Alkitab Mobile SABDA
[VER] : [KARO]     [PL]  [PB] 
 <<  Markus 4 >> 

Perumpaman kerna si ngambur benih (Mat 13:1-9; Luk 8:4-8)

1Ngajar ka Jesus mulihi i tepi Dano Galilea. Perbahan teremna jelma reh, emaka InangkihNa sada perahu si lit i je ngadi-ngadi. I bas perahu ndai me Jesus kundul janah ngajar. Kalak si nterem tedis i tepi dano.

2Melala pengajaren IajarkenNa man alu perumpaman. Nina i bas PengajarenNa,

3"Begikenlah! Lit me sekalak perjuma, lawes ku juma ngambur benih.

4Sanga ia ngambur benih deba ndabuh ku dalan. Emaka reh perik-perik manganisa seh keri.

5Deba ka ndabuh ku taneh si erbatu-batu. Perbahan la mbages tanehna emaka pedas turah benih ndai.

6Tapi kenca iparpari las matawari minter melus dingen kerah, sabap la mbages uratna.

7Lit ka ndabuh kempak peren duri. Peren duri ndai pedas perturahna janah iasakna benih si nggo turah e seh maka la banci erbuah.

8Tapi deba ndabuh ku taneh si mehumur. Mejile perturahna, janah erbuah pe. Lit deba buahna telu puluh kali lipat, deba enem puluh, janah lit ka pe seratus kali lipat."

9Emaka idungi Jesus PengajarenNa nina, "Begikenlah adi lit kin cupingndu."

Maksud ras tujun perumpaman (Mat 13:10-17; Luk 8:9-10)

10Sanga Jesus serap sisada, reh ajar-AjarNa si sepulu dua kalak ras piga-piga kalak si megi perumpaman ndai ndahi Ia. Jenari isungkunna Jesus kerna maksud ras tujun perumpaman ndai.

11Erjabap Jesus nina, "Man bandu nggo ibereken rahasia Kinirajan Dibata. Tapi kalak si deban si i darat, ibegikenna kerina alu perumpaman saja,

12emaka, 'Aminna gia ipernehenna, tapi labo idahna, aminna gia ibegina, tapi labo iangkana. Sabap adi idahna janah iangkana tentu jera ia janah Dibata ngalemi ia.'"

Iterangken Jesus kerna perumpaman si ngambur benih (Mat 13:18-23; Luk 8:11-15)

13Jenari isungkun Jesus kalak ndai nina, "La kin iangkandu perumpaman enda? Adi lang kuga ka banci iangkandu perumpaman si deban?

14Si ngambur benih e kalak si meritaken berita i bas Dibata nari.

15Mawen-mawen berita e ndabuh ku dalan e me kalak si megi berita e, i je ibegina, i je ka minter ibuat Iblis i bas ia nari Berita si nggo iamburken i bas ia e.

16Berita si ndabuh ku taneh si erbatu-batu e me perumpaman kerna kalak si megi berita e, minter ialokenna alu meriah ukur.

17Tapi kentisik ngenca, sabap berita e la rurat i bas ia. Reh kenca kiniseran ntah iayak-ayak kalak ia perbahan Berita e, minter ia murtad.

18Berita si ndabuh ku bas peren duri e me perumpaman kerna kalak si megi Berita e,

19kearun kerna geluh enda, bage pe erkiteken kebayaken nipu ia, ras erbage-bage sura-sura si deban ngasak Berita e seh lanai erbuah.

20Berita si iamburken ku taneh si mehumur e me perumpaman kalak si megikenca, ialokenna Berita e, erbuah pe. Lit telu puluh, lit enem puluh janah lit ka pe seratus kali lipat buahna."

Lampu i teruh tumba (Luk 8:16-18)

21Tole nina Jesus, "Pernah kin isagani kalak lampu jenari itutupi alu tumba ntah pe itamana ku teruh ingan medem? Ma kin isangketkenna nge ku inganna sangket?

22Kerina si terbuni teridah nge pagi, janah kerina rahasia tangkas kap pagi.

23Begikenlah, adi lit kin cupingndu!"

24Ikataken Jesus pe man kalak ndai, "Ukurkenlah kai si ibegindu! Sukat-sukat si ipakendu man kalak si deban, e ka nge ipake man bandu, janah ibereken pe tambahna.

25Kalak si lit i bas ia itambahi man bana, tapi kalak si la lit i bas ia, si sitik i bas ia e pe ibuat i bas ia nari."

Perumpaman kerna benih si turah

26Iterusken Jesus ngerana nina, "Kinirajan Dibata banci iandingken ras sekalak si ngambur benih i jumana.

27Paksa berngi tunduh ia; suari idahina dahinna. Kidekah si e benih ndai ersuli, turah pe. Tapi kuga carana turah labo ieteh perjuma ndai.

28Mahan bana taneh enda mereken asilna. Tangtangna ersuli, jenari ertangke, kenca bage maka erbuah.

29Kenca metua buahna ndai, mulai isabina sabap paksa rani nggo seh."

Perumpaman kerna sengkebuah benih (Mat 13:31-32, 34; Luk 13:18-19)

30Nina Jesus, "Bagi kai kin Kinirajan Dibata banci iandingken? Kai contohna banci si pake guna nerangkenca?

31Kinirajan e bali ras benih sawi, e me benih si kitikna si isuanken i bas taneh.

32Tapi kenca isuan turah me ia janah belinen asaken kerina gule-gulen. Lit dahan-dahanna seh maka perik-perik pe banci rasar i teruh bulungna si mbur."

33Alu perumpaman-perumpaman si bagenda me Jesus meritaken Berita i bas Dibata nari. Iajarken Jesus bagi ngasupna kalak ndai ngertikenca.

34Adi la arah perumpaman labo kai pe ituriken Jesus man kalak si nterem. Tapi adi man ajar-AjarNa IturikenNa kerina.

Ipejeneng Jesus angin si meter (Mat 8:23-27; Luk 8:22-25)

35Karaben i bas wari si ndai nina Jesus man ajar-AjarNa, "Ota ku lepar ah."

36Emaka itadingken kalak ndai jelma si nterem. Inangkihi ajar-ajar perahu si nggo idatasi Jesus janah berkat ia ras. Perahu-perahu si deban pe lit i je.

37Jesus arah pudi i bas perahu e, IamparkenNa TakalNa i babo bantal jenari tunduh Ia. Paksa e rembus angin meter ras galumbang si merawa. Iombang-ambingkenna perahu e, dingen lau pe bengket ku bas. Emaka ingeti ajar-ajar me Jesus nina, "O Guru, la kin kutera pe ukurndu amin bene pe kita?"

38(Mrk 4:37)

39Keke Jesus, IsergangiNa lau ras angin ndai nina, "Sinik!" Jenari nina man lau, "Jenenglah!" Emaka minter angin ndai ngadi, janah lau ndai pe nggo jeneng kal.

40Jenari nina Jesus man ajar-AjarNa, "Ngkai maka kam mbiar kal? Langa kin kam tek?"

41Reh biarna pe kalak ndai nina sapih-sapih ia, "Ise kin ndia Ia, maka angin ras galumbang ngikutken KataNa?"


  Share Facebook  |  Share Twitter

 <<  Markus 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran