Dual PanelPerang ngelawan bangsa Midian
1Nina TUHAN man Musa,
2"Ukumlah bangsa Midian erkite-kiteken kai si nggo ibahanna man bangsa Israel. Kenca ibahanndu e, mate kam."
3Emaka ikataken Musa man bangsa Israel nina, "Ersikaplah guna erperang, gelah banci iperangndu bangsa Midian lako ngukum ia erkite-kiteken kai si nggo ibahanna man TUHAN.
4I bas tep-tep suku Israel nari suruhlah seribu kalak dilaki erperang."
5Emaka ipilih me seribu kalak i bas tep-tep suku nari, janah jumlahna kerina sepulu dua ribu kalak sikap guna erperang.
6Isuruh Musa ia kerina erperang ipinpin Pinehas anak Imam Eleasar, si ertugas ngurus barang-barang si badia ras terompet-terompet guna mereken tanda.
7Sue ras si iperentahken TUHAN man Musa, iserangna bangsa Midian, ibunuhna kerina dilaki,
8subuk lima kalak raja-raja Midian, eme: Epi, Rekem, Sur, Hur, ras Reba. Bilham anak Beor pe ibunuhna.
9Itaban bangsa Israel diberu-diberu bangsa Midian bage pe anak-anak, ibuatna lembuna ras biri-birina, irampasna kerina erta-ertana,
10janah icilukna kerina kota-kotana ras inganna erkemah.
11Ibuatna kerina barang-barang rampasen si nggo idatca e, subuk kalak si nggo itaban ras asuh-asuhen,
12jenari ibabana man Musa ras Eleasar bage pe man perpulungen bangsa Israel, si sangana i bas ingan erkemah i bas kendit Moap, i kepar-kepar Jordan petingtang ras Jeriho.
Mulih tentera ndai
13Musa, Eleasar, ras kerina peminpin-peminpin perpulungen e si deban lawes ndarat i bas ingan erkemah e nari ngalo-ngalo tentera e.
14Irawai Musa peminpin-peminpin tentera e, komendan-komendan batalion ras kepala-kepala pasuken si nggo mulih i bas pertempuren e nari.
15Isungkunina ia kerina nina, "Ngkai maka ipelepasndu kerina diberu-diberu e nggeluh?
16Inget maka diberu-diberu e nge si nggo iajar-ajari Bilham janah mabai bangsa enda lanai setia man TUHAN i Peor. Eme si nggo maba penakit si ngkenai nterem jelma i bas bangsa TUHAN.
17Emaka genduari bunuhlah tep-tep anak dilaki ras diberu si nggo ersada kula.
18Tapi pelepaslah nggeluh man sikerajangenndu kerina anak diberu ras kerina diberu-diberu si lenga pernah ersada kula.
19Genduari kerina kam si nggo munuh ntah pe si nggo ndadap mait arus tading i darat ingan erkemah pitu wari dekahna. I bas wari si peteluken ras pepituken bersihkenlah man bandu ras diberu-diberu si nggo itabanndu e.
20Bersihkenlah kerina paken ras barang-barang si ibahan i bas kulit, mbulu kambing ras i bas kayu nari."
21Ikataken Eleasar man kerina dilaki si nggo mulih i bas pertempuren nari, "Enda me peraturen-peraturen si nggo ibereken TUHAN man Musa.
22Tep-tep barang si la banci meseng, umpamana emas, pirak, tembaga, besi, timah-putih, ras timah-hitam, arus ibersihken arah api. Tapi barang si deban arus ibersihken alu lau pemurihi.
23(Bil 31:22)
24I bas wari si pepituken la banci la icucindu uisndu; kenca bage emaka kam nggo bersih rikutken peraturen agama jenari nggo banci kam bengket ku bas ingan erkemah e."
Pembagin barang rampasen
25Nina TUHAN man Musa,
26"Kam ras Eleasar bage pe ras peminpin-peminpin perpulungen e si deban, arus ngkira kerina si nggo itaban, ikut pe manusia ras asuh-asuhen.
27Bagiken kai si nggo ibuat e jadi dua bagin si seri, sada bagin man tentera e janah sada bagin man kerina perpulungen.
28I bas bagin sikerajangen tentera e nari buatlah jadi cuke man TUHAN sada i bas tep-tep lima ratus manusia tabanen janah bage ka pe bagin si man buaten i bas lembu, kelede, biri-biri, ras kambing.
29Berekenlah si e kerina man Imam Eleasar jadi sada pemere khusus man TUHAN.
30I bas bagin si ibereken man perpulungen e, buatlah sada i bas tep-tep lima puluh manusia tabanen nari janah bage ka pe bagin si man buaten i bas lembu, kelede, biri-biri, ras kambing. Berekenlah e man kalak Lewi si ertugas ngurus Kemah TUHAN."
31Iikutken Musa ras Eleasar kai si ipedahken TUHAN man bana.
32Si tersurat arah teruh enda eme kap surat rampasen si itaban tentera-tentera e, tambah-tambah kai si ibuatna man sikerajangenna: 675.000 biri-biri ras kambing, 72.000 lembu, 61.000 kelede, ras 32.000 singuda-nguda.
33(Bil 31:32)
34(Bil 31:32)
35(Bil 31:32)
36Si setengah jadi sikerajangen tentera e, eme 337.500 biri-biri ras kambing, janah beligai si jadi sikerajangen TUHAN eme 675; 36.000 lembu man tentera e, i bas si e nari pitu pulu dua man TUHAN; 30.500 kelede man tentera e, i bas si e nari enem pulu sada man TUHAN; 16.000 singuda-nguda man tentera e, i bas si e nari telu pulu dua man TUHAN.
37(Bil 31:36)
38(Bil 31:36)
39(Bil 31:36)
40(Bil 31:36)
41Emaka ibereken Musa man Eleasar cuke e jadi sada pemere khusus man TUHAN, bagi si nggo ipedahken TUHAN.
42Bagin sikerajangen perpulungen e bali ras si man tentera e: 337.500 biri-biri ras kambing, 36.000 lembu, 30.500 kelede, ras 16.000 singuda-nguda.
43(Bil 31:42)
44(Bil 31:42)
45(Bil 31:42)
46(Bil 31:42)
47I bas bagin enda nari ibuat Musa sada i bas tep-tep lima puluh manusia tabanen ras asuh-asuhen, janah bagi si nggo ipedahken TUHAN, iberekenna si e kerina man kalak Lewi si ertugas ngurus Kemah TUHAN.
48Kenca bage komendan-komendan si nggo minpin tentera e lawes ndahi Musa.
49Ngelapor ia nina, "O bapa, kerina tentera si ipinpin kami nggo ikira kami, janah sada pe la lit bene.
50Emaka ibaba kami perhiasen-perhiasen emas, gelang nahe, gelang tan, cincin, anting-anting, ras bura si idat kami sekalak-sekalak. Si enda kerina ipersembahken kami man TUHAN jadi tebus kesah kami, gelah kami tetap IkawaliNa."
51Musa ras Eleasar ngaloken emas e, si kerina i bas bentuk perhiasen.
52Jumlah berat pemere komendan-komendan e menam dua ratus kilo.
53Kalak si labo komendan, barang rampasen si idatna isimpanna saja man sikerajangenna.
54Emaka ibaba Musa ras Eleasar emas e ku bas Kemah e, gelah ikawali TUHAN bangsa Israel.