Alkitab Mobile SABDA
[VER] : [KARO]     [PL]  [PB] 
 <<  Matius 2 >> 

Guru-guru i Timur nari

1Jesus tubuh i kuta Betlehem i taneh Judea asum Herodes jadi raja. La ndekahsa kenca si e reh ku Jerusalem piga-piga kalak guru i Timur nari.

2Nungkun guru-guru Timur e nina, "I ja kin anak si tubuh raja kalak Jahudi e? Sabap idah kami bintangna arah Timur, janah ate kami ersembah man BaNa."

3Sengget Raja Herodes bage pe kerina anak kota Jerusalem megi berita enda.

4Perbahan si e ipepulung Raja Herodes kerina imam-imam si mbelin ras guru-guru agama Jahudi. Jenari nungkun ia nina, "I ja kin Raja Penampat e tubuh?"

5Erjabap kalak e nina, "I kuta Betlehem i taneh Judea, sabap nggo isuratken nabi:

6'O kam Betlehem i taneh Juda, labo kam kuta si kitikna i daerah Juda; sabap i bas kam nari reh me sekalak peminpin si mpermakani BangsaNgku bangsa Israel.'"

7Kenca megi kai si ikataken e, idilo Herodes guru-guru i Timur nari e alu erbuni-buni. Jenari isungkunina ndiganai bintang e mulai teridah.

8Kenca bage isuruhna guru-guru e lawes ku Betlehem. Nina, "Berkatlah janah pepayo alu mehuli i ja ingan anak e, janah adi nggo kam jumpa, beritaken man bangku, gelah aku pe ku jah nembah man BaNa."

9Kenca bage berkat guru-guru Timur e. Idahna ka bintang si nggo idahna mbarenda i Timur. La tanggung riahna ukurna ngidahsa. Bintang e erdalan arah lebena jenari ngadi tepat i babo ingan anak e.

10(Mat 2:9)

11Emaka bengket ia ku bas idahna Anak ndai ras Maria, NandeNa. Jenari erjimpuh ia nembah Anak e. Ibuatna erta-erta si ibabana e, jenari ipersembahkenna man Anak si mbaru tubuh e. Erta-erta si ipersembahkenna e, eme: emas, kumenen ras mur.

12Perbahan ikataken Dibata man guru-guru e arah nipina gelah ola ia mulihken ndahi Herodes, emaka mulih ia arah dalan si deban ku negerina.

Mengongsi ku Mesir

13Kenca berkat guru-guru Timur e, teridah malekat Tuhan man Jusup i bas nipina. Nina malekat e man bana, "Kekeken, baba Anak e ras nandena mengongsi ku Mesir. I jahlah kam lebe seh aku erkata man bandu, sabap idarami Herodes anak enda janah ibunuhna pe atena."

14Emaka keke Jusup, janah i bas berngi e ibabana Anak e ras nandena ku Mesir.

15I Mesir ia ringan seh Herodes mate. Kerina si enda jadi gelah seh kai si ikataken Tuhan arah nabi nina, "Nggo Kudilo AnakKu i taneh Mesir nari."

Anak-anak ibunuhi

16Asum ieteh Raja Herodes ia nggo itipu guru-guru si reh i Timur nari e, merawa-rawa kal ia. Isuruhna perajurit-perajurit munuhi anak-anak dilaki si lit i Betlehem ras sekelewetna. Anak-anak si ibunuhi umur dua tahun kuteruh. Enda isesuaikenna ras dekahna bintang e nggo teridah bagi si ituriken guru Timur man bana.

17Alu bage seh me kata si ikataken Nabi Jeremia nina,

18"Lit sora terbegi i Rama, sora nderkuh dingen tangis ceda ate. Itangisi Rahel anakna, tangis ia janah lanai terapuli, sabap kerina anakna mate."

I Mesir nari mulihken ku Nasaret

19Kenca mate Herodes, teridah malekat Tuhan man Jusup i bas nipina asum ia i Mesir denga.

20Nina malekat e man bana, "Kekeken, baba Anak e ras nandena mulih ku taneh Israel, sabap kalak si ersura-sura munuh Anak e nggo mate."

21Emaka keke Jusup, ibabana Anak e ras nandena mulihken ku negeri Israel.

22Tapi kenca ibegi Jusup berita maka Arkelaus nggo jadi raja i negeri Judea, mbiar ia ku Judea sabap Arkelaus anak Herodes. Tole perbahan nggo ka ipersingeti Dibata ia kerna si e arah nipina, emaka lawes ia ku daerah Galilea.

23Kenca seh ia i Galilea ibahanna jabuna i kuta Nasaret. Kerina enda jadi gelah seh kai si ikataken nabi-nabi nina, "Ia pagi igelari kalak Nasaret."


  Share Facebook  |  Share Twitter

 <<  Matius 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran