Alkitab Mobile SABDA
[VER] : [KARO]     [PL]  [PB] 
 <<  1 Tawarikh 22 >> 

1Emaka nina Daud, "I jenda me Rumah Pertoton man TUHAN Dibatanta. I jenda me batar-batar ingan bangsa Israel mpersembahken persembahen tutungen."

Persikapen guna mbangun Rumah Pertoton

2Iperentahken Raja Daud pulung kerina kalak pertandang si ringan i negeri Israel, jenari isuruhna erdahin. Deba nikapken batu cetaken guna Rumah Pertoton.

3Ilitken Daud besi seh buena guna erbahan paku-paku ras klem-klem guna perkayun pintu gerbang. Janah isikapkenna tembaga si lanai kal lang-lang buena seh maka la tertimbang beratna.

4Iaturna bangsa Tirus ras Sidon maba kayu aras man bana si lanai terbeligai buena.

5Rukur Daud, "Rumah Pertoton si ibangun anakku Salomo arus maka seh kal jilena janah terberita ku belang-belang doni enda. Tapi ia nguda denga, langa lit pengalamenna, emaka aku arus erbahan persikapen guna si e." Erkiteken si e ibahan Daud melala kal persedian ope denga ia mate.

6Idilona anakna Salomo jenari iperentahkenna mbangun rumah pertoton man TUHAN Dibata Israel.

7Nina Daud, "O anakku, kubangun ateku rumah pertoton guna kemulian TUHAN Dibatangku.

8Tapi ikataken TUHAN man bangku maka aku nggo nterem kubunuh jelma, janah nggo melala erbahan perang. Emaka kerina dareh si mambur erkiteken perbahanenku, la ibere TUHAN aku mbangun rumah pertoton man BaNa.

9Nggo IbahanNa sada perpadanen man bangku. Nina, 'Lit pagi sekalak anakndu dilaki merentah alu dame, erkiteken Kubereken man bana perdamen ras kerina musuh-musuhna. Gelarna Salomo, sabap menaken i bas pemerentahenna nari Kubereken pagi man Israel dame ras keamanen.

10Ia pagi mbangun rumah pertoton man bangKu. Ia jadi anakKu janah Aku jadi bapana. Keluargana pagi merentah Israel tetap rasa lalap.'"

11Nina Daud tole, "Genduari anakku, TUHAN Dibatandulah ras kam, erbahan kam berhasil mbangun rumah pertoton man BaNa.

12Janah TUHAN Dibatandulah mereken man bandu kinibeluhen rukur ras kepentaren gelah banci kam merentah Israel rikutken Undang-UndangNa.

13Berhasil kam adi ikutkenndu kerina undang-undang si nggo ibereken TUHAN man Musa guna Israel. Jadilah tetap ras nteguh janah ula bere kai pe erbahan kam mbiar.

14Kerna Rumah Pertoton e, nggo ku pepulung lebih 3.400 kilo emas, 34.000 kilo pirak guna ipergunaken mbangun rumah pertoton e. Tambah si e, nggo kusikapken tembaga ras besi si lanai langlang buena. Kayu ras batu pe nggo kusikapken, tapi arus itambahindu tole.

15Nterem kap si erdahinndu. Lit kalak si erdahin mahat batu, janah lit tukang batu ras tukang kayu ras kalak-kalak si pentar i bas pendahin

16emas, pirak, tembaga ras besi. Genduari benakenlah erdahin janah TUHANlah ras kam."

17Iperentahken Daud kerina peminpin Israel nampati Salomo.

18Nina, "TUHAN Dibatandu nggo ngarak-ngarak kam kerina. Janah Ia si mereken dame man bandu i bas kerina dampar. Nggo IbereNa kutaluken kerina bangsa si ringan i negeri enda, janah genduari ia patuh man bandu ras man TUHAN.

19Genduari erdahinlah guna TUHAN Dibatandu asa ukurndu lit ras tendindu lit. Benaken mbangun Rumah Pertoton e, gelah banci itamakenndu i je Peti Perpadanen TUHAN ras kerina barang si ipergunaken ersembah man BaNa."


  Share Facebook  |  Share Twitter

 <<  1 Tawarikh 22 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran