Alkitab Mobile SABDA
[VER] : [MADURA]     [PL]  [PB] 
 <<  Bilangan 18 >> 

1Dhabuna PANGERAN ka Harun, "Ba’na ban na’-ana’na sarta reng-oreng Lewi kodu nanggung okomanna kasala’an-kasala’an e dhalem lalakon aladine e Tang Kemah; tape pera’ ba’na ban na’-ana’na malolo se kodu nanggung okomanna kasala’an-kasala’an e dhalem ngalakone kawajibanna mam-imam.

2Ajak la-balana ba’na, ban suku Lewi, soro nolonge e bakto ba’na ban na’-ana’na ngalakone kawajibanna.

3Suku Lewi jareya kodu ngalakone kawajibanna ka ba’na, ban ngalakone kawajibanna e Tang Kemah, tape ta’ olle nyemma’e mezba otabana nyedding rang-barang se socce e Rowangan Se Socce. Mon atoran reya ta’ etoro’, reng-oreng jareya ban bariya keya ba’na dibi’ bakal mateya.

4Reng-oreng jareya kodu alako abareng ban ba’na sarta ngalakone kon-lalakon se badha hubunganna ban sakabbinna pangladinan e dhalem Tang Kemah, tape reng-oreng se ta’ andhi’ ha’ kaangguy lalakon jareya, ta’ olle alalakon abareng ban ba’na.

5Pera’ ba’na, Harun, ban na’-ana’na ba’na se kodu ngalakone lalakon e Rowangan Se Socce ban e mezba, sopaja Sengko’ ta’ sampe’a peggel pole ka bangsa Isra’il.

6Saongguna, Sengko’ se mele la-balana ba’na, reng-oreng Lewi, dhari antarana bangsa Isra’il menangka baberri’na Sengko’ ka ba’na. Reng-oreng jareya la epassra’agi ka Sengko’, kaangguy aladine e Tang Kemah.

7Tape pera’ ba’na ban na’-ana’na se olle ngalakone lalakonna imam, e dhalem sakabbinna lalakon se badha hubunganna ban mezba ban sabarang se badha e Rowangan Se Mahasocce. Jareya lalakonna ba’na, sabab bi’ Sengko’ ba’na la eberri’i kahormadan epadaddi imam. Oreng se ta’ andhi’ ha’ eokoma mate mon nyemma’e rang-barang se socce jareya."

8Dhabuna PANGERAN ka Harun, "Kaenga’e, ya! Sakabbinna tor-ator se malolo eatorragi ka Sengko’, se ta’ eobbar, daddi bagiyanna ba’na. Jareya bagiyanna ba’na se la etantowagi kaangguy salanjangnga. Jareya bi’ Sengko’ ebagi ka ba’na ban na’ potona.

9Dhari tor-ator se paleng socce se ta’ eobbar e mezba, se kasebbut reya bagiyanna ba’na: Kurban sasajin, kurban palebbaranna dusa, ban kurban gantena tebbusanna kasala’an. Jareya kabbi tor-ator se socce se daddi bagiyanna ba’na ban na’-ana’na.

10Jareya kabbi socce monggu ka ba’na, daddi kodu ekakan e kennengngan se socce keya. Ban pera’ oreng lalake’ se olle ngakan jareya.

11Tor-ator laenna se eatorragi oreng Isra’il se malolo ka Sengko’, andhi’na ba’na keya. Bi’ Sengko’ ebagi ka ba’na ban ka ana’ lalake’anna ban ana’ babine’anna. Atoran reya angguy salanjangnga. Saneyap anggotana kalowargana ba’na se ta’ najjis olle ngakan tor-ator jareya.

12Hasel se dha’-adha’ se paleng bagus se eatorragi oreng Isra’il ka Sengko’ sabban taonna, iya areya mennya’ jaitun, aeng anggur ban gandum, bi’ Sengko’ ebagi ka ba’na kabbi.

13Jareya kabbi andhi’na ba’na. Saneyap anggotana kalowargana ba’na se ta’ najjis olle ngakan jareya.

14Pa-apa se badha e tana Isra’il se la emalolowagi ka Sengko’, andhi’na ba’na.

15Ana’ sareyangnga manossa otaba budhu’ sareyangnga keban, se eatorragi oreng Isra’il ka Sengko’, bagiyanna ba’na. Tape ba’na kodu nebbus saneyap ana’ sareyang, bariya keya budhu’ sareyangnga keban se haram.

16Na’-kana’ kodu etebbus e bakto aomor sabulan. Arga se la etantowagi menangka tebbusanna ana’ jareya lema pesse salaka, menorot arga e Tang Kemah.

17Tape sape, dumba ban embi’ se sareyang ta’ olle etebbus. Ebin jareya teptep Tang andhi’ ban kodu ekurbannagi. Dharana serammagi ka mezba ban gajina obbar menangka kurban. Bauna masenneng Tang ate.

18Dagingnga bagiyanna ba’na, padha ban dhadha sarta pokang kanganna tor-ator se eatorragi malolo ka Sengko’.

19Sakabbinna tor-ator se eatorragi oreng Isra’il malolo ka Sengko’, salanjangnga bi’ Sengko’ ebagi ka ba’na ban na’-ana’ lalake’anna sarta na’-ana’ babine’anna. Atoran reya angguy salanjangnga ban daddi parjanjiyan se ta’ ekenneng oba e antarana Sengko’ ban ba’na sarta na’ potona."

20Dhabuna PANGERAN ka Harun, "Ba’na ta’ olle sangkolan pa-apa. E nagara se ejanjiyagi Sengko’ rowa tadha’ tana maske salokke’a se daddiya andhi’na ba’na. Sengko’, PANGERAN, jareya sangkolan bagiyanna ba’na."

21Dhabuna PANGERAN ka Harun, "Sakabbinna tor-ator parsapolowanna oreng Isra’il bi’ Sengko’ ebagi ka reng-oreng Lewi. Jareya menangka bajaranna se alalakon e Tang Kemah.

22Reng-oreng Isra’il laenna ta’ olle nyemma’e Tang Kemah, me’ olle ta’ madhateng dusa ban okoman mate ka aba’na dibi’.

23Molae sateya pera’ oreng Lewi se olle ngoros Tang Kemah ban se nanggung orosanna lalakon jareya. Atoran reya kodu eangguy keya bi’ na’ potona ba’na salanjangnga. Oreng Lewi ta’ andhi’ sangkolan e Isra’il,

24menangka sangkolanna bi’ Sengko’ la eberri’i sakabbinna tor-ator parsapolowan se eatorragi oreng Isra’il ka Sengko’ menangka tor-ator se malolo ka Sengko’. Jareya sababba Sengko’ ngoca’ ka reng-oreng Lewi jareya ja’ aba’na ta’ eberri’ana bagiyanna sangkolan e Isra’il."

25Dhabuna PANGERAN ka Mosa,

26"Kabala ka oreng Lewi: Mon ba’na narema dhari oreng Isra’il tor-ator parsapolowan se bi’ Sengko’ ebagi ka ba’na menangka bagiyanna ba’na, ba’na kodu ngatorragi saparpolonna menangka tor-ator se malolo ka Sengko’ dhari ba’na.

27Tor-ator jareya eanggep padha bi’ tor-ator gandum se anyar ban aeng anggur se anyar dhari kaom tane.

28Kalaban cara se kantha jareya ba’na ngatorragi tor-ator se malolo ka Sengko’ aropa sabagiyan dhari tor-ator parsapolowanna oreng Isra’il. Tor-ator jareya bi’ ba’na kodu epassra’agi ka Imam Harun.

29Ngala’agi bagiyan se paleng bagus dhari se etarema ba’na.

30Samarena massra’agi bagiyan jareya, ba’na olle ngala’ karena, akantha oreng tane se ngala’ re-karena hasella saellana ngatorragi tor-atorra.

31Karena jareya bi’ ba’na olle kakan e dhimma’a bai ban sabalana, menangka opana ba’na se alalakon e Kemah Socce.

32Ba’na ta’ sala mon ngakan jareya, sokor bagiyanna se paleng becce’ la eatorragi ka Sengko’. Ba’na ja’ manajjis tor-ator se socce dhari oreng Isra’il polana ngakan sabagiyan dhari tor-ator jareya sabellunna bagiyanna se paleng bagus eatorragi malolo ka Sengko’. Mon ba’na ta’ atoro’ ka atoran reya, ba’na bakal mateya."


  Share Facebook  |  Share Twitter

 <<  Bilangan 18 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran