei nwinirim ona jeiserem jebe, jei Yesusminip ga aa jela, ane ga gwarna, "Uwa, Tane Raja Daudmana, as nesikul! Tane yafma amna bwat kapka aa jei kabwilirim, jei bwerasusu."

23Yesus Jei ula daamfenna afa Jam tamawolbiyen. Ane angtane Jei aa jei ne tikwebaatinennerem ga aa ge jalbili Jemnibe, jei ga Yesus ga aane balbalwena enggame, "Aamei wini aaiserem se bil jam ge sofwe. Jei ga as onsobaabili, jei gemer gwaren-gwarenwena!"

24Yesus ga tamawolbaabili, "Uwa Sanbagiri Ams baftana angtane Israelmanaiserem jem temawenefener, jeke angtane Israelmanyan. Angtane Israelmana jei Uwa Sanbagiri mes ne bijautana, dombana jam mumalwela gamserem."

25Jepga wini jeiserem ga jela Yesusminibe, somwan dumem ga nwintena jam sembataf, ane ga bala, "Uwa, as batobi!"

26Yesus ga tamawola, "Gwanan tane unu jei ge folbami. Gam jam naaweyan, tumilgala tanemana ga gwalaf gane fasawolmini." (Taterisi jeiserem jem igiserem ga enggam, Yesus Jei nabala angtane Israelmanaiserem ga jes batobaabili, angtane Israelmanyanaiserem jei ga amnup.)

27Wini jeiserem ga tamawola, "Uwa bunar, jengga tumilgala tomna uwamana aa je ge janbityerem mejanawer, gwalna tumilgala jeiserem ga jes ne tombaabili."

28Jepga Yesus ga tamawola, "Wi, aamei uskambar As im tebana. Aamei ijes bilirim, mes etamwena." Ane jes jeberserem tane yafma jemna ga mes waakenswebili.

29Yesus ona jeiserem ga mirsotefala, Fobogana Galileya jem eistamer ga gwina. Ga tauna otumube, jep ga nwini.

30Angtane unggwanfersus ga aa ge forobitye Jemnibe, gane aftabiyele angtane jam wofeyana, angtane nwe kofa, angtane muli-mulniserem, angtane jam nasouyanaiserem, ane angtane unggwanfersus bwernabara nafis-nafsiserem aa jemanem ge folbaminirim jes mese. Jei angtane jeiserem gane bunulntena Yesusem tarnabe, ane Yesus seyafter ga waakentababili.

31Angtane ga aa ge bitbitwebili jame aa galap ne damtabilirim angtane gwanan jam ge nasbaweyanaiserem, jei mes ge nasbawena; angtane muli-mulni, jei mes ge waakenswebili; angtane wofeyana, jei mes ge wofebili; angtane nwe kofa, jei mes ge anggabisini. Ane jei ga Uwa Sanbagiri Israelmana ga aane pujitene.

32Jepga Yesus ga angtane Jei aa jei ne tikwebaatinennerem ga aa jenbebili Jemnip jam ge jalbife. Ane ga balbabili, "Ini Amna uskambar nesiktababili angtane aaiserem aa jei ge betwebilirim, aam temawer jei Abar Aya nwinirim nunu ga nawer-ningna, ane jemna tumilgala ga bar. Ajam balbabiyen jei wismer ge sofobife, tifni nelep galap sege werenswebamini."

33Angtane aa jei ne tikwebaatinennerem Yesus ga aane tenebana, "Ga fomfom nei tumilgala ga nesa terelbili ona tamanfennabe, jega angtane unu ga sege bugufswebamini?"

34Yesus ga tenebaabili, "Rotini imnibe fomera?" Ane angtane Jei aa jei ne tikwebaatinennerem ga aane tamawolbana, "Rotini amnibe tuju, ane jigala bastantowaifer ane bastantouya."

35Yesus ga angtane unggwanfer jep gemerserem ga aa balbabili, "Onnap sa nwinte!"

36Ane Yesus ga tuju rotini jeiserem, jigal mese ga aa tebabili, ane Uwa Sanbagiri ga bala, "Ase samfer gulbana." Ane ga aa bitabaabisini, ane ga kitulmini angtane Jei aa jei ne tikwebaatinennerem jebe. Jewer ga gamjon ga aane kitulmini angtane unggwanfer jeiserem jebe.

37Jepga seyafter ga aa dwena jamer unubugufsus. Ane angtane Yesus aa jei ne tikwebaatinennerem gamjon ga tomna bitbiti ga aane dupdupbulu, burnabara ga tuju.

38Anggwana rotini jep aa jei ne tombaabilirim unggwanfer ga enggammer 4.000 anggwa. Wi tane mese aa jei ne dwenaram jam ne erterbiyen.

39Yesus ga aa balbabili, "Gasa sofwe!" Ane Yesus ga aa juwili atdusabe, ga sofwa tamna Magadanwer.


  Share Facebook  |  Share Twitter

 <<  Matius 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran