Alkitab Mobile SABDA
[VER] : [DAIRI]     [PL]  [PB] 
 <<  Matius 21 >> 

1Enggo kessa ndessing kalak i mi Jerusalem, soh mo kalak i mi Betpage i Uruk Zaitun. Ipasulak Jesus mo i sidi nai dua kalak sisinNa lebbèen merdalan.

2"Laus mo kènè mi kuta si ni jolo ndènè adoi," nina Jesus taba kalak idi. "Mènter idah kènè mo nahan i sidi sada kalodè tertambat rebbak dekket anakna. Osari kènè mo duana kalodè i janah iring kènè mi sènda.

3Mula lot kalak mendokken ranana, dokken kènè mo tabasa, 'Perlu ngo i bai Tuhan i,' nai ibelli ia mo kalodè i iiring kènè."

4Masa pè bagi asa saut sinidokken nabi bagèen,

5"Bagahken mo taba kuta Sion, Rajamu roh bagèndari mendahi kono. Percerrep ukur ngo ia janah mengkunduli sada kalodè, imo anak kalodè bajar dèng."

6Nai laus mo sisiin sidua kalak i, pesautken bagè ni tennahken Jesus taba kalak idi.

7Iiring kalak i mo kalodè i dekket anakna, ialasken kalak idi mo jubahna mi gurung kalodè i. Nai ipasang Jesus mo kalodè i.

8Jelma nterrem ni sidi pè mènter ipengalasken mo jubahna i dalan idi janah dèba memenggelli ranting-ranting lako bakinen mi tengah ndalan i.

9Jelma nterrem simerdalan i lebbè dekket i podi Jesus mengoangken: "Hosianna bai Anak si Daud! Ipasu-pasu Tuhan i mo Ia siroh merkitè-kitè gerar Tuhan! Poji mo Dèbata Sintèmbul i!"

10Nai ibengketti Jesus kessa mo Jerusalem, gabè gontar mo kuta i. "Isè ngo èn?" nina pengisi kuta i.

11"Nabi Jesus ngo i, i Nazaret si ni Galilea nai," nina jelma nterrem sirebbakken dekket Jesus i.

12Nai masuk mo Jesus mi kasèan Bages Dèbata, iusir mo karina jelma simertiga-tiga i sidi. Ipentombang-mbalingken mo mèja kalak simenukari riar, dekket bangku-bangku simerdèa ndarapati.

13Nina mo taba kalak i, "Lot ngo tersurat ibas Bibèl, idokken Dèbata ngo 'Bekkas mersodip ngo bagesKu.' Tapi gabè ibaing kènè nola ngo gabè bekkas pengkilangen."

14Merrohen mo kalak sipètung dekket nitempuk sigading mendahi Jesus mi Bages Dèbata idi janah ipemalum Jesus ngo kalak idi.

15Tapi punguren mo imam ekuten dekket guru-guru agama Jahudi mengidah simasa kelengangen nibaing Jesus idi. Makin punguren ngo kalak i mendengkoh oang-oang anak-anak silot i Bages Dèbata idi, "Hosianna bai Anak si Daud!"

16Idokken kalak i mo taba Jesus, "Idengkohken kono ngo sinidokken kalak idi?" "Uè kudengkoh ngo," nina Jesus. "Mak dèng ngo pennah ijaka kènè ayat Bibèl bagèen, 'Anak-anak dekket anak mbara enggo iajari kono lako mengeruapken kata pemoji-mojiin'?"

17Nai itadingken Jesus mo kalak idi, karuar mo ia i kuta i nai laus mi Betania, i sidi mo ia mermalam.

18Sibarembenkenna ceggen i, i tengah ndalan tikan lako balik mi kuta Jerusalem, mellèhè mo iakap Jesus.

19Idah Jesus mo ibiding dalan idi lot kayu ara. Idahi mo kayu ara idi, tapi oda lot buahna giam singkabuah, mak pellin bulungna sambing. Nai idokken Jesus mo taba kayu ara idi, "Oda ndorok merbuah nèngè kono!" Nai mènter males mo kayu ara idi.

20Idah sisiin i kessa mo simasa i, lengngang kalohoon mo kalak idi. "Bakunè ngo perjadina i ndorok gejapkenna i matè kayu ara i?" nina kalak idi.

21"Èngèt kènè mo!" nina Jesus. "Mula percaya kènè janah oda sangsi, ndorok ngo ibaing kènè bagè sienggo Kubaing mi kayu ara èn. Oda pellin i sambing tupèh; mendahi uruk ènda pè ndorok ngo idokken kènè, 'Mompat mo kono mi laut!' saut ngo bagidi.

22Ai barang kadè sambing pè ipido kènè ibagasen sodip ndènè, jaloon ndènè ngo i asal mo percaya kènè."

23Enggo kessa bagidi, ibengketti Jesus nola mo Bages Dèbata, nai mengajari mo ia i sidi. Sinderrang mengajari i Ia, roh mo imam ekuten dekket pengulu-pengulu Jahudi mengkusoken baNa, "Dikè ngo dalanna kono memaing ènda karinana? Isè memerèken kuasa i baMu?"

24Ialoi Jesus mo, "Aku pè naing mengkuso ngo mendahi kènè. Enggo kessa ialoi kènè kuso-kusongku èn, nai pè asa kubagahken taba kènè, kuasa bai isè nai Aku memaingken karinana idi.

25Kuasa bai isè nai ngo bai si Johanes lako peridiken jelma i? Bai Dèbata nai ngo barang bai jelma nai?" Nai mersungkuun mo imam-imam ekuten dekket pengulu-pengulu Jahudi samah-samahsa, nina bagèen, "Mula sidokken, 'Bai Dèbata nai,' dokkenenkenna mo banta, 'Kasa oda percaya kènè bai si Johanes?'

26Tapi mula sidokken, 'Bai jelma nai,' tentu sijaga perasaan jelma nterrem ai nabi ngo ia dok atè sinterrem idi."

27Jadi ialoi kalak idi mo, "Oda kubettoh kami i." Nai idokken Jesus mo taba kalak idi, "Oo, mula bagi ngo, Aku pè oda Kubagahken bai ndènè, barang kuasa isè sikubaing èn."

28"Bagèndari pè bakunè ngo dok atè ndè terrèngèt mi sèn?" nina Jesus nola. "Lot mo sada partua bak dua anakna. Idahi mo anakna situaan nina mo mbangsa, 'Alè pa, laus mo ko mengula mi pekken anggur ari èn.'

29Ialoi anakna i mo, 'Oda uè aku' nina. Tapi gabè mobah nola mo ukurna, nai laus mo ia mengula mi pekken anggur i.

30Nai laus nola mo partua i mendahi anakna sipeduaken, idokken ma mo bagè katana bai situaan i. Ialoi anakna peduaken i mo, 'Uè pa,' tapi oda laus ia.

31Bagi mo idi, siapaina ngo anakna sidua i mengulaken nidokken bapana i?" "Situaan idi ngo," nina imam ekuten dekket pengulu-pengulu Jahudi i. Nai idokken Jesus mo taba kalak i, "Peratè-atèken kènè mo: Lebbèen ngo kalak pertunggu cokè dekket daberru siso kasèa gabè ginemgem Kerajaen Dèbata, asa kènè.

32Roh ngo si Johanes Peridiken menuduhken dalan situhunna bai ndènè tapi oda percaya kènè bana. Ai tukasi pè enggo idah kènè karinana idi, lalap ngo oda mobah pikiren ndènè, janah oda percaya bai Tuhan."

33"Dengkohken mo codiin èn," nina Jesus. "Lot mo sada kalak sidasa pekken anggur. Ipagar ngo pekkenna i kuliling. Janah ibahan bekkas lako memerroh anggur idi. Ipekadè pantar bekkas merjaga. Nai ibellah pinangken mo pekken anggur idi bai ndèba, janah laus mo ia kiladang.

34Dapet kessa katikana, memotik buah anggur, ipasulak sidasa pekken anggur i mo naposona mendahi simellah-pinang i, lako menjalo bagianna.

35Tapi itangkup simellah-pinang i mo naposo pasulaken i, sisada ipekpekki, sidèbanna ibunuh, dèba nai ibentiri dekket batu.

36Nai ipasulak sidasa pekken i nola mo naposona sidèban, buèen asa siperlebbè idi. Tapi ukum simellah-pinang idi, tong ngo ibaing bagè mendahi pasulaken perlebbè ndai.

37Perpodi kaloon, ipasulak sidasa pekken i mo anakna sendiri, dekket pengharapen; tentu nangga atè pemellah pinang i midah anakna nipasulakna i.

38Tapi, idah pemellah pinang i kessa mo anak sidasa pekken idi, nina kalak i mo samahsa, 'Èn ngo anak sidasa pekken i; aci, sibunuh mo ia, asa banta harta tinadingna i!'

39Itangkup kalak i mo anak idi, isaran mo ia mi ruar pekken idi, nai ibunuh mo!"

40"Mula balik kessa mo sidasa pekken anggur idi, bakunè mo ndia ibaing taba pemellah pinang idi?" nina Jesus.

41Ialoi kalak idi mo, "Tentu bunuhenna mo kalak perjahat i, janah ipebellah-pinangken nola pekken anggurna i taba kalak siuè memerèken bagianna ibas hasil tanoh idi nai."

42Gabè idokken Jesus mo taba kalak idi, "Mak dèng ngo nung ijaka kènè sitersurat ibas Bibèl bagèen: 'Batu si nipatakken tukkang bages idi, enggo gabè batu simahargana. Èn mo nibaing Tuhan i, soh mo mendèna!'"

43"Asa èngèt kènè mo," nina Jesus. "Karinana hak ndènè kin nemmu gabè bangsa Dèbata icabut mo i bai ndènè nai, janah iberrèken mo taba bangsa simenguèi perèntah Dèbata.

44[Barang isè pè ndabuh mi batu èn, mpustak merbincahcah mo ia; janah merlicaten mo kalak nitinggangen sindabuh i.]"

45Kessa pul idengkoh imam-imam ekuten bak Parisè umpama idi, iartiken mo rana i; taba kalak i ngo mengenna kata idi.

46Nai mertaki sinunu mo kalak i lako menangkup Jesus; tapi mbiar ngo kalak i midah jelma nterrem idi, ai nabi ngo Jesus idok atè jelma nterrem i.


  Share Facebook  |  Share Twitter

 <<  Matius 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran