Alkitab Mobile SABDA
[VER] : [BERIK]     [PL]  [PB] 
 <<  Yohanes 13 >> 

1Nunu daamfenna Paska Masara jei nalef jam falyan, Yesus Jei mes towaswena enggame nunu Jemna ga mes folbayal enggalfe Jei ogiri aaiserem jewer gam firtetefalf, ane Jei gamjon jewer gam warauf Jelem Uwaminibe. Jei angtane Jei aa jei ne tikwebaatinennerem ogiri aaiserem jebe, Jei gemer nesiktababili. Ane Jei safna Jelemana jeiserem gase nesiktababili jamer nunu Jemna umwef aa jep folbanaram.

2Yesus ane ai angtane Jei ajeya tikwebaatinennerem ai gwinem ga aya twena. Baabeta bawasmana jei ini Yudasmanaiserem jebe mes kautena enggalfe jei Yesus gam gaarfe angtane kakalaiserem jem tafnabe. Yudas jei tane Simon Iskaryotmana.

3Yesus Jei mes towaswena enggame Uwa Jelemana Jei baabeta seyafter Jep mes gulbana. Ane Jeime mes towaswena enggame Jei gwanan Uwa Sanbagirminiweram jelant, ane Jei gamjon Uwa Sanbagirminip se warauwa.

4Jega jem temawer Jei ga irwa, ane jubana Jelemana sagawer aaiserem ga aa soksosini. Ane jepga handuku ga aa egwaiwulu Jelem ambonabe.

5Jeiserem taban, Jei fona ga suwulntena bokolabe, ane tufa amna ai angtane Jei ajeya tikwebaatinennerem ga as towaitabaipmini as jam wirtabaipmife. Ane handuku ambonabe aa jes egwaiwulurum, tufa amna jem ga as gwebaipmini.

6Yesus Jei Simon Petrusminibe aa agasiwityerem, Simon jei Yesus ga tenebana, "Tuhan, jeje fomfoma tufa amna ga as Aamei Is wirsobana?"

7Yesus ga aa tamawolbana, "Namwer aamei ijam towasweyan enggame, Ai namwer Abas eyebili, jengga aamei galap is towaswena."

8Petrus jei Yesus enggam ga aa bala, "Tuhan, safnant. Tufa amna as Ijam wirsobayansus." Jengga Yesus ga enggam tamawola, "Wa, afa Ai aamei is Ajam wirtayanaye, gam jega aamei gamjon Abar daamfennaber nejam ne nwinyen."

9Jepga Simon Petrus ga aa gutena, "Afa gameye, Tuhan, gam jega tof tefner as Ijam wirsobayan, jengga tafa mese ane dwak ase jebaner Is wirtana."

10Yesus ga enggam bala, "Angtane fona aa jei gam abwilirim, jei tifni seyafter jena mes gam waakentana. Jei gamjon jena jam waakentayan, jengga tof tefner. Aamei imsa waakenswena, jengga aamei seyafteryan."

11Yesus Jei mes towaswena enggame, Jei nane se gera angtane kakalaiserem jem tafnabe. Jei ga jem temawer ga enggam gutena, "Aamei imsa waakenswena, jengga aamei seyafteryan."

12Yesus Jei tufa amna as jamer wirtabaipmilibe taban, Jei jubana Jelemana jeiserem gamjon ga aa kamwini, ane gamjon ga aa nwintena. Jepga Yesus Jei ga as balbabili, "Aamke imesa towaswebili Ai ibe isa Abas eyeipmini?

13Aamei Ai As enggam ima jenbewena Guru, afa Tuhan, ane jeiserem jeba bunaram.

14Afa Ai Tuhan imna ane Guru imnaye, ane namwer Ai tufa imna is Ajam wirtabaipmini, aamei ga ini imna jam isa onabertabana, ane aamei mese in ina ga isa wirsonanna tufabe.

15Ai aaiserem ga isa nels destabaamini, jega aamei mese gam ga isa eyebili, Ai ibe isa gemer eyeipminirim.

16Ai isa bunarsusfer nasipmini, angtane awelna angtanefe aa jei gam gweyibenerem jei sanbakyan sanbaka jelemanaiserem jemniwer. Ane angtane taterisi aa jei gam gwirinfelerem sanbakyan angtane jei aa jei gam baftanaram jemniwer.

17Afa aamei seyafter aaiserem jam isa towaswebilirim, ini imna waakenfer ga isege folbamini, afa jeiserem jam isa eyebilirim."

18Yesus gamjon ga balbabili, "Ai taterisi ibe isa Ajes bilipminirim namwer, taterisi aaiserem jeke aamei seyafter gemerserem jem temawer. Ai Amesam towaswena nan mesesa Ai Ajes destabaabilirim. Jengga Taterisi Uwa Sanbagirmana jep aa jes tulisulum, taterisi jeiserem jese etamwena. Taterisi jeiserem ga enggam, 'Angtane Ai rotini Ajebar ge tumilirim, galap jei Am ginanggwaf se gwena.'

19Taterisi jeiserem namwer ga ibe is Ajes nasipmini, gwanan nalefe jam etamweyan, jega taterisi jeiserem jam se etamwenaram, aam ga As isa tebana enggame, bunarsusfer Aiba Jesam Ai aa jei gunurum.

20Ai isa bunarsusfer nasipmini, angtane Ai As jei baftannurum, afa angtane nafsi jei angtane jeiserem jam gam tebanaram, gam jega angtane nafsi jeiserem jeime Ai mese As gam tebana. Ane afa angtane As jei gam tebanaram, gam jega angtane jeiserem jeme Uwa Sanbagiri mesam tebana, Ai As Jei baftannuntum."

21Yesus Jei game aa gutenaram, ini Jemna ga aa jenbana, ane Jei ga aa gutena, "Ai bunarsusfer aamei isa Ajam towas-towastababili, aamei aas ijeya nwinirim, angtane daamfenna imniwer jei Ai As jei se gera ginanggwaminibe."

22Jepga ai angtane Yesus Jei ajeya tikwebaatinennerem jep ga ana gaya anggaminenne, aam temawer ai ajama towaswebiyen Jei bunarsusfer nans bala.

23Aiba daamfenna angtane Yesus aa jei ne tikwebaatinennerem, aiba jesam Yesus aa jes nesiktenerem, ai ga Yesusem gwetmanap nwini.

24Jepga Simon Petrus tafamfener ga as mwanggibaasini ai jebar ajam ge nasowefe, ane ga gutena, "Aamei Yesus im teneba, Jei bunarsusfer nans bala."

25Jepga ai Yesusminiwer ga ai agasiwili, ane ga ai tenebana, "Tuhan, jei jam ga nansa?"

26Yesus ga aa tamawola, "Rotini mangkonap Ai Ajes osoltenaram, rotini jeiserem Ai Ajep gulbanaram, angtane jeiserem jei ga jes." Jepga Yesus rotini ga goltena, ane mangkonap ga osoltena, Yudasfe ga aa gulbana. Yudas jei tane Simon Iskaryotmana.

27Yudas jei rotini jeiserem jame aa taabilirim, jepga jes jepserem bawasa jem inip ga aa kabwatya. Jepga Yesus Yudas ga aa bala, "Aamei tatarfer se eyebi ijes bilirim jam eyebife."

28Yesus Jei Yudas game aa galap balaram, ai angtane Jei ajeya tikwebaatinennerem seyafter afweraiserem ai ana ajama towaswebiyen enggame, Yesus Jei Yudas game baf bala.

29Yudas jei doini ai angtane dua belas ajeye orobanaram, doini seyafter jeiserem jeye girnenne. Jega jem temawer, afwer ai alem inip enggam aya gunu, Yesus Jei ke Yudas enggalf bala, jei apgal jigala afa gam armanulf masar aaiserem jem temawer, afa ke angtane galgalyenaiserem doini jep gam gaarmif.

30Yudas jei rotini jeiserem jame aa galap taabilirim, jena ga aa totintye. Jes galapserem ona ga mes gwinswena.

31Yudas jei jewer aa galap sofwenaram, Yesus ga aa gutena, "Namwer aas jepserem, angtane enggam sege anggabili baabeta Amnaiserem jeba unggwandwasusum. Ane Ai Tane Angtanemana, baabeta Uwa Sanbagirmana unggwandwasusu jeiserem jei As ge saamini angtanefe.

32Ai baabeta unggwandwasususerem Uwa Sanbagirmana Agalap ge saaminirim, Uwa Sanbagiri jegme baabeta unggwandwasususerem Amna ga aa ge saamini. Aiba Tane Jemnam, ane Uwa Sanbagiri Jei jeiserem tatarfer gase eyebili.

33Am tantantane, Ai gamjon abakfer ibar nejam nwinyen. Aamei ga As isa terelbene, jengga Ai gwanan angtane Yahudimana enggam Agam balbabilintim, Ai gamjon Aime isa gemer balbabili, 'Tamna Ai Ajewer sofweram, aamei jewer ijama foroyan.'

34Taterisi ibirmi Ai ip isa Ajes bilipminirim, taterisi jeiserem ga enggam, 'Aamei in ina ga jam isa nesiksonanna. Enggammer Ai aamei isa gemer nesiktababuwenaram, aamei mese igme ina ga gemer isa nesiksonanna.

35Afa aamei ina jam isa nesiksonannaram, gam jega angtane seyafter ga sege towaswebili enggame, aameiba Amsama tikwebaatini.'"

36Simon Petrus jei ga Yesus aa tenebana, "Tuhan, Aamei fwer Is gwina?" Yesus ga enggam tamawolbana, "Ai Ajewer sofwaram, aamei namwer jewer As ijam tikwebaatiyen, jengga aamei Ai As galap is tikwebaatifi."

37Petrus ga aa tenebana, "Tuhan, jeje bafa enggame ai namwer Is ajam tikwebaatiyen? Ai baife ajam gweyan Im temawer ajam terfe."

38Jepga Yesus ga aa tamawola, "Aamei bunarsus Am temawer ke is tere? Ai bunarsus ims towastana, nalefe ayanga giriserem jam guteyan, aamei Ai ga Asis baanbaanwebana nawer-ningginfer."


  Share Facebook  |  Share Twitter

 <<  Yohanes 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel