Alkitab Mobile SABDA
[VER] : [KARO]     [PL]  [PB] 
 <<  Ibrani 11 >> 

Erkiniteken man Dibata

1Erkiniteken ertina tek nandangi kai si iarapken kita, tek kerna si la idah.

2Erdandanken kinitekenna kalak sinuria ipujiken Dibata.

3Erdandanken tek man Dibata kap maka siangka kerina si nasa lit Dibata njadikenca arah KataNa; kerina si teridah IjadikenNa i bas si la teridah nari.

4Erdandanken kiniteken Abil man Dibata maka ipersembahkenna man Dibata persembahen si ulin asangken persembahen Kain. Perbahan ia tek, dat pujin ia i bas Dibata nari maka ia kalak bujur, sabap ialoken Dibata persembahenna. Erdandanken tek maka ngerana denga ia genduari aminna pe ia nggo mate.

5Erdandanken kiniteken Enoh man Dibata maka la ia mate. Tapi ia iangkat ku Dibata, janah ise pe la ngasup njumpai ia, sabap ia nggo iangkat Dibata. I bas Pustaka Si Badia lit tersurat maka ope denga Enoh iangkat nggo leben ibahanna si sentudu ras peraten Dibata.

6Ise pe la ngasup ndalanken si sentudu ras peraten Dibata adi la kin erkiniteken. Sabap kerina si reh ndahi Dibata arus tek maka Dibata lit dingen IberekenNa upah man kalak si ndarami Ia.

7Erdandanken tek Nuah man Dibata maka ibegina kata pertenget i bas Dibata nari, kerna si nandangi reh si la idahna. Ikutkenna kata Dibata, jenari ibahanna sada perahu si dungna nelamatken ia ras keluargana. Erkiteken si e doni isalahken, janah Nuah ikataken Dibata benar erkiteken kinitekenna.

8Erdandanken tek Abraham man Dibata maka asum Dibata erdilo man bana, patuh ia, berkat ia ku negeri si ipadanken Dibata man bana. Itadingkenna negerina la ietehna ku ja ia lawes.

9Erdandanken tek man Dibata maka ia nggit lajang i bas negeri si nggo ipadanken Dibata man bana. Ia ringan i bas kemah bali ras Isak ras Jakup si ngaloken padan si seri i bas Dibata nari.

10Sabap Abraham nimai kuta si nggo irencanaken dingen ipanteki Dibata, e me kuta si nteguh palasna.

11Erdandanken tek Sara man Dibata maka banci mupus aminna pe ia nggo metua. Tek ia maka isehken Dibata kai si nggo IpadankenNa.

12Aminna pe paksa e nai Abraham tempa-tempa nggo mate, tapi i bas si sekalak enda nari reh kesusuren si nterem bagi bintang i langit dingen kersik i tepi lawit si la terbeligai.

13Kerina kalak enda mate i bas kiniteken. Kai si ipadanken Dibata la ialokenna, tapi i dauh-dauh nari nggo idahna si e, emaka meriah iakapna. Terang-terang iakuina maka ia kalak perlajang dingen kesilang i doni enda.

14Kalak si ngakui si e terang icidahkenna maka ia ndarami negeri si jadi negerina jine.

15Lanai atena tedeh nandangi negerina si mbarenda si nggo itadingkenna. Adi tedeh kin atena banci denga nge min ndai ia mulihken ku je.

16Tapi tedehen atena negeri si terulin, e me negeri si i Surga. E me sabapna maka la mela Dibata jadi Dibata kalak ndai, sabap nggo IsikapkenNa sada kuta man kalak enda kerina.

17Erdandanken tek Abraham man Dibata maka ipersembahkenna anakna Isak, asum ia iuji Dibata. Man Abraham me ibahan Dibata padan e, tapi amin bage gia nggit nge Abraham mpersembahken anakna si tonggal e.

18Nggo ikataken Dibata man Abraham, "Arah Isak me iterusken kesusurenndu."

19Tek Abraham maka Dibata erkuasa pekeke Isak i bas si mate nari; janah banci ikataken maka i bas si mate nari me ialoken Abraham si Isak.

20Erdandanken tek Isak man Dibata maka erpadan ia mereken pasu-pasu man Jakup ras Esau kerna kegeluhen kalak enda denggo.

21Erdandanken tek Jakup man Dibata me maka ipasu-pasuna anak Jusup sada-sadai ope denga ia mate. Alu erciken-ciken isembahna Dibata.

22Erdandanken tek Jusup man Dibata maka ngerana ia muatna mate kerna perberkat kalak Israel i taneh Mesir nari bage pe kerna kai si arus ibahan nandangi tulan-tulanna.

23Erdandanken tek orang tua Musa man Dibata maka ibunikenna Musa seh umur telu bulan. Idahna maka anak e seh kal jilena, la ia mbiar ngelawan peraturen si ibahan raja.

24Erdandanken tek Musa man Dibata maka kenca ia mbelin lanai ia nggit ikataken anak Putri Raja Mesir.

25Ulin iakapna ngenanami kiniseran ras bangsa Dibata asangken ntabeh kentisik i bas dosa.

26Igejapna maka ndauh ergan ngenanami kiniseran igombang-gombangi kalak guna Mesias e asangken kerina erta-erta negeri Mesir, sabap ia ngenehen upah si reh pagin.

27Erdandanken tek Musa man Dibata maka itadingkenna Mesir alu la mbiar man pernembeh raja. La ia nggit mulihken tempa-tempa idahna Dibata si la teridah e.

28Erdandanken kinitekenna e me maka ia ngelitken Paskah, janah isuruhna kalak mirpirken dareh ku pintun, gelah anak sintua dilaki i bas jabu kalak Israel ula ibunuh Malekat Kematen.

29Erdandanken tek man Dibata maka bangsa Israel banci ngepari Lawit Merah, tempa-tempa erdalan ia arah daraten. Asum kalak Mesir erdalan ka arah e, itelen lau e ia.

30Erdandanken tek bangsa Israel man Dibata maka runtuh benteng kota Jeriho kenca kalak Israel erdalan engkeleweti kota e pitu wari dekahna.

31Erdandanken Rahap, diberu si dahinna ndayaken dirina e, tek man Dibata me maka la ia ikut ibunuh ras kalak si ngelawan Dibata, sabap ialo-alona alu dame mata-mata kalak Israel e.

32Perlu denga kin kuterusken? Lanai aku sempat nuriken kerna Gideon, Barak, Simson, Jepta, Daud ras Samuel, bage pe kerna nabi-nabi.

33Erdandanken tek kalak enda man Dibata maka iperangina negeri-negeri dingen menang ia. Idalankenna kai persuruhen Dibata, emaka ialokenna kai si nggo ipadanken Dibata. Isompelna babah singa.

34Inimpetina api si mejin pergarana. Pulah ia i bas babah pedang nari. Kote ia, tapi dungna jadi megegeh. Megegeh ia i bas perang. Italukenna serdadu-serdadu bangsa si deban.

35Erdandanken tek diberu-diberu e man Dibata me maka ipekeke Dibata keluargana i bas si mate nari. Si debanna la nggit ngaloken kebebasen, tapi mate isiksa ia, gelah nggeluh ia mulihi ku bas kegeluhen si terulin.

36Lit isaling-saling dingen icambuk. Lit pe si igariken dingen si ipenjaraken.

37Lit ibenteri alu batu, lit ikeret duaken kulana alu gaji, janah lit ka pe ibunuh alu pedang. Perlajang ia erdalan-dalan makeken uis i bas kulit biri-biri ntah i bas kulit kambing nari; kalak enda musil, iayak-ayak, dingen isiksa.

38Lanai metunggung doni enda inganna! Bagi kalak si mengongsi ia ku gurun pasir bage pe ku deleng-deleng. Cebuni ia i bas guha bage pe i bas lubang.

39Mbelin kal kemenangen si idatken kalak enda erdandanken tek ia man Dibata. Amin bage gia langa bo ialokenna kai si nggo ipadanken Dibata.

40Sabap lit sura-sura Dibata si terulin man banta. Dibata ersura-sura maka raduken kita ngenca kalak ndai banci jadi serta.


  Share Facebook  |  Share Twitter

 <<  Ibrani 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran