Alkitab Mobile SABDA
[VER] : [KARO]     [PL]  [PB] 
 <<  Ibrani 3 >> 

Jesus belinen asangken Musa

1O senina-seninangku si sada kiniteken, si nggo pe ipilih Dibata! Ukurilah mbages-mbages kerna Jesus, e me Rasul ras Imam si Mbelin, si iakuken kita i bas kinitekenta.

2Jesus patuh man Dibata si milih Ia guna dahin e, bagi Musa nai patuh ndahiken dahinna i bas rumah Dibata.

3Kalak si majekken rumah lebih ipehaga asangken rumah e. Bage me Jesus, tunggungen Ia ipehaga asangken Musa.

4Tuhu kerina rumah lit si majekkenca, tapi Dibata nge njadiken kerina si nasa lit.

5Musa patuh erdahin i bas rumah Dibata bagi persuruhen. Iturikenna kai si pagin ikataken Dibata.

6Tapi Kristus patuh bagi Anak si ertanggung jabap i bas rumah Dibata. Kita enda me rumah Dibata adi tetap ukurta ergiah-giah dingen tek kita maka sidat nge kai si iarapken kita.

Pengadi-ngadin man anak-anak Dibata

7Emaka bagi si ikataken Kesah Si Badia, "Adi ibegindu sora Dibata wari enda,

8ula pemersik ukurndu bagi asum nai isimbakndu Dibata, bagi nai asum kam i gurun pasir, asum iujindu Dibata.

9I je me nai iuji ninindu Dibata, icubaina Aku nina Dibata, aminna pe idahna kai si nggo Kubahan kidekah empat puluh tahun.

10Erdandanken si emaka nembeh ateKu ia, alu ngataken, 'Megati ia nimbak, la ikutkenna pedah-pedahKu.'

11Merawa Aku dingen Ersumpah 'Ndigan pe ia la bengket ku bas pengadi-ngadinKu!'"

12O senina-seninangku, metengetlah gelah ula sekalak pe i bas kam jahat ukurna dingen la tek seh maka itundalkenna Dibata si Nggeluh e!

13Tapi gelah ula sekalak pe i bas kam itipu dosa seh maka mersik ukurna, siajar-ajarenlah kam tep-tep wari, kidekah kata "wari enda" bagi si tersurat i bas Pustaka Si Badia lit denga man banta.

14Sabap kita kerina nggo dat bagin i bas Kristus adi tetap kita tek bagi si tangtangna nai seh ku kedungenna.

15I bas Pustaka Si Badia lit tersurat, "Adi ibegindu sora Dibata sendah, ula pemersik ukurndu bagi nini-ninindu nai asum ia berontak ngelawan Dibata."

16Ise kin megi sora Dibata jenari isimbakna Dibata? E me kerina si ibabai Musa ndarat i Mesir nari.

17Ise kin si irawai Dibata kidekah si empat puluh tahun e? E me kalak si erbahan dosa, si mate i gurun pasir.

18Ise kin kata Dibata asum Ia Ersumpah "Ndigan pe la ia bengket ku bas pengadi-ngadinKu?" Tentu kalak si nimbak Dibata!

19Dage nggo sieteh maka labo ia banci bengket sabap la ia tek.


  Share Facebook  |  Share Twitter

 <<  Ibrani 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran