Dual Panel1Bulan pitu i bas tahun si e, Ismael anak Netania kempu Elisama anggota keluarga kerajan, sekalak puanglima raja, lawes ku Mispa ras sepuluh kalak temanna njumpai Gedalya. Sangana ia man ras-ras,
2Ismael ras temanna si sepuluh kalak e nintak pedangna jenari ibunuhna Gedalya.
3Kalak Ismael si tading ras Gedalya i Mispa, bage pe tentera Babilon si sangana i je kerina ibunuh Ismael.
4Pepagina, ope denga ise pe meteh kematen Gedalya,
5reh waluh puluh kalak i Sikem, Silo ras Samaria nari. Janggutna icukurna, uisna icaingkenna, badanna ilukaina. Ibabana persembahen pangan ras si merim-merim guna ipersembahken i bas Rumah Pertoton.
6Kenca bage ndarat si Ismael i Mispa nari njumpai si waluh puluh kalak ndai erdalan janahna tangis. Kenca ia jumpa nina, "Ota sinehen Gedalya."
7Kenca ia bengket ku bas kota, Ismael ras teman-temanna rempet munuhsa janah maitna idabuhkenna ku bas sada sumur.
8Tapi sepuluh i bas si waluh puluh kalak e nari mindo man Ismael nina, "Ula kami bunuhndu! Sabap lit buni-buni kami i tengah-tengah juma eme: jaba, gandum, minak saitun ras tengguli." Emaka ipulahi kalak ndai.
9Sumur ingan Ismael ndabuhi mait-mait si ibunuhina galang kal. Raja Asa si engkuruksa tupung iserang Baasa raja Israel. Bangke-bangke e itamaken Ismael ku sumur e.
10Kenca bage iangkut Ismael jadi tabanenna kerina putri raja, radu ras kerina kalak si tading i Mispa si nggo iendesken Puanglima Nebusaradan ku bas kuasa Gedalya. Iangkut Ismael ia kerina jadi tabanen jenari berkat ngepar ku daerah Amon.
11Johanan ras kerina tentera megi kerina kejahaten Ismael.
12Emaka ia ras tentera ngayaki kalak ndai, janah tunduksa i deherken kolam mbelin i Gibeon.
13Kenca tabanen Ismael ngidah si Johanan dingen kerina pengulu tentera si rassa, meriah kal ukurna,
14itadingkenna Ismael, idahina Johanan.
15Tapi Ismael ras waluh kalak temanna pulah i bas Johanan nari lompat i ku negeri Amon.
16Kenca bage Johanan ras pengulu-pengulu tentera si lit rassa nenahken kalak si iangkut Ismael jadi tabanen i Mispa nari kenca ibunuhna Gedalya. -- Kerina tentera, diberu-diberu, anak-anak ras pegawai-pegawai kerajan.
17Mbiar ia man kalak Babilon erkiteken Ismael nggo munuh Gedalya, singgo iangkat raja Babilon jadi gubernur i negeri e. Emaka lawes ia ku Mesir gelah lompat i bas kalak Babilon nari. I bas perdalanen ku Mesir e, ngadi ia i Kimkam deherken Betlehem.
18(Yer 41:17)