Alkitab Mobile SABDA
[VER] : [KARO]     [PL]  [PB] 
 <<  Kejadian 37 >> 

Jusup ras seninana

1Jakup tetap tading i taneh Kanaan ingan bapana mbarenda.

2Enda me turi-turin keluarga Jakup. Jusup eme sekalak anak Jakup. Tupung umur sepulu pitu tahun, ia ermakan biri-biri ras senina-seninana anak Bilha ras Silpa, duana gundik bapana. Kerina perbahanen seninana si la mehuli iturikenna man bapana.

3Ngenan ate Jakup man Jusup asa man kerina anakna si deban, erkiteken Jusup tubuh kenca ia nggo metua. Ibanna baju jubah si mejile man Jusup.

4Kenca nggo ieteh senina-seninana maka kelengen ate bapana man Jusup asang man kalak enda kerina, nembeh kal atena man seninana Jusup, seh maka ngerana pe lanai ia meriah.

5I bas sada berngi ernipi Jusup, janah kenca iturikenna nipina e man senina-seninana, ernembehna atena ngenen Jusup.

6Bagenda nina Jusup, "Begikenlah nipingku.

7Kita kerina sangana i juma ngerakuti gandum, jenari gandumku si nggo kurakuti e keke, tedis ia. Kerina berkisen gandumndu engkeleweti berkisen gandumku, kenca bage mungkuk ia kerina man berkisen gandumku e."

8"Ntah akapndu kam raja janah merentah kami?" nina senina-seninana nungkun. Emaka ernembehna atena erkiteken kerina nipina ras kasakai si iturikenna kerna si e.

9Kenca bage ernipi ka Jusup. Nina man senina-seninana, "Ernipi denga ka aku, kuidah matawari, bulan, ras sepulu sada bintang mungkuk man bangku."

10Man bapana pe iturikenna ka nipina e, emaka isergangi bapana ia, "Nipi kai kin e? Akapndu kin maka nandendu, senina-seninandu ras aku, reh mungkuk man bandu?"

11Cian ate senina-seninana kerina man Jusup, tapi bapana rukur kerna si e kerina.

Jusup idayaken jenari ibaba ku Mesir

12I bas sada wari sanga senina-senina Jusup lawes ku Sikem ermakan asuh-asuhen bapana,

13nina Jakup man Jusup, "To lawes kam ku Sikem, ku ingan senina-seninandu ermakan." Nina Jusup njabapsa, "Banci, Bapa."

14Nina bapana man Jusup, "To nen senina-seninandu ntah mejuah-juah nge ia, bage pe asuh-asuhen kerina ntah labo kena kai pe. Kenca bage mulih kam janah turiken man bangku." Emaka isuruh bapana ia lawes i baluren Hebron nari. Dungna seh me Jusup i Sikem.

15Isiar-siarna mbal-mbal e. Emaka lit sekalak dilaki ngidahsa, janah isungkunna Jusup nina, "Kai daramenndu e?"

16"Aku ndarami senina-seninangku si sangana ermakan asuh-asuhenna," nina njabapsa. "Tehndu kang i ja inganna ermakan?"

17Nina dilaki ndai, "Ia nggo lawes kerina jenda nari. Kubegi ia ngerana maka ku Dotan atena lawes." Emaka iterusken Jusup perdalanenna ngikuti seninana, janah dungna tunduksa i Dotan.

18Idauh-dauh nari nggo idah senina-seninana Jusup reh. Ope denga Jusup seh nggo ersada arih senina-seninana munuh ia.

19Nina senina-seninana sapih-sapih ia, "Ah nggo reh si pernipi-nipi.

20Mari sibunuh ia, jenari siambekken maitna ku bas sada sumur si kerah enda. Sikataken kari maka ia nggo ibunuh rubia-rubia si merawa. Jenari siidah me kai jadina nipina e kerina."

21Ibegi Ruben rencana kalak enda. Emaka icubakenna nelamatken Jusup nina, "Ula sibunuh ia.

22Siambekken saja ku bas sumur si lit i bas taneh si mesawang enda, tapi ula sisakiti ia." Maka bagenda nina, ipulahina atena Jusup janah nuruh ia mulih ku bapana.

23Kenca seh Jusup ku senina-seninana, isintapkenna jubah Jusup si mejile e.

24Emaka irintakna Jusup, iambekkenna ku bas sumur si nggo kerah.

25Sanga ia man kerina rempet idah kalak enda sada rombongen kalak Ismael i bas perdalanen i Gileat nari ku Mesir. Unta kalak enda erbaban damar, kumenen, duruh si merim.

26Nina Juda man senina-seninana, "Kai gunana sibunuh gia seninanta ras si rahasiaken pemunuhen e?

27Sidayaken sajalah ia man kalak Ismael enda. Alu bage la perlu sisakiti ia. Lang pe seninanta sada dareh sada daging nge ia." Payo iakap senina-seninana katana e,

28emaka sanga mentas perbinaga bangsa Midian e, irintak kalak enda Jusup ndarat i bas sumur ndai nari, idayakenna man bangsa Ismael e, ergana dua puluh duit pirak. Ibaba bangsa Ismael me Jusup ku Mesir.

29Sanga Ruben reh mulihken ku sumur e, lanai idapetina Jusup i je. Icaingkenna uisna perban ceda kal atena.

30Idahina senina-seninana nina, "Lanai i je anak ndai! Uga naring e perbanku?"

31Emaka igeleh kalak enda sada kambing, icelupkenna jubah Jusup ku bas dareh kambing e.

32Ibaba kalak enda e man bapana nina, "Idat kami jubah enda. Jubah anakndu nge e?"

33Minter itandaina jubah e, emaka nina, "Payo, enda jubah anakku Jusup. Nggo ibunuh rubia-rubia si merawa ia. Ugapa pe anakku Jusup nggo icaing-caingna."

34Icaingken Jakup uisna, jenari ipakena baju guni perban ceda kal atena. Itangisina anakna e erwari-wari dekahna.

35Kerina anakna si dilaki ras si diberu reh ngapuli ia, tapi la ia nggit iapuli. Nina, "Lawes pe aku ku bas doni kalak mate, lalap kutangisi anakku." Bage me tetap ia erceda ate erkiteken anakna Jusup.

36Sanga si e, i Mesir, kalak Midian e nggo ndayaken Jusup man sekalak pegawai raja, Potipar gelarna. Ia sekalak kepala pengawal istana.


  Share Facebook  |  Share Twitter

 <<  Kejadian 37 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran