Dual PanelAbsalom ngerencanaken pemberontaken
1Kenca bage isikapken Absalom sada gereta ras kuda man bana, rikut ras lima puluh pengawal.
2Tiap wari lampas ia medak, jenari lawes ia tedis i tepi dalan deher pintun gerbang kota. Adi lit kalak reh ku je si atena ngaduken perkarana man raja minter ilebuh Absalom isungkunna i ja nari ia. Emaka kenca ikataken kalak ndai i bas suku si apai nari ia,
3nina Absalom, "Nen kam ipihak si bujur, tapi labo lit wakil i bas raja nari si megiken persoalenndu."
4Janah itambahi Absalom nina, "Bicara aku min jadi hakim tentu ise si lit perjengilenna ntah tuntutenna, banci reh man bangku janah kubereken keadilen man bana."
5Sanga ideheri kalak ndai Absalom, atena erjimpuh i lebe-lebena minter ijemakna, idakepna jenari iemana.
6Si enda ilakoken Absalom man tep-tep kalak Israel si reh ndahi raja ndatken keadilen. Emaka nggo dat Absalom ukur kalak ndai kerina.
7Kenca empat tahun nina Absalom man Raja Daud, "O Bapa lawes ateku ku Hebron nehken padan si kupadanken man TUHAN.
8Sanga aku tading i Gesur i Siria erpadan aku man TUHAN, adi ItaruhkenNa aku mulih ku Jerusalem kusembah Ia i Hebron."
9"Berkatlah alu mejuah-juah," nina raja. Emaka lawes Absalom ku Hebron.
10Tapi isuruhna utusen ku kerina suku Israel ngataken, "Sanga ibegindu sora terompet, ersuraklah kam nindu, 'Absalom nggo jadi raja i Hebron!'"
11Lit 200 kalak ikut idilo Absalom berkat ras ia i Jerusalem nari. Si 200 kalak e la meteh kai pe kerna komploten e, emaka ikut ia la lit sitik pe curiga.
12Sanga Absalom mpersembahken persembahen, itenahkenna ka Ahitopel i kota Gilo nari. Ahitopel penasehat Raja Daud. Komploten si ngelawan raja reh gegehna, janah pengikut Absalom tambah teremna.
Daud lompat i Jerusalem nari
13Sekalak utusen ngelapor man Daud, "Genduari ukur bangsa Israel nggo ngkapiti Absalom."
14Erkiteken si e nina Daud kempak kerina pegawaina i Jerusalem: mengongsilah kita! Bage nari nge ngenca maka banci kita pulah i bas Absalom nari. Lanai ndekah reh me ia. Pedasken gelah ula kita itundukna janah italukenna, dingen kerina penduduk kota enda ibunuhna.
15"Payo Raja," nina pegawai e njabapsa. "Kami sikap ndahiken kai si ikatakenndu."
16Jenari lawes raja ikut pe kerina keluargana, pegawai-pegawaina, seakatan sepuluh kalak gundikna tading lako njaga istana.
17Asum raja ras kerina anak buahna berkat nadingken kota e ngadi ia i rumah si perpudina.
18Kerina pegawai raja tedis i deherna asum pengawal peribadi raja mentas arah lebena. 600 kalak tentera i Gat nari pe mentas.
19Emaka nina raja man Itai peminpinna, "Ngkai maka kam ikut lawes ras kami? To mulihken tadinglah ras raja si mbaru. Kam kalak pertandang, pengungsi si la ringan i bas negerindu.
20Langa kam ndekah tading i jenda, dage ngkai maka kubahan kam ikut lajang-lajang ras aku? La kueteh ku ja tujunku lawes. To mulihkenlah janah baba kerina temanndu sebangsa ras kam. Mbera mehuli perbahan TUHAN man bandu janah setia Ia man bandu."
21Tapi ngaloi Itai, "O Raja, ersumpah aku man bandu i bas gelar TUHAN maka lalap ateku ras kam ku japa pe kam lawes, aminna pe arus aku ngasamken kesahku."
22"Merandal! Ota dage!" nina Daud. Jenari berkat Itai ras kerina anak buahna ras keluargana.
23Asum pengikut Daud lawes ngandung kerina rayat e alu megang sorana. Ikepari raja Lau Kidron, ras anak buahna erdalan ku taneh si mesawang.
24Imam Sadok pe ikut, bage pe kalak Lewi si mbaba Peti Perpadanen si badia. Iamparkenna Peti Perpadanen e janah la nai iangkatna seh kerina rayat nadingken kota e. Imam Abiatar pe i je.
25Jenari ngerana raja man Sadok, "Ulihken Peti Perpadanen ena ku kuta. Adi ngena denga ate TUHAN man bangku iberena denga nge aku pagi mulih ngenensa janah ngidah ingan tading Peti Perpadanen e.
26Tapi adi la AteNa ngena kempak LakokenNalah man bangku kai AkapNa mehuli."
27Jenari tole nina raja man Sadok, "Bagenda, kam ras anakndu Ahimas bage pe Abiatar ras anakna Jonatan mulih ku kota alu mejuah-juah.
28Sanga bage, aku nimai i dalan ngepar lau belin i taneh si mesawang, seh ngayak kualoken berita i bas kam nari."
29Emaka ibuat Sadok ras Abiatar Peti Perpadanen e, ibabana mulih ku Jerusalem janah ringan ia i jah.
30Inangkih Daud Deleng Saitun la ia ersepatu, janahna tangis; takalna itutupna tanda rate ceda. Kerina si ngikutken ia pe itutupina takalna janah ngandung.
31Asum ikataken man Daud maka Ahitopel pe nggo ikut berontak ras Absalom, ertoto Daud nina, "TUHAN siasiakenlah nasehat Ahitopel!"
32I datas tampuk uruk e lit ingan ersembah. Kenca Daud seh i je reh teman si ipercayai Daud, Usai kalak Arki, njumpai Daud alu uis merigat janah abu i bas takalna.
33Nina Daud, "Labo kam nampati aku adi iikutkenndu aku,
34tapi banci jadi isampatindu aku adi mulih kam ku kota, jenari turiken man Absalom maka genduari kam suruh-suruhenna si setia bagi nggo kam jadi pelayan bapana. Jenari lakokenlah asa ngasupndu kai saja ngelawan nasehat si ibereken Ahitopel.
35Imam Sadok ras Abiatar lit i jah; turiken man bana kai saja si ibegindu i istana raja.
36Anakna Ahimas ras Jonatan, pe ras ia i jah janah banci suruhndu duana ndahi aku maba berita si ipepulungndu."
37Emaka Usai teman Daud e mulihken ku kota si mbaru ingani Absalom.