Alkitab Mobile SABDA
[VER] : [GULLAH]     [PL]  [PB] 
 <<  Kolose 2 >> 

1A wahn oona fa know how haad A da shy fa do all A kin fa oona an de Christian dem een Laodicea an fa all dem oda dat ain know me cause dey ain meet me yet.

2A do dat, fa courage oona an all ob um, fa true, as all ob oona come fa be one een oona lob fa noda. Cause ob dat, oona kin ondastan de trute fa sho, an dat kin mek oona full op wid trus dat walyable fa true. So den, oona all gwine know wa God ain leh people know fo, dat da Christ esef.

3E de one wa mek people know de sense wa God hab an all de walyable ting wa e know, wa no poson ain know fo.

4A tell oona dis so dat oona ain gwine leh nobody ceebe oona, da tell oona ting wa sound real fine bot ain true tall.

5Cause eben dough A ain dey wid oona, me haat wid oona fa true. A heppy fa see dat oona all come fa be one togeda an ain nobody able fa moob oona fom de good way oona keep on da trus een Christ.

Oona Got de True Life een Christ

6So den, jes like oona done mek Christ Jedus oona Lawd, oona mus keep on da lib all de time een um, da waak e way wid um.

7Oona mus fasten scrong pon um, jes like a root fasten down deep eenta de groun. Leh um be de foundation ob oona life so dat oona pend pon um mo an mo. Mus dohn leh nottin tall stop oona fom trus een um, jes like dey beena laan oona fa do. Pontop dat, oona mus be full op wid praise, da tell God “Tankya” all de time.

8A da waan oona. Mus dohn leh nobody ketch oona op an oona folla um, da bleebe um wen dey come ta oona wid dey own ceitful human sense wa ain mean nottin. De ting wa dem people yah da taak, dey wa de ole people beena laan oda people way back. An de sperit dem wa rule dis wol, dey mek um know dem ting yah. Dem ting yah ain come fom Christ.

9Cause dey eenside Christ, all dat God da da lib fa true.

10An God gii oona de true life wen oona come fa be one wid Christ. Ain nottin mo dat oona need fa hab dat life. An Christ da rule oba all dem wa da rule an wa got tority.

11Wen oona come fa be one wid Christ, oona done git circumcise, too. An wen oona git circumcise, dat ain been de circumcision wa people do. Oona git circumcise wid de circumcision wa Christ do, dat wa pit way oona old sinful sef, so dat sef ain hab no powa oba oona no mo.

12Cause wen dey bactize oona, dey done bury oona wid Christ. An jes like God mek Christ git op fom mongst de dead an lib gin, wen dey bactize oona, God mek oona lib gin too, cause oona trus een God dat e got powa fa do all ting.

13Oona been dead, cause oona keep on da sin an oona been people wa ain Jew an wa ain got de Law dat God gii Moses. Bot now God done gii oona true life wid Christ. God done paadon all we sin.

14God done shrow way de paper wa tell all de bad ginst we ob we debt dat we owe, long wid de law dem wa beena say wa we haffa do. God done tek way all de debt we owe, nailin um pon Jedus cross.

15God tek way de powa ob dem wa da rule an got tority. An e show out een de open dat e done win out oba dem sperit by wa Christ done done.

16So den, oona mus dohn leh nobody jedge oona, cide fa oona wa oona oughta nyam o wa oona oughta drink. Dey mus dohn tell oona wa oona oughta do pon dem special Woshup Day ebry yeah o de time ebry mont wen people celebrate de nyew moon o pon dem Woshup Day ebry week.

17Dem ting yah, dey ain nottin bot shada wa show wa fa come, bot de real ting da Christ.

18Wen people come da say dey mo betta den oda people, cause God da show um ting een bision, oona mus dohn leh none ob um condemn oona, da say oona ain da do right. Dem people yah like fa tell people dat dey oughta mek like dey ain wot an dey oughta woshup angel. People like dem yah, dey jes biggity fa nottin. Dey ain tink like God tall. Dey da tink jes like sinful people tink.

19People like dem, dey done stop fa be one wid Christ, de head ob de body, de choch. Fa true, Christ de one wa da trol all de body. E da feed um fa mek um grow. E mek all de diffunt paat dem jine ta one noda an fasten good togeda. An so den de body, Christ choch, da grow jes like God mek um grow.

Oona True Life Wid Christ

20Wen Christ dead, oona dead too, an so de sperit dem wa da rule dis wol, dey ain rule oona no mo. So den, hoccome oona da lib like oona still blongst ta dis wol? Hoccome oona da folla de rule dem ob de wol.

21De rule dem ob de wol, dey tell we say, “Mus dohn tetch dis food yah! Mus dohn taste dat dey! Mus dohn tek dat one dey fa nyam um!”

22All dem ting yah wa dey say ain fa nyam o drink, dey gwine be gone wen people nyam um an drink um. People mek dem rule yah an laan um ta oda people.

23Fa true, e look like dem people wa beena mek dem kind ob rule yah been git sense. Dey da say people haffa woshup angel an mek like dey ain wot, an day say dat people kin saab God ef dey mek dey body suffa. Bot dem rule yah ain hep people tall fa trol wa dey sinful body wahn fa do.


  Share Facebook  |  Share Twitter

 <<  Kolose 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran