Dual Panel1Wen God done mek Christ lib gin, e mek oona git nyew life too. So den oona mus pit all oona haat pon de ting dem oba God een heaben, weh Christ seddown, da rule at God right han side.
2All de time keep on da study pon dem ting wa dey een heaben an pit oona haat pon um. Mus dohn pit oona haat pon de ting dem wa een dis wol.
3Cause oona done dead. An now, oona true life dat God gii oona, people ain see, cause oona da waak close ta God shru Christ.
4Christ we true life. Wen e gwine come back ta de wol, oona gwine be wid um. An den, jes like dey hona Christ an gim glory, oona gwine hab oona paat een e hona an glory, too.
De Ole Life an de Nyew Life
5Oona haffa kill de sinful eenside oona haat wa da mek oona wahn fa do dem bad ting dat oda people da do, dat mek um lib loose o doty life. Mus dohn lie op wid no man o ooman wa ain oona own an mus dohn lib doty. Mus dohn wahn fa do no kind ob ebil ting. An mus dohn hab de big eye, all de time da wahn lotsa ting. People wa do dat, da woshup dem ting mo den God.
6Cause people wahn fa do all dem kind ob sinful ting yah, God gwine be bex wid um fa true.
7Fo, oona beena do dem same ting yah. Oona nyuse fa waak een dem way an dey beena rule oona.
8Bot now, oona mus dohn do none ob dem sinful ting yah no mo. Mus dohn git bex. Mus dohn git mad op wid nobody. Mus dohn be spiteful, da wahn fa do bad ta noda poson. Mus dohn hole nobody cheap, needa taak bad wod.
9Oona mus dohn tell lie ta one noda. Cause oona ain wa oona nyuse fa be no mo. Oona done lef oona ole sinful life an de way oona nyuse fa do.
10Now oona come fa be nyew people. God mek oona all nyew, an all de time e da mek oona come fa be like um, mo an mo. E da do dat so dat one day oona gwine know um fa true.
11So den, cause God done dat, we all one een God eye. Dey ain no diffunce tween Jew people an dem wa ain Jew, people wa been circumcise an dem wa ain circumcise, de come-yah people, dem wa ain cibilize, slave people an free man dem. Dey ain nobody bot Christ wa matta fa true. An e dey eenside all people dat bleebe pon um.
12Oona blongst ta God. E lob oona an pick oona fa be e own. So den, oona mus hab mussy pon one noda. Mus keep on da do good ta one noda an mus dohn be biggity. Mus dohn be haad pon one noda. Mus beah wid one noda.
13Oona mus dohn git opsot wid one noda. Wen one ob oona git complain ginst noda one, dat e done um bad, dat one oughta paadon um. Oona mus paadon one noda like de Lawd paadon oona.
14Pontop all dat, oona mus lob one noda. Dat gwine mek oona git one haat an oona gwine come fa be one een all oona da do.
15Oona mus leh de peace wa Christ da gii oona, rule een oona haat. Cause God call oona, fa bring oona togeda fa be peaceable wid one noda een one body. An oona mus tell God “Tankya” all de time.
16Mo an mo, oona mus leh de wod ob Christ mek e home dey eenside oona haat. Laan one noda an show one noda wa fa do, nyusin oona sense een ebryting. An oona mus sing psalms an hymn dem an all dem speritual wa God Sperit da gii we fa sing. Oona mus sing an tell God “Tankya” wid all oona haat.
17Ebryting oona do an ebryting oona say, oona oughta do an say all ob um een de name ob de Lawd Jedus, da tell we Fada God “Tankya” shru Christ.
How Oona Oughta Lib Oona Nyew Life een Oona Home
18Oona marry ooman, oona haffa do wa oona husban tell oona fa do. Dat how oona oughta do, cause oona da lib een de way ob de Lawd.
19Oona marry man, ebry one ob oona oughta lob e wife. Mus dohn mek um suffa.
20Chullun, oona oughta do wa oona modda an fada tell oona fa do all de time, cause God heppy fa see dat oona da do so.
21Oona wa be fada, mus dohn bex oona chullun, all de time da tell um wa dey ain da do right. Cause ef oona do dat, oona chullun ain gwine git no courage fa do nottin.
22Oona wa be slabe, oona mus do all dat oona bossman een dis wol tell oona fa do. Oona mus dohn wok jes wen oona bossman da see oona, jes cause oona wahn fa mek um praise oona. Mus wok wid all oona haat cause oona hona we Lawd Jedus.
23Ebryting wa oona da do, oona mus do um wid all oona haat, jes like oona da do um fa we Lawd Jedus an not jes fa people.
24Cause oona know dat we Lawd gwine gii oona de payback, de good ting wa e promise e people. Christ de true Lawd wa oona da wok fa.
25An ebrybody wa keep on da do bad, God gwine gim e pay fa all de bad ting e done. Cause God gwine jedge all people de same way.