Alkitab Mobile SABDA
[VER] : [GULLAH]     [PL]  [PB] 
 <<  Matius 7 >> 

Mus Dohn Jedge Oda People

1“Mus dohn jedge oda people. Den God esef ain gwine jedge ya.

2De same way ya jedge oda people, dat how God gwine jedge ya. Ef ya easy on oda people o ef ya mek um suffa, dat de same way God gwine do ya.

3Wa mek ya see de leetle splinta ob wood een ya broda eye, bot ya ain pay no mind ta de big log een ya own eye?

4How ya gwine tell ya broda say, ‘Broda, leh me tek dat leetle splinta out ya eye,’ wen ya ain eben pay no mind ta de big log een ya own eye?

5Ya hypicrit! Fus ya mus tek de big log out ya own eye. Den ya kin see plain how fa tek dat leetle splinta out ya broda eye.

6“Mus dohn gii dog dem ting wa blongst ta God. Ef ya do dat, de dog gwine ton an teah ya op. Mus dohn shrow ya fine bead dem ta de hog dem. Ef ya do dat, dey gwine mash um onda dey foot, an den ton roun an teah ya op.

God Gii Good Ting ta Dem wa Aks

7“Aks God, an e gwine gii ya wa ya aks fa. Look ta God, an ya gwine find waeba ya da look fa. Knock ta God door, an e gwine open um op ta ya.

8Cause de one wa da aks, God gwine gim. De one wa da look ta God, e gwine find waeba e da look fa. An de one wa da knock ta God door, God gwine open op de door ta um.

9Ef ya hab a son, an ef e aks ya fa a piece ob bread, ya ain gwine gim no rock, ainty?

10An ef ya son aks ya fa a piece ob fish, ya ain gwine gim no snake, ainty?

11Ef oona wa ebil know how fa gii oona chullun good ting, oona Fada een heaben know how fa gii a heap mo good ting ta dem wa aks um!

12“Een all wa ya do, ya mus do ta ebrybody jes like ya wahn dem fa do ta oona. Dat wa de law God gii Moses an wa de prophet dem laan we.

De Way ta True Life

13“Ya mus go een shru de leeleetle door. Cause de door weh people da go een weh dey gwine be stroy een hell, dat door big fa true, an dat way easy fa folla. Plenty people da waak een dat way dey.

14Bot de door weh people da go een fa git ebalastin life, dat a leeleetle door, an dat way haad fa folla. Ain a whole heapa people wa find dat way.

De Tree an E Fruit

15“Oona mus tek cyah! Look out fa dem prophet wa ain taak true. Wen ya shim, dey look jes like sheep. Bot eenside dey haat, dey jes like a wile wolf.

16Ya gwine know dem by de fruit dey da beah. Ya ain gwine pick grape fom a bramble bush, ainty? Ya ain gwine geda fig fom de briah patch, ainty?

17Same way so, ebry tree wa da grow good, e da beah good fruit, bot a tree wa ain grow good, e da beah bad fruit.

18A tree wa da grow good, e cyahn beah no bad fruit. An a tree wa ain grow good cyahn beah no good fruit.

19Dey gwine cut down all dem tree wa ain beah no good fruit. Dey gwine chunk um een de fire.

20So den, ya gwine know dem by de fruit dey da beah.

Jes Dem wa da Do wa God Wahn, Dey Gwine Go ta Heaben

21“Ain ebrybody wa da call me say, ‘Lawd, Lawd’ ain gwine go een weh God da rule een heaben. Jes dem wa do wa me Fada God een heaben wahn.

22Wen dat day come, plenty people gwine tell me say, ‘Lawd, Lawd! Een ya name we done beena tell people wa God say, ainty? Een ya name, we done beena dribe out ebil sperit an do plenty miracle, ainty!’

23Den A gwine tell um say, ‘A ain neba know oona. All oona wickity people, git way fom me!’

De Man wa Got Sense an de Fool

24“So den, ebrybody wa da yeh me wod an do wa A tell um, dey stan same like a poson wa got sense. Wen e build e house, e lay de foundation pon de rock.

25De rain come, an de riba flood oba. De haad wind blow an beat ginst dat house. Stillyet, de house ain faddown, cause de man done lay de foundation pon de rock.

26Bot de poson wa yeh me wod an ain do wa A tell um, dat poson dey same like a fool man wa build e house pontop de sand.

27De rain come, an de riba flood all oba. De haad wind blow an beat ginst dat fool man house. An de house fall down, bam! E smash op!”

Jedus Got Tority fa Laan People

28Atta Jedus done tell de people all dis, dey been stonish how Jedus da laan um.

29Cause e ain laan um like de Jew Law teacha dem. E laan um like e hab tority fa laan people dem ting yah.


  Share Facebook  |  Share Twitter

 <<  Matius 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran