Alkitab Mobile SABDA
[VER] : [KARO]     [PL]  [PB] 
 <<  Ratapan 3 >> 

Ukumen, erkadiola, ras pengarapen

1Aku kap ngenca si metehsa uga nanamna iukum TUHAN.

2Igerana aku ku kegelapen si seh kal bagesna.

3Iulih-UlihiNa rusur nggudam aku la sitik pe encidahken perkuah AteNa.

4Dagingku ras kulingku IpelepasNa kesip tulan-tulanku meripuk IbahanNa.

5IerukNa aku i bas penjara, kiniseran ras kebiaren engkelewetisa.

6IpaksaNa aku nggeluh i bas kegelapen kematen si rasa lalap.

7IiketNa aku alu rante IpenjarakenNa aku, lanai lit pengarapen banci pulah.

8Serko mindo penampat, tapi la diate Dibata megiken aku.

9Mbewat-mbewat perdalanku. Lingling batu ngolang-ngolangi kujapa pe aku nulih.

10ItimaiNa aku desken beruang nggempangi, desken singa, iraukna aku.

11Ipeburona aku i bas dalan, IdampeskenNa seh getem, jenari ItadingkenNa aku.

12IpegestengNa PanahNa janah aku IbahanNa jadi SasarenNa.

13IpanahkenNa anak PanahNa kempak pusuhku.

14Itawa-tawai kalak aku gedang-gedang wari, kerina ia pesega-sega aku.

15IpaksaNa aku nginem inemen si pagit, IbesuriNa aku alu pangan ras inemen si pagit.

16IdehkenNa ayongku ku taneh penggelen ipenku perban man batu rintik.

17Nggo lupa aku uga mejuah-juah, uga dame janah uga malem ate.

18Lanai aku ndekah nggeluh, pengarapenku nandangi TUHAN nggo bene.

19Ngukuri uga suina ateku, inganku tading pe lanai lit, bali kap e ras racun si pagit.

20Si e kerina tetap kal i bas ingetenku, getem kal ukurku amin bage pe, turah kap pengarapenku,

21adi kuinget si enda.

22Langa bo keri keleng ate TUHAN perkuah AteNa tetap nge lit.

23Keleng AteNa mbincar tep-tep erpagi-pagi, bali tetapna ras matawari si pultak arah kenjulu.

24TUHAN kap baginku emaka man BaNa ngenca aku erpengarapen.

25TUHAN mehuli kap man kerina kalak si ernalem man BaNa.

26Emaka madin kita megenggeng, nimai Ia nampati kita.

27Janah ulin erlajar megenggeng tupung paksa kita nguda.

28Tupung kita i bas kiniseran madin kita kundul sisada alu megenggeng.

29Emaka ulin mungkuk alu patuh, sabap i je lit si man arapenken.

30Aminna pe iligas ras iisakken la banci lang pulah kita i jenari.

31TUHAN perkuah kap emaka labo lalap kita ItulakNa.

32IberekenNa gia man banta kiniseran, tapi keleng AteNa man banta tetap ras megegeh.

33Sabap labo AteNa ngena, kita ermesui ate dingen rate ceda.

34Ieteh TUHAN nge, maka getem kal nge pusuhta idehken i bas penjara.

35IetehNa nge hakta la ibereken kalak.

36Tupung keadilen iputar-balikken i bas pengadilen, ItehNa nge.

37Peraten TUHAN ngenca si lalap erdalan.

38Si mehuli ras si jahat duana jadi rikutken PerentahNa.

39Ngkai maka kita kelsehen tupung kita iukum erkiteken dosa-dosanta?

40Marilah siuji geluhta jenari jeralah man TUHAN.

41Talangilah pusuh peratenta man Dibata si i surga jenari ertotolah.

42"O TUHAN, nggo kap kami erdosa janah ngelawan, la kap IalemiNdu dosa kami.

43Ielis-ElisNdu kami jenari IbunuhNdu. Nggo tambur perkuah AteNdu perban RawaNdu.

44Alu embun si mekapal, ItamburiNdu BaNdu, emaka lanai seh toto kami.

45IbahanNdu kami bali ras sampah si ergun-gun i tengah bangsa-bangsa.

46Kerina imbang-imbang kami megombang ngguro-guroken kami.

47Kami nggo mentas arah kiniseran ras kecedan, kegeluhen kami lit i bas bahaya ras kebiaren.

48Iluh matangku erdire-dire maler bagi lau mbelin, ngidah bangsangku nggo ikernepken.

49Iluhku erdire-dire la ngadi-ngadi, bali ras lau si maler.

50Seh ipergermetken TUHAN i surga nari, jenari IdahNa kita.

51Getem kal pusuhku tupung kuidah kai si jadi man diberu-diberu i bas kota e.

52Desken perik-perik aku nggo isidingi imbang-imbangku la ersabap kalak ernembeh ate man bangku.

53Ionjumkenna aku geluh-geluhen ku bas lubang, jenari itutupina alu batu.

54Mulai me aku itamburi lau, nandangi mate me aku ateku.

55I bas lubang si mbages nari serko aku man bandu, o TUHAN.

56Janah tupung kupindo gelah IdengkehkenNdu min sorangKu, IbegikenNdu kap aku.

57IaloiNdu aku, janah nindu, 'Ula mbiar'.

58O TUHAN nggo Kam reh mbebasken aku IkeliniNdu geluhku.

59Runggui janah sampati min aku; ItehNdu kap si la mehuli si ibahan kalak man bangku.

60ItehNdu kap maka nembeh ate imbang-imbangku man bangku, uga ia erpekat ngelawan aku.

61Nggo IbegikenNdu aku ihinana, o TUHAN, IetehNdu pertakinna man bangku.

62Gedang-gedang wari icakapkenna aku janah ipertakikenna aku.

63Erpagi-pagi nari seh ben iguro-gurokenna aku.

64O TUHAN ukum min ia sue ras kai si ibahanna.

65Sumpahi min ia bahan min maka bene pengarapenna.

66Ayak-ayaklah ia, sasapken ia i bas doni enda nari!"


  Share Facebook  |  Share Twitter

 <<  Ratapan 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran