Dual PanelIsak tubuh
1Ipasu-pasu TUHAN Sara bagi si nggo IpadankenNa.
2Emaka mehuli me kula Sara, jenari ipupusna sekalak anak dilaki man Abraham kenca ia nggo metua. Anak e tubuh ibas paksa si nggo itentuken Dibata, payo bagi si nggo KatakenNa mbarenda.
3Ibahan Abraham gelarna Isak,
4janah nggo kenca waluh wari umurna isunatken Abraham ia, bagi nggo iperentahken Dibata.
5Nggo 100 tahun umur Abraham sanga Isak tubuh.
6Nina Sara, "Nggo ibaba Dibata man bangku keriahen ras pertawan. Emaka kasa kai kalak si megisa la banci lang tawa ras aku."
7Nina Sara tole, "Ise ndube si lit ngataken man Abraham maka Sara banci pepinemken? Aminna bage gia nggo kupupus sada anak dilaki man bana kenca ia nggo metua."
8Tambah warina tambah belinna anak e, janah i bas warina ia ngadi minem, ibahan Abraham sada kerja man-man si mbelin.
Hagar ras Ismael isuruh lawes
9I bas sada wari, Ismael anak Abraham si ipupus Hagar, kalak Mesir e, main-main ras Isak anak Sara.
10Iidah Sara kalak enda, emaka nina man Abraham, "Suruh budak e lawes ras anakna. Anakna e, la banci daten tading-tadingenndu si arus ialoken anakku Isak."
11Erkiteken si e gulut ukur Abraham, sabap Ismael pe anakna kang.
12Tapi nina Dibata man Abraham, "Ula aru atendu kerna anak e ras budakndu Hagar. Bahanlah bagi si ikataken Sara man bandu, erkiteken arah Isak nge rehna sinursurndu si nggo Kupadanken e.
13Man anak budak e pe Kubereken nge anak nterem, gelah ia jadi sada bangsa. Sabap ia pe anakndu nge."
14Pepagina, lampas erpagi-pagi ibereken Abraham man Hagar pangan bage pe sada ingan lau si ibahan i bas kuling-kuling nari si dem isina. Ipetembahkenna anak e ku gurung Hagar, jenari isuruhna lawes. Emaka lawes Hagar, mampa-mampa ia ibas taneh si mesawang Berseba.
15Kenca nggo keri lau si ibabana ndai, iamparkenna anakna e i teruh batang kayu kitik-kitik.
16Ia jine kundul i bas ingan si deban kira-kira 100 meter dauhna. Nina i bas ukurna, "La aku ngasup ngenen anakku mate." Sanga ia kundul ije mulai me anak e tangis.
17Ibegi Dibata sora anak e tangis, emaka ngerana malekat Dibata i langit nari man Hagar, "Kai kiniseranndu Hagar? Ula mbiar. Nggo ibegi Dibata sora anakndu serko.
18Kekeken, legi lah janah pesinik lah ia sabap Kujadiken pagi kesusurenna jadi sada bangsa si mbelin."
19Kenca bage ipemedakken Dibata mata Hagar, emaka idahna me sada sumur. Emaka lawes ia i isina me kuling-kuling ingan lau ndai, jenari iberena minem anakna.
20Dibata nemani anak e, erbelinna ia; ringan ia i taneh mesawang Paran. Ia jadi sekalak perburu si beluh.
21Ibuat nandena sekalak diberu bangsa Mesir man ndeharana.
Perpadanen Abraham ras Abimelek
22I bas sada paksa sanga lawes Abimelek ras puanglimana Pikol, nina man Abraham, "Dibata ras kam i bas kerina si idahikenndu.
23Emaka ersumpahlah i lebe-lebe Dibata maka la itebu-tebundu aku, anak-anakku, ntah pe kesusurenku. Bagi perbahanenku bujur man bandu, erpadanlah maka kam pe bujur ka nge perbahanenndu man bangku, ras man negeri si iani kam genduari e."
24Nina Abraham, "Erpadan aku."
25Tapi ituriken Abraham keberatenna man Abimelek kerna sumur si irampas suruh-suruhen Abimelek alu paksa.
26Nina Abimelek, "La kueteh ise ngelakokenca e. Kam pe la ngata bangku, janah sekali enda denga nge kubegi kerna si e."
27Jenari ibereken Abraham piga-piga biri-biri ras lembu man Abimelek, emaka erbahan perpadanen kalak enda duana.
28Iserapken Abraham pitu anak biri-biri permakanenna,
29emaka isungkun Abimelek ia nina, "Kai ertina maka iserapkenndu anak biri-biri si pitu e."
30Ijabap Abraham, "Alokenlah anak biri-biri enda pituna. Alu ngaloken si e, kam jadi saksi maka aku nge kalakna si ngkali sumur e."
31Erkiteken si e ingan e igelari Berseba sabap ije me kalak enda duana ersumpah.
32Kenca nggo dung ibahanna perpadanen e i Berseba, mulih me Abimelek ras Pikol puanglimana ku negeri kalak Pilisti.
33Jenari isuan Abraham sada batang kayu tamariska i Berseba, jenari nembah ia man TUHAN, Dibata Si Rasa lalap.
34Ndekah Abraham ringan i negeri kalak Pilisti.