Dual PanelBangsa e ngakuken dosa-dosana
1I bas bulan e ka, i bas wari pe dua pulu empatken, bangsa Israel pulung lako erpuasa guna encidahken atena ceda erkiteken dosa-dosana. Ope denga si e nggo leben iserapkenna bana, i bas kerina bangsa-bangsa si deban nari. Ipakena uis guni janah itamana abu kutakalna tanda erceda ate. Kenca bage tedis ia janah ibenakenna ngakuken dosa-dosana ras dosa-dosa si nggo ibahan nini-ninina.
2(Neh 9:1)
3Kira-kira telu jam dekahna Undang-undang TUHAN Dibata iogeken man bana, jenari telu jam nari ka dekahna ia ngakuken dosa-dosana janah ersembah man TUHAN Dibatana.
4Lit sada mimbar guna kalak Lewi, janah i je me tedis Jesna, Bani, Kadmiel, Sebaya, Bunni, Serebia, Bani, ras Kenani. Ertoto kalak enda man TUHAN Dibatana alu sora si megang.
5Kalak Lewi si tersena enda, eme: Jesua, Kadmiel, Bani, Hasabneya, Serebia, Hodia, Sebanya, ras Petahia; kalak enda me si erlebuh guna ersembah nina, "Tedislah, pujilah TUHAN Dibatandu; pujilah Ia rasa lalap seh rasa lalap! Kerinalah muji GelarNa si mbelin, Ia belinen asa kerina puji-pujin si terbelasken manusia."
Pertoton pengakun dosa
6Janah kenca si e kalak Israel melasken pertoton enda: "Kam, O TUHAN, Kam saja ngenca TUHAN, IbahanNdu kerina langit ras bintang-bintang i langit. IbahanNdu taneh, lawit ras kerina isina; Kam si pegeluhsa kerina. Kuasa-kuasa i langit nembah erjimpuh man BaNdu.
7Kam, O TUHAN Dibata, IpilihNdu Abram IbabaiNdu ia ndarat i taneh Ur i Babilon nari; jenari IsambariNdu gelarna jadi Abraham.
8IdahNdu maka ia setia man BaNdu, emaka IbahanNdu sada perpadanen ras ia. Erjanji Kam mereken taneh Kanaan man bana, taneh kalak Heti ras Amori, taneh kalak Peris, Jebusi ras Girgasi, jadi taneh ingan kesusurenna nggeluh. IcikepNdu PerpadanenNdu, sabap Kam setia kap.
9Idahndu uga kiniseran nini-nini kami i Mesir; IbegiNdu ia nderkuh mindo penampat i Lawit Rengo.
10IbahanNdu tanda kuasa si mbelin ngelawan raja, ngelawan pegawai-pegawaina ras rayat negerina, erkiteken IetehNdu uga penindihna BangsaNdu. I je IpebelinNdu GelarNdu, bali ras GelarNdu mbelin wari enda.
11Arah tengah lawit IbahanNdu dalan man BangsaNdu, IteguNdu ia arah taneh si kerah. Kalak si ngayaki ia gedap i bas lau si mbages, bali ras batu si gedap i bas lawit si merawa.
12Suari IbabaiNdu ia salu embun, janah berngi IterangiNdu DalanNa salu api.
13I Deleng Sinai Kam reh i Surga nari; ngerana Kam kempak BangsaNdu janah IberekenNdu bana undang-undang si mehuli ras pengajaren si payo.
14IajariNdu BangsaNdu lako pebadiaken SabatNdu, janah arah suruh-SuruhenNdu Musa IberekenNdu bana undang-undang.
15Adi melihe BangsaNdu, IberekenNdu roti i Surga nari, janah adi ia muas, IberekenNdu lau i bas batu nari. IsuruhNdu ia ngkuasai negeri e si nggo IjanjikenNdu merekenca man bana.
16Tapi nini-nini kami jadi meganjang rukur dingen mekeng janah la ia nggit ngikutken PerentahNdu.
17La ia nggit patuh; ilupakenna kerina PerbahanenNdu; ilupakenna tanda-tanda kuasa si nggo IcidahkenNdu. I bas kiniganjangen ukurna, ipilihna sekalak peminpin lako maba ia mulih ku bas perbudaken i Mesir. Tapi Kam kap Dibata si ngalemi salah; Kam melias dingen perkeleng, la pedas merawa. Mbelin kap perkuah AteNdu; janah la ItadingkenNdu ia.
18Ibahanna sembah-sembahen tempasna bagi lembu janah ikatakenna maka eme dibata si mabai ia i Mesir nari. Tuhu-tuhu megombang ia man BaNdu, o TUHAN!
19Tapi la ItadingkenNdu ia i gurun pasir e perban mbelin kal perkuah AteNdu. La IbuatNdu embun ntah api e si nuduhken dalin man bana suari ras berngi.
20IberekenNdu KesahNdu lako ngajari ia; InakaniNdu ia alu manna, janah IbereNdu lau man inemenna.
21Kidekah empat puluh tahun i gurun pasir, IsikapkenNdu kasa kai si iperlukenna; pakenna lalap la tuk, janah tapak nahena la pernah besar.
22IbereNdu maka italukenna bangsa-bangsa ras kerajan-kerajan, negeri-negeri si sebaleng ras negerina. Italukenna negeri Hesbon i ja Raja Sihon merentah, ras negeri Basan, i ja si Og jadi rajana.
23IberekenNdu bana anak bali teremna ras bintang-bintang i langit janah IbereNdu ia naluken ras ngiani negeri e, si nggo IjanjikenNdu merekenca man nini-ninina.
24Italukenna negeri Kanaan; IkuasaiNdu bangsa si ringan i je. IberekenNdu man BangsaNdu kuasa ngelakoken bagi ate-atena nandangi bangsa ras raja-raja Kanaan.
25BangsaNdu ngkuasai kuta-kuta si erbenteng, taneh si mehumur, rumah-rumah si dem erta-erta, sumur si nggo ikuruk batang saitun, batang buah pangan, ras kebun anggur. Ipanganina kai ia merincuh janah mbur me ia; inanamina kasa kai si mehuli si IberekenNdu man bana.
26Tapi berontak BangsaNdu man BaNdu janah isimbakna Kam; Undang-UndangNdu ipudikenna. Ibunuhna nabi-nabi si mereken pertenget man bana si nuruh ia gelah mulih ku Kam. Igombangina Kam alu mesangat,
27emaka IpelepasNdu musuh-musuhna naluken dingen merentah ia. I bas kiniseran erlebuh ia BaNdu mindo penampat, janah IaloiNdu ia i Surga nari. Erkiteken perkuah AteNdu si mbelin IberekenNdu man bana peminpin-peminpin si mulahi ia i bas musuh-musuhna nari.
28Kenca nggo ka aman, erdosa ka ia mulihken, emaka IpelepasNdu ka musuh-musuhna naluken ia. Tapi kenca jera ia dingen mindo gelah IselamatkenNdu ia, IbegikenNdu ia i Surga nari, janah nggo megati kal IpulahiNdu ia, erkiteken perkuah AteNdu si mbelin.
29IpersingetiNdu ia gelah patuh man PengajarenNdu, tapi i bas ukurna meganjang itulakna undang-UndangNdu, aminna gia dalan ku kegeluhen eme arah ngikutken Undang-UndangNdu, tapi mekeng ia, la nggit ngikutken Kam.
30I bas tahun ku tahun saber Kam man bana janah IpersingetiNdu ia alu KesahNdu, arah nabi-NabiNdu tapi pasek BangsaNdu emaka IpelepasNdu italuken bangsa-bangsa si deban.
31Amin bage gia, perban mbelin perkuah AteNdu, la itadingken tah IkernepkenNdu ia. Kam kap Dibata si melias dingen perkuah!
32O, Dibata, Dibata kami si mbelin si medolat dingen si megegeh! Alu tutus IcikepNdu isi PerjanjinNdu. Mulai i bas paksa raja-raja Assur nindih kami, seh ngayak genduari pe, lanai tanggung kiniseran kami! Raja-raja kami, peminpin-peminpin kami, imam-imam ras nabi-nabi kami, nini-nini kami, ras kerina bangsa kami, nggo ngenanami kiniseran. O, Dibata ingetlah uga belinna kiniseran kami!
33Benar kap PerbahanenNdu, asum IukumNdu kami, Kam tetap setia, aminna gia kami nggo erdosa.
34Nini-nini kami, raja-raja kami, peminpin-peminpin, ras imam-imam la ngikutken Undang-UndangNdu. La ibegikenna perentah ras PersingetNdu.
35Alu pasu-PasuNdu, raja-raja merentah BangsaNdu, kenca ia ringan i bas taneh si mbelang dingen mehumur si IberekenNdu bana tapi la ia ngasup nadingken dosa ras nembah Kam.
36Emaka genduari kami nggo jadi budak i bas negeri si IberekenNdu man kami, taneh si mehumur enda si mereken pangan man kami.
37Kai ulih taneh lawesna kempak raja-raja si ItamakenNdu ngkuasai kami sabap dosa kami. Kami ras asuh-asuhen kami ibahanna bagi ate-atena, emaka kami bas kepiceten mekelek!"
Bangsa Israel erbahan perpadanen
38Erkiteken kasa kai si nggo jadi, kami bangsa Israel, alu enda erbahan sada perpadanen si nteguh dingen tersurat, janah peminpin-peminpin kami, kalak Lewi, ras imam-imam kami namaken capna i bas surat enda.