Dual PanelKelegon mesangat
1Nina TUHAN kempak Jeremia kerna kelegon:
2"Ceda ate Juda kota-kotana nandangi mate, rayatna ampar rate ceda i babo taneh. Jerusalem serko mindo penampat.
3Kalak bayak nuruh suruh-suruhenna ngelegi lau, lawes suruh-suruhen e ku sumur, tapi la lit jumpasa lau; bene ukurna, bene pengarapenna, itutupna ayona, mulih ia lume gucina.
4Erkiteken lalap la udan, emaka kerah kerina taneh. Kalak perjuma mesui pusuhna, itutupna ayona.
5Balua si mbaru nubis i bas mbal-mbal pe, itadingkenna anakna, perban la lit dukut.
6Kelede si meliar tedis i datas uruk-uruk, mengkap-mengkap kesahna desken serigala; pengenehen matana nggo lanai mesinting perban la lit si man panganna.
7Serko bangsangKu man bangKu nina, 'Aminna pe kesalahen-kesalahen kami nalahken kami, sue ras PadanNdu, sampati min kami, o TUHAN. Nggo rusur Kam itundalken kami, erdosa kami man BaNdu.
8Kam kap ngenca pengarapen Israel; Kam kap si mulahi kami i bas kiniseran nari. Ngkai maka bali Kam ras pertandang i negeri kami? Ngkai maka bali Kam ras kalak pertandang sada berngi ngenca tading i negeri enda?
9Ngkai maka Kam bali ras kalak si nggo bene ukurna, desken tentera si la ergegeh lako nampati? O TUHAN, tentu Kam tetap ras kami, BangsaNdu kap kami, ula min kami TadingkenNdu.'"
10Nina TUHAN kerna bangsa enda, "Ngena kal atena kiam nadingken Aku. La ka ikuasaina man bana. Emaka la kal meriah ateKu ibahanna. Kuinget salah-lepak si ibahanna emaka Kuukum ia erkiteken dosa-dosana."
11Nina TUHAN kempak aku, "Ula kam ertoto kerna bangsa enda man bangKu.
12Aminna pe ia puasa labo Kudengkehken sorana serko mindo penampat. Aminna pe ipersembahkenna persembahen tutungen ras persembahen pangan labo meriah ukurKu. Tapi Kukernepken ateKu ia alu perang, kelihen ras penakit."
13Ningku, "O TUHAN si Erdolat, IetehNdu kap maka nabi-nabi ngataken man bangsa enda, maka erkiteken PadanNdu, la lit perang, la lit kelihen, tapi dame ngenca i negeri enda."
14Ngaloi TUHAN Nina "Nabi-nabi e erkata guak i bas gelarKu. La kap ia Kusuruh. La lit Kubereken perentah man bana. Sengkebabah ranan pe la lit Kukataken man bana. Pengidah si iturikenna labo i bas Aku nari rehna. Nubuat si iturikenna la kap tuhu, tapi awih-awih perukurenna saja ngenca.
15Aku TUHAN si ngerana man bandu, kerna kai si arus Kubahan man nabi-nabi si labo Kusuruh, tapi si ngeranai i bas gelarKu. Ikatakenna maka perang ras kelihen labo ngkenai negeri enda, Kukernepken me ia alu perang ras kelihen.
16Kalak si man bana nggo seh kata nabi-nabi enda iukum bali ras nabi si la Kusuruh ndai. Maitna iambengken ku dalan-dalan i Jerusalem, ise pe la lit si nanemkenca. Bagenda me si jadi man kerina kalak e, subuk man ndeharana, anakna si dilaki ras diberu. Kubahan maka ialokenna upah kejahatenna."
17Iperentahken TUHAN man bangKu nuriken man bangsa e kerna ateku ceda, emaka ningku, "Iluhku mambur erdire-dire, suari ras berngi tangis ngandung kal aku, sabap luka bangsangku seh kal bagesna, ugahna lanai terpepalem.
18Kune ndarat aku ku mbal-mbal, kuidah mait kalak si mate i bas perang. Kune aku lawes ku kuta-kuta, kuidah kalak mate lumben. Nabi-nabi ras imam-imam ndahiken dahinna, tapi la iangkana kai si ibahanna."
Pertoton man TUHAN
19O TUHAN, nggo kin tuhu-tuhu kal Juda ItulakNdu? Nembeh kal kin AteNdu kempak Sion? Ngkai maka bage kal kelekna kami IlukaiNdu, luka si lanai banci malem? Idarami kami dame, tapi labo si mehuli jadi. Iarapken kami kejuah-juahen, tapi kebiaren si reh man kami.
20O TUHAN, nggo kami erdosa man BaNdu, iakuken kami dosa-dosa kami, bage pe dosa-dosa nini-nini kami.
21Ingetlah JanjiNdu ula kami IjurukenNdu. Ula IbahanNdu mela iakap Jerusalem, ingan Kursi KinirajanNdu si Mulia. Ula cedaken perjanjin si nggo IbahanNdu man kami.
22Gana-gana bangsa-bangsa la sada pe ngasup mereken udan. Langit e pe la ngasup mereken udan. O TUHAN Dibata kami, itamaken kami pengarapen kami man BaNdu, erkiteken Kam ngenca ngasup mereken si e kerina.