Dual PanelDem Good Ting We Mus Teach
1Bot ya mus laan dem wa bleebe fa do dem ting wa go long wid true teachin.
2Tell de man dem wa mo olda, dey oughta be serious an lib so dat people spec um. An dey mus be able fa trol deysef. An tell um dey oughta bleebe scrong een de true teachin ob God an lob oda people fa true. An dey mus be able fa beah op wen dey da suffa.
3Same way so, tell de ooman dem wa mo ole, dey oughta waak scraight like ooman wa pit God fus een e life oughta do. Mus dohn bad mout oda people, needa be dronka. Dey mus laan de nyounga ooman dem ting wa good.
4Den dey kin train de nyounga ooman dem so dat dey gwine know dey oughta lob dey husban an dey chullun.
5Fudamo, dey gwine know dey oughta be able fa trol deysef an lib a clean life. Dey mus wok good, da tend ta dey own house, an treat people kindly. An dey mus do wa dey husban tell um fa do. Dem nyounga ooman mus lib dat way so dat nobody ain gwine hab no reason fa hole God wod cheap.
6Same way so, de nyounga man dem, keep on da waan um dat dey mus trol deysef.
7Ya mus do wa good all de time, een all ya da do, so dat oda people gwine shim an folla fa do good too. An wen ya da teach, ya mus show dem ya bleebe wa ya say wid all ya haat an ya da mind wa ya say.
8Pick ya wod dem good, coddin ta de true teachin, so dat nobody ain gwine hab no good reason fa fault ya. An dem wa ginst ya gwine be shame, cause dey ain got nottin bad fa say bout we.
9Teach slabe dem wa bleebe, dat dey mus do wa dey massa tell um fa do an try fa please um een ebryting dey do. Dey mus dohn taak back ta dey massa.
10An dey mus dohn tief um. Steada dat, de slabe dem mus show dey massa dat dey all de time faitful ta um een ebryting. Den ebryting dey do gwine mek people wahn fa yeh mo bout dem ting dat we da laan um bout God we Sabior.
11Cause God bless we een dis wol. E sen Jedus Christ down ta de wol so dat all people kin git sabe.
12E da laan we dat we mus stop fa do wa God ain wahn we fa do, an stop fa wahn all dem bad ting ob dis wol. We mus laan fa trol wesef, fa waak scraight an lib like God wahn we fa lib, wiles we dey yah een dis wol.
13An wiles we da lib dat way, we da look fowaad ta dat bless day wen we wondaful God an Sabior Jedus Christ gwine come down ta we wid all e powa an show e glory. Dat de hope dat we got.
14E done gii e life fa sabe we, fa pull we outta all de sinful life we beena lib. E done gii e life fa mek we haat clean, so dat we gwine be e own people wa wahn fa do wa good wid all we haat.
15So den, ya mus laan dem ting yah ta de bleeba dem. Wid all ya tority, ya mus courage um fa do um an buke dem wa ain da do um. Mus dohn leh nobody say dey ain no need fa listen ta wa ya say.