Alkitab Mobile SABDA
[VER] : [GULLAH]     [PL]  [PB] 
 <<  Efesus 1 >> 

1A, Paul, wa God pick fa be a postle ob Christ Jedus, da write ta God people een Ephesus, dem wa true ta God cause dey come fa be one wid Christ Jedus.

2We aks God we Fada an de Lawd Jedus Christ fa bless oona an gii oona peace een oona haat.

De Blessin Dem wa God Gii

3Leh we praise de God an Fada ob we Lawd Jedus Christ. Cause e bless we wa one wid Christ. E gii we ebry good ting wa haffa do wid esef dey een heaben.

4God done pick we fa esef eben fo e mek de wol. E pick we fa be one wid Christ so dat we would be e own people wa ain hab no sin, wen e look pon we.

5Cause God lob we, e done cide fohan fa hab Jedus Christ come fa bring we ta um, so dat we gwine come fa be God own chullun. God wahn fa do dat, an dat gim pleasure.

6God done dat so dat we would praise um fa dis big blessin dat e gii we, an dat ain cost we nottin. God own deah Son mek dis happen fa we.

7Cause Christ shed e blood an dead pon de cross, we done been set free. God paadon we sin. God good ta we fa sho!

8E pour out e blessin pon we! Fa true, God hab sense een all ting an ondastan um all.

9Cause e done wa e cide fa do, an e tell we e plan, wa people ain neba know fo. E done been cide fa sen Christ fa do all dat e plan.

10God plan dat wen de right time come, e gwine finish op da mek all dat happen. All ting dat God been mek, ebryting een heaben an ebryting een de wol, e gwine mek um all come fa be one togeda onda one head, Christ, fa rule oba um.

11God mek all ting happen jes like e been plan an how e wahn um fa be. E pick we fa be e own people wa one wid Christ, cause dat wa e wahn an wa e been plan fo, fom fo de wol staat.

12God do dat so dat we wa fus hope pon Christ would lib fa gim praise an show dat e great fa true.

13Now oona, too, come ta blongst ta Christ, wen oona yeh de true wod dat da de Good Nyews, wa sabe oona. Een Christ, wen oona bleebe, God gii oona e Sperit, de Holy Sperit wa e been promise. An e God maak wa e gii oona fa show dat now oona e own people.

14Cause we hab God Sperit, we kin know fa sho dat we gwine git wa God promise fa gii e people, wen God gwine set free fa true dem wa blongst ta um. Leh we praise um an show dat e great fa true!

Wa Paul Pray

15Cause ob all dat wa God done, eba since A yeh bout how oona trus een de Lawd Jedus an how oona lob all de people dat blongst ta God,

16A ain neba stop da tell God “tankya” fa oona. An wensoneba A da pray, A taak ta um fa bless oona.

17A aks de God ob we Lawd Jedus Christ, God we Fada wa full ob glory, fa gii oona speritual sense an show oona trute bout God, so dat oona gwine know um mo an mo betta.

18A pray ta God, too, dat e open op oona haat fa ondastan de trute wa come fom God so dat oona know de good ting e eenbite oona fa look fowaad ta. A pray fa God fa mek oona ondastan how walyable fa true dem special blessin dat God gwine gii ta e own people.

19An A pray, too, dat oona gwine ondastan how scrong mo den all e great powa da, dat da hep we wa trus een um. Dis great powa ob God wa da hep we,

20dat de same powa dat God nyuse fa mek Christ lib gin an git op fom mongst de dead people an fa mek um seddown een heaben at e right han side.

21Christ da rule dey een heaben wid faa mo tority den all oda rula an tority an leada an dem wa hab powa. Christ name greata mo den all dem oda name ob de rula dem een dis time yah an een all de time fa come.

22An God mek all ting fa come onda Christ tority. E mek Christ de head, de Lawd fa rule oba all ting fa de choch.

23De choch da Christ body. An dat body full op wid Christ, de one wa da fill ebryting een ebry way.


  Share Facebook  |  Share Twitter

 <<  Efesus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel