Alkitab Mobile SABDA
[VER] : [KARO]     [PL]  [PB] 
 <<  1 Samuel 23 >> 

Iselamatken Daud kota Kehila

1Ibegi Daud maka bangsa Pilisti sangana nerang kota Kehila janah itangkona gandum si mbaru denga iperani.

2Emaka isungkunna TUHAN nina, "Banci nge aku lawes nerang kalak Pilisti e?" "Banci," nina TUHAN ngaloi, "Seranglah ia janah selamatken kota Kehila."

3Tapi nina teman-teman Daud man bana, "I bas taneh Juda enda pe cukup si man kebiarenta; tentu saja reh gulutna kari adi lawes kita ku kota Kehila janah siserang tentera bangsa Pilisti!"

4Emaka isungkun Daud ka mulihken sura-sura TUHAN, janah nina TUHAN man bana, "Laweslah janah seranglah Kehila sabap ateKu mereken kemenangen man bandu ngelawan bangsa Pilisti."

5Emaka lawes Daud ras temanna ku Kehila jenari iserangna bangsa Pilisti; nterem kal ibunuhna jenari ibuatna asuh-asuhen. Janah bagenda me dalanna Daud nelamatken kota e.

6Asum Abiatar anak Ahimelek luah janah ersada ras Daud i Kehila, ikut ibabana epod e.

7Iberitaken man Saul maka Daud nggo lawes ku Kehila, jenari nina Saul, "Dibata nggo namaken ia i teruh kuasangku. Nggo isidingi Daud man bana alu lawes ku kuta si ertembok janah lit pintun gerbangna."

8Emaka ipepulung Saul tenterana, iperentahkenna erperang ngelawan Kehila guna ngkepung Daud ras teman-temanna.

9Kenca ibegi Daud maka iserang Saul atena ia, ikatakenna man Imam Abiatar, "Babalah epod ku jenda."

10Jenari nina Daud, "TUHAN, Dibata Israel, nggo kubegi maka irencanaken Saul reh ku Kehila guna ngkernepkenca erkite-kiteken aku, suruh-suruhenndu.

11Idudurken penduduk Kehila kin aku pagi man Saul? Tuhu kin Saul reh bagi si nggo kubegi? TUHAN, Dibata Israel, alu merendeh dingen meseksek mindo aku man bandu aloi min aku!" Ngaloi TUHAN nina, "Reh nge ia."

12"Janah idudurken penduduk Kehila enda kin pagi aku ras temanku man Saul?" nina ka Daud mulihken nungkun. "Idudurkenna," nina TUHAN ngaloi.

13Emaka Daud ras temanna kira-kira 600 kalak kerina minter nadingken Kehila janah terus ia pindah-pindah. Kenca ibegi Saul maka Daud nggo lompat i Kehila nari, la surung iserangna kota e.

Daud i deleng-deleng

14Daud cebuni i deleng-deleng, i bas taneh si mesawang deher Sip. Lalap idarami Saul ia tepi la iendesken Dibata si Daud man Saul.

15Daud ngidah maka ibunuh Saul atena ia. Daud sangana i Hores, i taneh mesawang deherken Sip.

16Idahi Jonatan ia ku je janah ipetetapna ukurna alu pengarapen kerna pengkawali Dibata.

17Nina Jonatan man bana, "Ula kam mbiar. Bapangku Saul labo ngasup nehken si jahat man bandu. Ietehna tuhu-tuhu maka kam me pagi jadi raja Israel janah maka aku me teruhenndu."

18Jenari duana ia ngiket perpadanen i lebe-lebe TUHAN. Daud ringan i Hores, janah Jonatan mulih ka ku rumahna.

19Piga-piga kalak anak kuta Sip lawes ndahi Saul i Gibea janah nina man bana, "Daud sangana cebuni i daerah kami i Hores i Deleng Hakila, arah Selatan taneh mesawang Juda.

20Iteh kami o Raja, uga rincuhna ukurndu nangkap ia, emaka rehlah kam ku daerah kami, janah iusahaken kami tuhu-tuhu maka itangkapndu ia."

21Ngaloi Saul nina, "TUHANlah si masu-masu kam sabap bage ulina kam man bangku!

22Tolah mulih pepayo sekali nari; pepayo tuhu-tuhu i ja ia janah ise si nggo ngidahsa i je. Sabap nggo kubegi maka ia cerdik tuhu-tuhu.

23Pepayo pagi i ja kin situhuna inganna cebuni, janah minter laporken man bangku mulihken. Kenca bage banci aku lawes ras kam, janah adi i bas daerah e denga ia la banci la kudarami ia seh dat aminna gia arus isiar kerina taneh Juda."

24Emaka berkat kalak ndai mulih ku Sip leben asa Saul. Daud ras teman-temanna sangana i taneh mesawang Maon, i bas sada berneh si la iingani, i bas bagin Selatan taneh mesawang Juda.

25Berkat Saul ras tenterana ndarami Daud, tapi ibegi Daud kerna si e, emaka lawes ia ku uruk si erbatu-batu i taneh mesawang Maon, janah i je ia tading. Kenca ibegi Saul kerna si enda, iayakina Daud ku je.

26Saul ras tenterana arah lepar ah janah Daud ras teman-temanna arah lepar enda, duana ia isirangken uruk ndai. Pedas-pedas ia kerina lawes nadingken Saul ras tenterana, sabap nggo mulai ia ikepung, janah nandangi itangkap kalak ndai me ia.

27Rembang tupung e reh sekalak persuruhen nina man Saul, "Minterlah kam mulih! Nggo iserbu bangsa Pilisti negerinta!"

28Emaka ingadiken Saul ngayak-ngayak Daud janah lawes ia merang bangsa Pilisti. Em sabapna maka uruk e igelari persirang-sirangen.

29Daud pe lawes, cebuni i daerah Enggedi.


  Share Facebook  |  Share Twitter

 <<  1 Samuel 23 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran