Dual Panel1Saellana jareya Ayyub molae abu-dhabu sarta abasto are kalahiranna, dhabuna,
2"Ya Allah, ngereng bastowagi are e bakto abdidalem elahirragi, jugan malem e bakto abdidalem egandhu’ sareng ebu!
3(3:2)
4Ya Allah, papettengngagi are gapaneka, ja’ kaemodi sareng Junandalem saterrossa; ja’ parengngagi badha caja tera’ se nyonare are gapaneka.
5Are gapaneka pacelleng ngalereng, petteng calemodan, rodhep sareng orem; totop sareng ondhem sopaja ta’ esonare tera’na are.
6Malem gapaneka paelangngagi dhari etonganna taon, ban bulan; ja’ kaemodi, ta’ mabi ebitong.
7Dinggal malem gapaneka papetteng tadha’ leburra, tadha’ sennengnga.
8Kon-dhukon ban kang-tokang tennong se ngobasane Lewiyatan, mara pesowe sarta basto tang are kalahiran jareya.
9Ja’ sampe’ bintang karteka nyonar, ja’ sampe’ pajjar moncar! Dina malem jareya me’ tadha’ ollena te’-nante’an padhatengnga are ban pangarebban se anyar.
10Ta’ salamet malem la’nat e bakto sengko’ elahirragi ebu ka dunnya ban epanneng nanggung sangsara.
11Arapa sengko’ reya me’ ta’ mate e bakto egandhu’ ebu otabana e bakto elahirragi?
12Arapa sengko’ reya bi’ ebu me’ egellu’ sarta ereba, ban epanyoso ka sosona?
13Ja’ sakeng sengko’ mate e bakto jareya, tanto sateya sengko’ tedhung nyaman,
14akantha reng-oreng se kobasa ban to-rato jaman lamba’ se majaga pole karaton jaman kona.
15Sengko’ tatedhung akantha pottrana rato se ngesse’e karatonna bi’ emmas sarta salaka.
16Arapa sengko’ me’ ta’ lahir ta’ anyaba sopaja sateya tedhung ngeddha?
17E koburan reng-oreng jahat ta’ ngalakone kajahadan, li-koli se lesso neng-enneng ta’ alalakon.
18Para tawanan atena legga, ta’ ebentak reng-oreng se ajaga.
19Neng e koburan oreng tadha’ bidana: se kasohor ban se tadha’ ajina; nor-dunor padha bebas dhi-budhina.
20Arapa manossa me’ terros epanyangsara? Arapa tera’ me’ eparengngagi ka manossa se sossa?
21Reng-oreng se nyangsara odhi’na jareya bango’ meleya koburan etembang dunnya, anante’ pate, tape ajal ta’ endha’ dhapa’.
22Reng-oreng jareya buru arassa senneng mon la mate ban la ebendhem.
23Odhi’na e budhi are bi’ Allah ta’ epatangale, etotobi dhari adha’ budhi, kangan ban kacer.
24Sengko’ ta’ ngakan, la’-mala’ aserro ros-terrosan, nanges malolo tadha’ ambuna.
25Sabarang se ekakobater sengko’, la teba ka tang aba’, sabarang se ekatako’e sengko’, nyecce’e tang aba’.
26Sengko’ ta’ tao taremtem, nyangsara seyang ban malem."