Dual PanelMiha nalahken peminpin-peminpin Israel
1Begiken, o penguasa-penguasa Israel! Arusna kam me si mperdiateken kebujuren,
2tapi kepeken ciga atendu si mehuli dingen ngena atendu kejahaten. Ibukbakndu bangsangKu geluh-geluhen janah isintapkenndu dagingna i bas tulanna nari.
3Ipanndu bangsangKu. Iluakndu kulingna, ipenggelkenndu tulanna, je nari igatgatindu ia desken daging ku bas kudin.
4Paksana reh me i ja kam erlebuh man TUHAN, tapi la IaloiNa kam. La IbegikenNa pertotonndu, perban jahat pengelakondu.
5Nabi-nabi si penebu-nebu ngataken dame man kalak si mere man bana, tapi ikatakenna perang man kalak si la mereken panganna. Man nabi-nabi si bagenda ikataken TUHAN,
6"O nabi-nabi warindu nandangi mentas, matawarindu sundut me. Sanga berngi lanai ibereken pengenehenen man bandu, i bas kegelapen lanai kam ngasup ernubuat."
7Kalak si ernubuat kerna paksa si nandangi reh, mela akapna perban la ia ngasup. Sinik nari nge ia, sabap la ialoi Dibata ia.
8Tapi aku, TUHAN ndemi aku alu kesah ras KuasaNa, janah IberekenNa bangku ukur bujur ras kinipangan nuriken man bangsa Israel kerna dosa-dosana.
9Begikenlah aku, o penguasa-penguasa Israel, kam si ernembeh ate kempak kebujuren dingen nalihken si benar jadi salah.
10Ipajekkenndu kuta Dibata, e me Jerusalem, alu dareh ras kejahaten.
11Penguasa-penguasa kuta e erbahan keputusen erpalasken sogok si ialokenna, imam-imam mereken pengajaren erkiteken iupahi, nabi-nabi ernubuat erkiteken ngaloken duit, janah kerina ia ngatakenca maka TUHAN ras ia. Nina, "Labo banci kita kena mara. TUHAN kap ras kita."
12E maka, erkite-kiteken kam, itenggalai me pagi Sion desken juma, Jerusalem jadi runtuhen si ergun-gun, janah deleng ingan Rumah Pertoton e salih jadi kerangen.