Dual PanelPengawal Rumah Pertoton
1Enda me kalak Lewi si itetapken erdahin jadi pengawal Rumah Pertoton. I bas terpuk Korah eme Meselemia anak si Kore, i bas keluarga Asap nari.
2Meselemia lit pitu anakna dilaki isuratken rikut umurna eme: Sekaria, Jediael, Sebadia, Jatniel,
3Elam, Johanan ras Elyoenai.
4Bage pe Obet Edom si ipasu-pasu Dibata alu mereken waluh anak dilaki; isuratken rikutken umurna eme: Semaya, Jehosabat, Joah, Sakar, Netanel,
5Amiel, Isakar, ras Peuletai.
6Anak Obet Edom sintua dilaki eme Semaya. Semaya mupus enem anakna dilaki eme: Otni, Repael, Obet, Elsabat, Elihu ras Semakia. Kalak enda jadi kalak penting i bas terpukna erkiteken kebeluhenna. Elihu ras Semakia duana lit bakatna khusus.
7(1Taw 26:6)
8Keluarga Obet Edom ngelitken enem pulu dua kalak, kerina kalak pentar i bas pendahin jadi pengawal Rumah Pertoton.
9Keluarga Meselemia ngelitken sepulu waluh kalak, kalak pentar i bas dahin e.
10I bas terpuk Merari eme: Hosa; Hosa lit empat anakna dilaki eme Simri, Hilkia, Tehalia ras Sekaria. (Aminna pe Simei labo anak sintua tapi iangkat bapana ia jadi peminpin.) Kerina keluarga Hosa si jadi pengawal Rumah Pertoton lit sepulu telu kalak.
11(1Taw 26:10)
12Pengawal Rumah Pertoton ibagi i bas terpuk-terpuk rikutken keluarga-keluarga. Jenari idahikenna dahinna bali ras kalak Lewi si deban.
13Guna meteh arah pintu gerbang si apai keluarga-keluarga e ertugas, ibahan tikam tanduk. Keluarga si apai la erpilihen.
14Arah tikam tanduk e Selemia jadi pengawal pintu gerbang arah Timur, ras anakna Sekaria, eme si usur mereken nasehat si mehuli, jadi pengawal pintu gerbang si arah Utara.
15Obet Edom dat bagin pintu gerbang si arah Selatan janah anak-anakna dat bagin njaga gudang.
16Supim ras Hosa, dat bagin njaga pintu gerbang arah Barat ras pintu gerbang Salehet arah dalan ku das. Tugas njaga ibagi pegancih-gancih ergiliren.
17Arah Timur enem pengawal erjaga tiap wari; arah Utara empat pengawal, arah Selatan empat kalak. Empat pengawal njaga gudang-gudang tiap wari, dua pengawal tiap gudang.
18Deher papiliun arah Barat empat pengawal i bas dalan janah dua pengawal i bas papiliun e jine.
19Enda me tugas-tugas pendahin pengawal terpuk Korah ras terpuk Merari.
Pendahin si deban i bas Rumah Pertoton
20Senina sapih-sapih kalak Lewi jadi kepala perbendaharan Rumah Pertoton, ras gudang guna pemere si man sembahenken.
21Ladan anak Gerson si dilaki, jadi nini man piga-piga terpuk, atan pe nini man keluarga anakna Jehiel.
22Lit dua nari anak Ladan si dilaki si deban eme Setam ras Joel. Setam ras Joel jadi kepala perbendaharan Rumah Pertoton ras gudang.
23Kesusuren Amram, Ishar, Hebron ras Usiel pe itetapken tugasna.
24Sebuel i bas terpuk Gersom anak Musa eme kepala pegawai si erdahin guna perbendaharan Rumah Pertoton.
25Arah senina Gersom si Elieser Sebuel nggo erkade-kade Selomit. Elieser eme bapa Rehabia, bapa Jesia, bapa Joram, bapa Sikri, bapa Selomit.
26Selomit ras anggota-anggota keluargana ertanggung jawab kerna pemere man Dibata si ipersembahken Raja Daud, bage pe ngurus kepala-kepala keluarga, peminpin-peminpin terpuk, ras puanglima-puanglima meliter.
27Piga-piga barang rampasen perang ibaba kalak enda jenari iendeskenna e guna ipergunaken i bas Rumah Pertoton.
28Selomit ras keluargana ertanggung jawab guna tiap kali si nggo iendesken guna ipergunaken i bas Rumah Pertoton, subuk pemere i bas Nabi Samuel nari i bas Raja Saul nari, i bas Raja Daud nari, i bas Abner anak si Ner nari, ras i bas Joap anak si Seruya.
Pendahin kalak Lewi si deban
29I bas kesusuren Ishar nari Kenanaya ras anakna si dilaki tetap ndahiken tugas administrasi: muniken surat-surat ras mberesken perkara bangsa Israel.
30I bas kesusuren Hebron nari eme: Hasabia ras 1.700 kalak keluarga, kerina kalak si beluh, itamaken jadi kepala administrasi agama, ras perkara-perkara rayat i Israel arah Barat Lau Jordan.
31Jeria eme peminpin kesusuren Hebron. I bas tahun peempat puluhken Daud jadi raja, ibahan penelidiken kerna kesusuren Hebron enda. Ijumpai maka lit tentera-tentera si terberita i bas keluarga enda si tading i Jaser i daerah Gileat.
32Ipilih Raja Daud 2.700 kalak kepala keluarga si terberita i bas keluarga Jeria nari jenari itamakenna kalak enda jadi kepala pengurus kerina soal agama ras perkara rayat i Israel arah Timur Lau Jordan eme daerah Ruben, Gat, ras Manase Timur.