Alkitab Mobile SABDA
[VER] : [KARO]     [PL]  [PB] 
 <<  Kisah Para Rasul 13 >> 

Barnabas ras Saul ipilih dingen iutus Perpulungen Antiokia

1I bas perpulungen i Antiokia lit piga-piga kalak nabi ras guru. Gelarna, Barnabas, Simeon (igelari si Mbiring), Lusius (kalak Kireni), Manaen (anak angkat Raja Herodes) ras Saul.

2Sekali, asum kalak enda erbahan kebaktian man Tuhan dingen erpuasa, ngerana Kesah Si Badia man bana nina, "Peserap Barnabas ras Saul man bangKu, guna ndahiken dahin si nggo Kutetapken man bana."

3Emaka erpuasa dingen ertoto kalak e. Janah kenca ipasu-pasuna Barnabas ras Saul alu namaken tanna ku babona, ipeberkatna ia duana.

Barnabas ras Saul i Kiprus

4Barnabas ras Saul si isuruh Kesah Si Badia berkat ku Selukia. I jenari erlayar ia ku pulau Kiprus.

5Kenca seh ia i Salamis iberitakenna Kata Dibata i bas rumah persembahen kalak Jahudi. Johanes Markus ikut ras ia guna nampati i bas dahin e.

6Isiarina kerina pulau e seh ku Papos. I Papos jumpa ia ras sekalak tukang sihir, gelarna Baryesus. Ia kalak Jahudi. Ikatakenna maka ia sekalak nabi.

7Ia meriah ras Gubernur pulau e. Gubernur e kalak pentar, gelarna Sergius Paulus. Idilo Gubernur e Barnabas ras Saul sabap atena megiken Kata Dibata.

8Tapi Barnabas ras Saul iolang-olangi Elimas (enda gelar tukang sihir e i bas cakap Junani). Iusahaken Elimas gelah ula tek Gubernur e.

9Tapi Saul si igelari Paulus dem Kesah Si Badia. Ijerlengna tukang sihir e.

10Jenari nina, "O anak Iblis! Kam kap musuh kerina si mehuli! Kam jahat kal dingen penipu, janah la erngadi-ngadi iusahakenndu encedaken rencana Tuhan engkelini manusia.

11Genduari ukumen i bas Tuhan nari reh man bandu; pentang me kam, janah piga-piga wari dekahna la kam ngidah terang." Minter gelap pengidah Elimas. Perbahan si e dadap-dadap ia ndarami kalak si nggit negu ia.

12Tek Gubernur e man Tuhan, kenca idahna kai si nggo jadi. Mamang kal atena megi pengajaren kerna Tuhan.

Barnabas ras Paulus i Antiokia -- Pisidi

13Paulus ras teman-temanna nadingken Papos, jenari erlayar ku Perge i propinsi Pampilia. Tapi Johanes Markus nadingken kalak e i je, janah mulihken ia ku Jerusalem.

14Paulus ras Barnabas nerusken perdalanenna, janah seh ia i Antiokia i daerah Pisidi. Sanga wari Sabat kalak Jahudi bengket ia ku bas rumah persembahen, dingen kundul i je.

15Kenca ioge kitap Undang-undang Musa ras kitap nabi-nabi, emaka isuruh pengulu rumah persembahen sekalak ndahi Barnabas ras Paulus guna ngataken, "O senina-senina, adi lit pedahndu man jelma si nterem enda, ngarap kami maka kam ngerana."

16Emaka tedis Paulus. Alu tanna ibahanna tanda man kalak si nterem. Jenari ibenakenna ngerana nina, "O kalak Israel bage pe kam kerina kalak si deban si nembah man Dibata, begikenlah.

17Dibata si isembah kalak Israel nggo milih nini-nininta janah nggo IbahanNa jadi sada bangsa si mbelin asum nai ia ringan i taneh Mesir jadi kalak pertandang. Nggo ipulahi Dibata bangsa e i Mesir nari alu KuasaNa si mbelin.

18Janah empat puluh tahun dekahna iarak-ArakNa i taneh gurun pasir.

19IkernepkenNa pitu bangsa i taneh Kanaan janah IberekenNa taneh e jadi si kerajangen BangsaNa.

20Si enda ndai kerina jadi kira-kira empat ratus lima puluh tahun dekahna. Kenca bage IberekenNa puanglima-puanglima guna ngaturken bangsa e seh ku masa nabi Samuel.

21Janah asum ipindoken bangsa e sekalak raja, ibereken Dibata man bana Saul, anak Kis i bas suku Benyamin nari. Ia erkuasa empat puluh tahun dekahna.

22Kenca itulak Dibata si Saul, iangkat Dibata si Daud jadi raja. Dibata nggo ngerana kerna Daud nina, 'Daud anak Isai, ia me si ngena ateKu. Ia me si nehken kerina sura-surangKu.'

23Janah i bas kesusuren Daud e nari me ipekeke Dibata si Engkelini bangsa Israel, eme Jesus, bagi nai nggo ipadanken Dibata.

24Ope denga Jesus menaken DahinNa, nggo leben Johanes erlebuh man kalak Israel gelah jera dingen iperidiken.

25Janah asum nandangi dung dahin Johanes nina man kalak si nterem, 'Ise kin iakapndu aku? Labo aku si itimai-timaindu e. Tapi nehenlah! Ia reh arah pudingku. Jadi juak-JuakNa pe aku la metunggung.'

26O senina-senina, subuk kam kesusuren Abraham, bage pe kalak si deban si nembah man Dibata: man banta me berita keselamaten enda ipeseh!

27Sabap kalak si ringan i Jerusalem ras peminpin-peminpin la nandai Ia. La ibegikenna pe kata nabi-nabi si iogeken tep-tep wari Sabat. Tapi si tuhuna alu ngukum Jesus, nggo isehken kata nabi-nabi e.

28Janah aminna gia la idatna kesalahen si sue ras ukumen mate, ipindokenna man Pilatus gelah Jesus e ibunuh.

29Janah kenca isehkenna kerina si tersurat i bas Pustaka Si Badia kerna Ia, ipesusurna Ia i kayu persilang nari jenari itamakenna ku bas kuburen.

30Tapi Dibata mpegeluh Ia mulihi.

31Janah piga-piga wari dekahna icidah-CidahkenNa BaNa man kalak si ras Ia i Galilea nari ku Jerusalem. Genduari kalak enda si naksiken kerna Jesus man bangsa Israel.

32Janah genduari kami i jenda nehken Berita Si Mehuli man bandu. Kai si nggo ipadanken Dibata man nini-nininta nai, nggo IsehkenNa genduari man banta anak-anakna alu pegeluh Jesus mulihi. Bagi nggo isuratken i bas Masmur si peduaken, 'Kam me AnakKu; sendah Aku nggo jadi BapaNdu.'

33(Kis 13:32)

34Dibata nggo pekeke Ia i bas si mate nari janah lanai Ia melengas. Si enda ikataken Dibata i bas bagin si deban nina, 'Kubereken pagi man bandu pemere si tuhu-tuhu dingen badia, si nggo Kupadanken man Daud.'

35Bage ka pe lit tersurat i bas masmur si deban, 'La IpelepasNdu PersuruhenNdu si setia e melengas.'

36Sanga Daud nggeluh, idalankenna kerina sura-sura Dibata i bas paksa e. Janah kenca ia mate, ikuburken ia ras ninina janah melengas pe kulana i bas kuburen.

37Tapi Ia si nggo ipekeke Dibata i bas si mate nari, la ngenanami si melengas e.

38Dage o senina-seninangku kerina, perlu pe ietehndu maka arah Jesus eme berita pengalemi dosa isehken man bandu. Perlu pe ietehndu maka adi tek kam man Jesus kam ibebasken i bas kerina ukumen-ukumen nari, i ja Undang-undang Musa la ngasup mulahi kam.

39(Kis 13:38)

40Emaka metengetlah gelah ula jadi i bas kam kai si nggo isuratken nabi-nabi nina,

41'Begikenlah, o kalak si megombang! Senggetlah dingen masaplah! Sabap dahin si kudahi sanga kam nggeluh denga eme sada dahin si la kam tek aminna gia lit kalak si nurikenca man bandu!'"

42Asum Paulus ras Barnabas nadingken rumah persembahen e, ipindoken kalak si nterem e gelah reh ka ia i bas wari Sabat si rehna guna nuriken tole kerna pengajaren e.

43Kenca sirang kebaktin e, nterem kalak Jahudi ras kalak si nggo bengket ku bas agama Jahudi ngikutken Paulus ras Barnabas. Iajuk rasul-rasul e ia kerina gelah ia tetap nggeluh i bas lias ate Dibata.

44I bas wari Sabat si rehna menam kerina anak kuta e reh megiken kata Dibata.

45Asum idah kalak Jahudi kalak si nterem e, cian atena. Ikatakenna maka kai si ikataken Paulus e la tuhu janah ihinana pe rasul e.

46Tapi ngaloi Paulus ras Barnabas alu la biar-biaren nina, "Tuhu maka arus man bandu lebe Kata Dibata ipeseh. Tapi perbahan itulakndu, janah iakapndu maka la kam metunggung ngaloken kegeluhen si tuhu-tuhu si rasa lalap, emaka lawes kami ku bangsa-bangsa si deban.

47Sabap Tuhan nggo nuruh kami alu KataNa, 'Nggo kutetapken kam jadi terang man kalak si la nandai Dibata, arah kam me keselamaten seh ku kerina doni!'"

48Megi si enda meriah ukur kalak si langa nandai Dibata jenari ipujina Tuhan erkiteken KataNa. Janah kalak si nggo ipilih Dibata gelah ngaloken kegeluhen si tuhu-tuhu si rasa lalap, jadi tek.

49Kata Tuhan mbar ku belang-belang daerah e.

50Tapi iajuk-ajuk kalak Jahudi diberu-diberu si tergolong ihamati kalak, si tutus nembah man Dibata, bage pe pembesar-pembesar kuta e, gelah ilawanna Paulus ras Barnabas. Emaka mulai me isiksa kalak ndai Paulus ras Barnabas jenari ipelawesna ia i bas daerah e nari.

51Iapusi Paulus ras Barnabas abu i bas tapak-tapak nahena jadi sada tanda persinget kempak kalak e. Jenari lawes ia ku Ikoni.

52Ajar-ajar si i Antiokia dem alu keriahen dingen Kesah Si Badia.


  Share Facebook  |  Share Twitter

 <<  Kisah Para Rasul 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran