Dual PanelIserbu bangsa Mesir kerajan Juda (1Raj 14:25-28)
1Kenca ipeteguhi Rehabeam kuasana jadi raja, ia ras kerina rayatna minter nadingken Undang-undang TUHAN.
2I bas tahun si pelimaken pemerentahen Raja Rehabeam TUHAN ngukum bangsa Juda erkiteken kini la patuhenna man TUHAN. Raja Sisak i Mesir nari, merang Jerusalem
3alu 1.200 tentera si ergereta kuda, 60.000 tentera si ngersak kuda, dingen tentera si la terbeligai teremna subuk kalak Libia, kalak Suki ras kalak Sudan.
4Italukenna kota-kota Juda si erbenteng jenari iasakna seh ku Jerusalem.
5Nabi Semaya lawes ndahi Raja Rehabeam ras peminpin-peminpin kerajan Juda si nggo pulung i Jerusalem erkiteken serangen Sisak e. Nina Semaya man bana kerina, "Enda tenah TUHAN man bandu, 'Nggo itadingkenndu Aku, emaka genduari Kutulak kam man Sisak.'"
6Igejap raja ras peminpin-peminpin emaka ia nggo erdosa, emaka nina, "Kai si ibahan TUHAN e bujur kap."
7Kenca idah TUHAN kerna si enda, reh ka kata TUHAN man Semaya nina, "Erkiteken nggo igejapna dosana la Kukernepken bangsa e. Tapi tupung iserang Sisak la piga kalak si pulah. Pernembeh ateKu la kerina Kucurcurken ku kota Jerusalem,
8tapi italuken Sisak ia, gelah ietehna nanamna uga lainna adi ia jadi suruh-suruhenKu ras adi ia jadi suruh-suruhen raja doni enda."
9Reh Raja Sisak nerang Jerusalem jenari irampasina erta-erta si lit i bas Rumah Pertoton ras i bas istana. Irampasina, ampang-ampang emas si ibahan Raja Salomo nai pe.
10Guna nggancih si e ibahan Rehabeam ampang-ampang tembaga, jenari isuruhna ikepkep kalak si njaga pintu gerbang istana.
11Tiap lawes raja ku bas Rumah Pertoton, ipake penjaga e ampang-ampang ndai; kenca bage iulihkenna ku bas rumah jaga.
12Erkiteken raja erpengendes man TUHAN emaka la ia keri kal ikernepken rawa TUHAN, emaka negeri Juda pe nggo jadi mehuli.
Ringkasen pemerentahen Rehabeam
13Rehabeam jadi raja i Jerusalem dingen ertambah-tambah kuasana. Sanga ia jadi raja umurna empat pulu sada tahun janah lit sepulu pitu tahun dekahna ia merentah i Jerusalem, eme kota si nggo ipilih TUHAN i bas daerah Israel nari jadi ingan ersembah man BaNa. Nande Rehabeam eme si Naama i negeri Amon nari.
14Rehabeam ngelakoken si jahat, erkiteken la iusahakenna ndarami si ngena ate TUHAN.
15Perbahanen Rehabeam mula-mulana nari seh kedungenna bage pe laporen kerna keluargana isuratken i bas Sejarah Nabi Semaya dingen i bas Sejarah Nabi Iddo. Rehabeam la erngadi-ngadi erperang ras Jerobeam.
16Rehabeam mate jenari ikuburken i bas kuburen raja i Kota Daud. Emaka anakna Abiya nggantiken ia jadi raja.