Alkitab Mobile SABDA
[VER] : [GULLAH]     [PL]  [PB] 
 <<  Efesus 4 >> 

We All Blongst ta One Body

1So den, A Paul, wa dey pit een de jailhouse cause A da wok fa de Lawd, A da beg oona, mus waak een God way, jes like God tell oona fa lib wen e call oona fa trus een Christ.

2Oona mus dohn neba tink oona mo betta den noda poson. Mus dohn be rough on um. Mus always be willin ta wait fa oda people an beah wid um cause ob oona lob.

3De Holy Sperit da gii oona de peace wa mek oona all one body een Christ. Oona mus try wid all oona haat fa keep on da gree togeda, so dat oona kin all hab peace wid one noda.

4We all blongst ta one body. We all got de same Holy Sperit jes like dey one ting wa oona hope fa wen God call oona.

5Dey jes one Lawd, an one fait, an one bactism.

6Dey jes one God an Fada ob all. E de Lawd wa rule oba all. E da wok shru all an e een all.

7Now den, Christ bless we fa mek ebry one ob we able fa do a special wok. Ebry one ob we hab we own paat ob Christ great fabor coddin ta wa e gii we.

8Dat wa mek um write een God Book say, “Wen e gone op ta de mos high place, e tek wid um dem one wa e win an e gii people e fabor.”

9Wa dat dey mean wen dey say, “E gone op?” Dat mean fa say dat fo e gone op, e done been come down ta de mos deep place ob de eart.

10Dat one wa come down, e de same one wa gone op high pass all de heaben, so dat e could fill all paat ob de universe.

11E de one wa gii e fabor ta people fa mek we able fa do ebrybody a special wok. E gii some ob e people de wok fa be a postle, an some de wok fa be a prophet. Some ob um, dey evangelist wa trabel all roun, da tell oda people de Good Nyews. An some oda, dey pastor an teacha.

12Christ do dis fa mek God people ready an able fa do de wok dat dem wa trus een Christ oughta do, so dat de body ob Christ, de choch, gwine grow scrong an git build op

13til we all togeda gwine come fa be one people, greein een we fait een Christ an een wa we know bout God Son. Den we gwine be grown op fa true een de Lawd, da come fa trus een God een ebryting til we all grown op een God, jes like Christ.

14Een dat time we ain gwine be like leetle chullun no mo, wa kin change wa dey bleebe wensoneba dey yeh a nyew ting. Dey like a leeleetle boat dat de wata kin toss all oba, an de big wind kin keep on da change an da blow dat boat one way atudda. Now we ain gwine be like dem leeleetle chullun. Wen ceitful people try fa laan we, dey jes like dat wind. Bot dey ain gwine mek we bleebe all kind ob wrong ting wa ain true tall.

15Steada dat, we oughta always lob one noda, da tell one noda wa true. Ef we do dat, we gwine grow op mo an mo een ebry way fa be one wid Christ, de head ob de choch.

16Christ, de head, got chaage ob all de diffunt paat ob de body, so dat dey all jine togeda jes so. An ebry jaint een de body da hep fa keep all de body togeda, cause all de paat da jine togeda fa be one. So den, wen ebry one ob dem paat da do wa e oughta do, all de body da grow an git build op, as all de paat lob one noda mo an mo.

De True Life wa God Gii

17Een de Lawd name, A da chaage oona say, “Oona mus dohn lib oona life no mo like dem wa ain know God da lib. Wa dem people tink ain wot nottin tall.

18Dey haat ain open, so dey cyahn ondastan de life dat God gii. Dey ain got no paat een dat true life wa God gii ta people, cause dey haat haad as a rock, an dat mek um so dat dey ain know nottin tall.

19Dey ain got no shame bout nottin no mo. Dey mek op dey mind fa waak all de time een de ebil way. Dey lib loose life, always da wahn fa do all kind ob ebil ting mo an mo.

20Now den, wa oona been laan bout Christ ain neba been like dat!

21Fa sho, people beena tell oona bout Christ, an oona wa folla um beena laan de trute dat een Jedus.

22So den, oona mus gii op oona ole sef, dat ole way wa mek oona do dem bad ting oona nyuse fa do. Oona ole sef beena stroy oona, da mek oona wahn fa do schemy ting wa mek oona sin.

23Oona mus leh God Sperit change fa true de way oona tink.

24Oona mus be de nyew poson wa God mek fa be like esef. Dat nyew poson gwine lib fa true, da treat oda people right an da do wa right een God eye.

25So den, ebry one ob oona mus dohn neba tell lie no mo. Oona mus all tell de trute ta e neighba, cause we all blongst togeda ta Christ one body.

26Ef oona bex, oona mus dohn leh dat mek oona sin. An oona mus dohn leh de sun go down an oona stillyet bex.

27Oona mus dohn gii de Debil chance fa try fa mek oona sin.

28De poson wa beena tief, e mus dohn tief no mo. E mus staat fa wok, da do sompin good wid e han, so dat e gwine be able fa hep dem wa hab need.

29Oona mus stop da taak haamful wod wa ain do nobody no good. Steada dat, mus taak wod wa gwine hep oda people so dat oona wod gwine build um op, coddin ta wa dey need fa yeh. Een dat way, oona gwine be a blessin ta de people wa da yeh oona.

30Oona mus dohn mek de Holy Sperit saaful. Cause de Sperit ob God een oona, dat God maak wa e gii fa show dat oona blongst ta God an oona kin know fa sho dat e gwine keep oona til dat Day wen God gwine set oona free.

31Mus dohn hab no bittaness tall een oona haat. Mus dohn be bex at nobody. An mus dohn taak mean o shout, needa shrow slam at nobody. Mus dohn hate nobody tall.

32Steada dat, oona mus do good ta people. Mus hab waam, kind haat fa one noda, an mus fagib one noda, jes like God fagib oona, cause oona blongst ta Christ.


  Share Facebook  |  Share Twitter

 <<  Efesus 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran