Dual PanelEnde-enden pujin
1TUHAN, Kam kap Dibatangku; kupehaga Kam janah kupuji GelarNdu. Nggo IlakokenNdu perbahanen si mbelin; alu tutus nggo IdalankenNdu, kerina rencana-rencana si IbahanNdu nai-nai nari.
2Kota-kota nggo runtuh IbahanNdu; janah bentengna IrontaskenNdu. Istana-istana si ipajekken imbang-imbang kami, nggo masap seh rasa lalap.
3Rayat negeri-negeri si megegeh ipujina Kam, i bas kota-kota si merawa, mbiar kalak ngenehen Kam.
4Kalak musil ras si la ergegeh nggo reh ku Kam, emaka terkawal geluhna i bas paksa kepiceten. IberekenNdu ingan cio tupung udan ras angin meter, janah ingan cilinggem paksa las matawari. Kalak merawa ngayak-ngayak desken angin kaba-kaba tupung perudan,
5desken las matawari marpari taneh kerah. Tapi Kam TUHAN, nggo IpesinikNdu imbang-imbang kami nggo IsompelNdu babah kalak merawa, bali ras embun mahanca mbergeh wari si ngisah.
Dibata nikapken kerja man-man
6I datas Deleng Sion enda isikapken TUHAN si Mada Kuasa kerja man-man guna kerina bangsa-bangsa i doni. I bas kerja e IidangkenNa pagi pangan si seh kal tabehna ras anggur si mehulina.
7I je iagui TUHAN embun ate ceda si gelgel nari ngelumlumi kerina bangsa-bangsa.
8Kematen imasapken TUHAN si Erdolat seh rasa lalap. IapusiNa iluh i bas mata kerina jelma nari, janah adi gelgel nari mela iakap BangsaNa i belang-belang doni enda, genduari masap IbahanNa kerina. TUHAN jine si ngatakenca.
9Tupung e ikataken kalak me, "Enda me Dibatanta! Nggo kita ernalem man BaNa, janah nggo IpulahiNa kita. Ia kap TUHAN! Nggo kita ernalem man BaNa. Janah genduari malem ateta, meriah siakap erkiteken IkeliniNa kita."
Dibata ngukum Moap
10Ikawali TUHAN me pagi Deleng Sion, tapi kalak Moap IperjakiNa, desken nggala iperjaki i bas kubang asuh-asuhen.
11Aminna ipegesteng kalak e gia tanna desken kalak si erlangi, tapi ipeteruk Dibata nge ia, seh maka tanna e kote jenari gedap.
12Benteng-benteng Moap IcedakenNa rikut ras tembok-tembokna si meganjang ibulakkenna seh ampar i babo taneh.