Alkitab Mobile SABDA
[VER] : [KARO]     [PL]  [PB] 
 <<  Hakim-hakim 10 >> 

Tola

1Kenca mate Abimelek, Tola anak Puah, kempu Dodo reh mbebasken Israel. Ia i bas suku Isakar nari janah ringan i Samir i deleng-deleng Eperaim.

2Ia jadi peminpin Israel dua pulu telu tahun dekahna. Kenca ia mate emaka ikuburken i Samir.

Jair

3Kenca Tola, keke ka Jair i Gileat nari. Ipinpinna Israel dua pulu dua tahun.

4Anakna lit telu puluh kalak si ngersak telu puluh kalde. Lit telu puluh kotana i negeri Gileat, janah seh asa genduari igelari kota-kota Jair.

5Mate si Jair emaka ikuburken i Kamon.

Jepta

6Bangsa Israel erbahan dosa denga man TUHAN alu nembah man Baal ras Astarte, bage pe man dibata-dibata Siria, Sidon, Moap, Amon ras Pilisti. Itadingkenna TUHAN janah ngadi ia nembah man BaNa.

7Emaka merawa TUHAN man bangsa Israel, janah IpelepasNa bangsa Pilisti ras bangsa Amon ngkuasaisa.

8Sepulu waluh tahun dekahna bangsa Pilisti ras Amon nindih ras ngayak-ngayak bangsa Israel si ringan i negeri bangsa Amori i Timur Lau Jordan i Gileat.

9Bangsa Amon pe ngepari Lau Jordan merangi suku Juda, Benyamin ras Eperaim. Israel lit i bas kiniseran si mbelin.

10Emaka erlebuh bangsa Israel ku TUHAN nina, "Nggo kami erdosa man BaNdu, erkiteken itadingken kami Kam, Dibata kami, janah isembah kami Baal."

11Ibereken TUHAN jabapen enda, "Bangsa Mesir, bangsa Amori, bangsa Amon, bangsa Pilisti,

12bangsa Sidon, bangsa Amalek, ras bangsa Maoni ndedeh kam i bas paksa si lepas, emaka erlebuh kam man bangKu. La kin kam Kuselamatken i bas kalak e nari?

13Tapi itadingkenndu kang Aku janah nembah man dibata-dibata si deban, emaka tetap nge ateKu lanai mulahi kam.

14To lebuh dibata-dibata si nggo ipilihndu. Suruh ia mulahi kam katawari kam i bas kiniseran."

15Tapi nina bangsa Israel man TUHAN, "Kami nggo erdosa. Bahanlah kai AteNdu, saja ngenca ngarap kami gelah IbebaskenNdu kami genduari."

16Emaka iambekkenna dibata-dibata si deban, jenari isembahna TUHAN. Emaka lanai tahan TUHAN ngidah kiniseran Israel.

17Kenca bage ersikap tentera bangsa Amon ku peperangen, janah erkemah ia i Gileat. Bangsa Israel pulung janah erkemah i kuta Mispa i Gileat.

18I jah nina bangsa Israel ras peminpinna sapih-sapih ia, "Ise pang arah lebe ngelawan bangsa Amon. Ia jadi peminpin kerina kalak si ringan i Gileat."


  Share Facebook  |  Share Twitter

 <<  Hakim-hakim 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran