Alkitab Mobile SABDA
[VER] : [KARO]     [PL]  [PB] 
 <<  Kejadian 38 >> 

Juda ras Tamar

1Kira-kira i bas paksa e ka, Juda lawes nadingken senina-seninana. Kenca bage tading ia ras sekalak dilaki gelarna Hira anak kota Adulam.

2I jah jumpa Juda ras sekalak singuda-nguda kalak Kanaan; gelar bapana Sua. Erjabu ia ras.

3Ipupusna sada anak dilaki, ibahanna gelarna Er.

4Mehuli ka kulana, emaka tubuh ka anakna dilaki; ibahanna gelarna Onan.

5Kenca bage tubuh denga ka tole anakna; ibahanna gelarna Sela. Sanga tubuh Sela, Juda sangana i Aksip.

6Ibuat Juda diberu man ndehara anakna Er, gelarna Tamar.

7Lagu langkah Er seh jahatna; erkiteken si e la ngena ate TUHAN emaka ibunuh TUHAN si Er.

8Kenca bage nina Juda man anakna Onan, "To lako mangani perkakanndu. Sehken tanggung jawabndu man bana selaku senina perbulangenna, gelah lit kesusuren kakandu."

9Tapi ieteh Onan maka anak-anak e labo pagi jadi anakna. Emaka sanga ia ersada kula ras perkakanna e, la ipelepasna lit anak kakana, alu ngamburkenca ku taneh.

10Perbahanenna e la mehuli iakap TUHAN, emaka ia pe ibunuh TUHAN ka.

11Kenca bage nina Juda man permenna, "Mulih saja kam ku rumah bapandu; mbalu kam lebe nimai anakku Sela mbelin." Bage nina perban mbiar ia ntah Sela pe mate ka denggo bagi kakana si dua e. Erkiteken si e mulih Tamar ku rumah bapana.

12Piga-piga paksa kenca si e, mate diberu si Juda. Kenca lepas wari erceda ate, ia ras temanna Hira, anak kuta Adulam, lawes ku Timna, ingan ngguntingi biri-birina.

13Lit kalak si ngatakenca man Tamar, "Bengkilandu lawes ku Timna ngguntingi mbulu biri-birina."

14Emaka itangtangi Tamar uis mbalu si ipakena; itutupina ayona alu tudung, kundul ia i kerabangen kota Enaim, dalan ku Timna. Ieteh Tamar maka Sela, anak Juda si nguda nggo anak perana, tapi lalap langa ia ipejabuna ras Tamar.

15Sanga Juda ngidah Tamar, akapna ia pendahinna erlua-lua, erkiteken itutupina ayona.

16Ideherina Tamar ku tepi dalan e, janah nina, "Asa kai kam igalari?" (La ietehna maka permenna kap e.) Nina Tamar, "Kai kin atendu iberekenndu bangku?"

17Nina njabapsa, "Kutenahken bandu sada anak kambing i bas asuh-asuhenku nari." Nina Tamar, "Banci, asal lit iberekenndu bangku barang jaminen seh itenahkenndu kambing e."

18"Kai atendu kubereken bandu jaminenna?" nina Juda nungkun. Ngaloi diberu e nina, "Cincin stempelndu ras rantendu bage pe ciken si ibabandu ena." Ibereken Juda barang-barang e man Tamar. Kenca ersada kula kalak enda, emaka mehuli me kula Tamar.

19Mulih Tamar ku rumah, italangina tutup ayona, ipakena ka paken mbalu.

20Isuruh Juda temanna Hira, mbaba kambing e gelah ibabana mulih barang jaminen e i bas diberu e nari tapi Hira la jumpa rassa.

21Isungkunna piga-piga dilaki i Enaim nina, "I ja diberu si i tepi dalan enda mbarenda?" Nina kalak ndai ngaloi, "La kap pernah lit i jenda diberu si pendahinna erlua-lua."

22Mulih Hira ndahi Juda janah nina, "La aku jumpa rassa. Nina kalak si i je la pernah lit diberu si pendahinna erlua-lua i je."

23Nina Juda, "Pelepas ibunikenna barang-barang e, gelah ula kita itawai jelma si nterem. Nggo kuusahaken nggalarisa, tapi la kam jumpa rassa."

24Kira-kira telu bulan kenca si e, lit si ngatakenca man Juda, "Permenndu Tamar nggo ceda perlangkahna, janah genduari nggo mehuli kulana." Iperentahken Juda nina, "Baba ia ndarat, ciluk seh mate."

25Sanga Tamar ibaba ndarat, ipesehna kata man bengkilana, "Aku mehuli kula erkiteken sekalak dilaki, si mada barang-barang enda. Nen me barang-barang enda, ise empuna cincin pukul ras rante enda, bage pe ciken enda."

26Itandai Juda barang-barang e, emaka nina, "Labo ia si ersalah. Aku nge si la nehken tanggung jawabku man bana. Arusna kupejabu ia ras anakku Sela." Jenari lanai pernah Juda ersada kula ras ia.

27Kenca nggo seh paksana ia mupus ietehna maka ia mupus anak rindu.

28Sanga mesera iakapna, ndarat sada tan anakna. Itangkap bidan tan anak e irakutina alu benang megaranina, "Enda sintua."

29Tapi irintak anak e ka tanna mulihi, emaka agina nge lebe tubuh. Nina bidan e, "Ipaksakenna kepe bana ndarat!" Emaka Peres ibanna gelarna.

30Kenca emaka tubuh ka seninana, janah benang megara e i bas tanna, janah Sera ibanna gelarna.


  Share Facebook  |  Share Twitter

 <<  Kejadian 38 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran