Dual Panel1Begikenlah, o imam-imam! Perdiatekenlah, o bangsa Israel! Begikenlah, o kam kerina kesusuren raja-raja. Idabuhken me ukumen man bandu. Kam nggo jadi siding i Mispa, jadi banto i Deleng Tabor,
2jadi lubang perangkap si mbages i Sitim, emaka Kuukum me kam kerina.
3Kueteh nge kuga Israel; labo ia banci cebuni i bas Aku nari. Israel lanai patuh man bangKu, janah rayatna nggo ngeliami dirina."
Persinget gelah ula nembah man berhala
4Kejahaten si ilakoken bangsa e ngambati maka ia la mulih man Dibata. Perukuren kerna erlua-lua, eme nembah man berhala-berhala megegeh i bas ia, emaka la iakuina TUHAN.
5Ukur meganjang si lit i bas bangsa Israel ngaduken ia. Dosa-dosana mahanca ia tertuktuk janah jongkang, janah kalak Juda radu jongkang ras ia.
6Ibuatna biri-biri ras lembu jadi persembahen gelehen man TUHAN, tapi si e la erguna. La banci jumpa ia ras TUHAN, sabap nggo itadingken TUHAN ia.
7Sabap la ia setia man TUHAN, emaka anak-anakna pe labo sikerajangen TUHAN. Dage ia ras tanehna lampas me ikernepken.
Perang Juda ras Israel
8Embuslah tanduk i Gibea! Embuslah terompet i Rama! Surakkenlah surak-surak perang i Betel! Berkatlah ku peperangen, o kalak Benyamin!
9Wari ukumen reh me, emaka bene me Israel. O kalak Israel si enda la banci lang jadi.
10Nina TUHAN, "Nembeh ateKu perban peminpin-peminpin Juda nggo merangi Israel janah ipiserkenna batu perbalengen. Emaka Kucurcurken me ukumen man bana desken banjir.
11Israel nggo tertindas, remuk kena ukumen, sabap itetapkenna ukurna ngayak-ngayak si sia-sia.
12Perban si e Kukernepken me Israel ras Juda bali ras ngetnget encedaken barang-barang.
13Kenca iidah Israel uga kelekna penakitna, janah kenca iidah Juda luka-luka, emaka lawes me Israel ku Assur mindo penampat man raja si mbelin e, tapi labo ia ngasup pepalem penakit ras lukana.
14Kujerngem me Israel ras Juda desken singa, jenari Kucaing-caing seh getem, janah kenca bage Kutadingken. Adi Kusarenken ia, la ise pe ngasup mulahisa.
15Kutadingken bangsangKu seh cukup kiniseranna erkiteken dosa-dosana maka reh ia ndarami Aku. Banci jadi i bas kiniseranna icubakenna njumpai Aku."