Dual Panel1Ketab reya aesse sabarang se edhabuwagi Mosa ka bangsa Isra’il e bakto badha e ra-ara e Cora Yordan. Cora jareya badha e temorra Songay Yordan, e seddi’anna kottha Suf, penggirra se settong ebatesse kottha Paran, penggir settonganna ebatesse tha-kottha Tofel, Laban, Hazerot ban Di-Zahab.
2(Parjalanan dhari Gunong Sinay ka Kades-Barnea reya monlebat pagunongan Edom abidda sabellas are.)
3E tanggal settong bulan sabellas e taon se ka pa’ polo saellana oreng Isra’il mangkat dhari Messer, Mosa manapa’ ka bangsa jareya sabarang se edhabuwagi Pangeran kaangguy bangsa Isra’il.
4Jareya kadaddiyan saellana Mosa makala Sihon, ratona oreng Amori se marenta e Hesybon, ban Og rato Basan se marenta e tha-kottha Asytarot ban Edrei.
5E bakto bangsa Isra’il badha e temorra Songay Yordan e baba kakobasa’anna Mo’ab jareya Mosa dha’-adha’na nerrangngagi kom-hokom ban kon-papakonna Pangeran. Dhabuna Mosa,
6"E bakto sengko’ ban ba’na badha e Gunong Sinay, GUSTE Allah, adhabu kantha reya, ‘La cokop abidda ba’na badha e gunong reya.
7Sateya mara bungkar parkemahanna, pas mangkat ka dhaera pagunonganna oreng Amori ban sakabbinna dhaera e sabingkerra, iya areya ka Cora Yordan, dhaera se amo’-gumo’ ban cora, dhaera e bagiyan lao’ ban paseser Tase’ Tengnga. Kobasae Tana Kana’an ban Pagunongan Libanon sampe’ ka Songay Efrat se raja.
8Jareya kabbi tana se ejanjiyagi Sengko’, Pangeran, ka bangatowana ba’na Ibrahim, Ishak ban Yakub ban ka sakabbinna toronanna. Daddi kassa’ kobasae tana jareya kabbi.’"
9Dhabuna Mosa ka bangsa jareya, "E bakto sengko’ ban ba’na badha e Gunong Sinay, sengko’ ngoca’ ka ba’na: Tanggung jawabba mimpin ba’na taberra’ gallu monggu ka sengko’. Lalakon jareya ta’ ekenneng kadibi’i sengko’, sabab
10ba’na bi’ GUSTE Allahna epatamba bannya’ epakantha bannya’na bintang e langnge’.
11Moga-moga bi’ PANGERAN, Allahna bangatowana ba’na, bannya’na ba’na epatamba’a sampe’ saebu kalena, ban ba’na epadaddiya bangsa se ma’mor akantha se la edhabuwagi!
12Tape baramma sengko’ se ngennenga ngadibi’i mekol tanggung jawab se berra’ maberes sakabbinna orosanna ba’na?
13Mara pele dhari saneyap suku oreng lalake’an se bicaksana, ngarteyan ban andhi’ pangalaman, bi’ sengko’ epadaddiya pamimpinna ba’na.
14Usul jareya bi’ ba’na etarema kalaban becce’.
15Daddi e antarana pin-pamimpin se la epele bi’ ba’na dhari ku-sukuna ba’na jareya, reng-oreng se bicaksana ban andhi’ pangalaman, bi’ sengko’ eangkat epadaddi kapalana ba’na. Badha reng-oreng se epangapalae saebu oreng, badha se saratos oreng, saeket oreng ban sapolo oreng. Sengko’ ngangkat keya pin-pamimpin laen se esoro ngoros ku-sukuna ba’na.
16E bakto jareya sengko’ ngoca’ ka reng-oreng jareya kantha reya: Edhingngagi mon badha cekcok e antarana bangsana ba’na. Berri’ potosan se adil, e dhalem parkarana reng-oreng se sabangsa bi’ ba’na otabana parkarana oreng manca se badha e antarana ba’na.
17Potosanna ba’na ta’ olle berra’ salaja; saneyap oreng kodu eadili epapadha, ta’ olle eda’-bida’agi. Ja’ tako’ ka sapa’a bai, sabab potosan se etantowagi bi’ ba’na jareya dhari Allah. Mon badha parkara se malarat ka ba’na, giba ka sengko’, me’ olle sengko’ ngenneng motose.
18E bakto jareya keya sengko’ aberri’ du-petodu ka ba’na parkara sabarang laenna se kodu elakone ba’na."
19"Saellana jareya menorot dhabuna PANGERAN Allahna ba’na, sengko’ ban ba’na kabbi mangkat dhari Gunong Sinay pas ajalan lebat e ra-ara beddhi se lebar ban nako’e, entara ka pagunonganna oreng Amori. E bakto jareya ba’na napa’ ka Kades-Barnea,
20sengko’ ngoca’: Sateya ba’na la napa’ ka pagunonganna oreng Amori, tana se eparengngagi ka ba’na bi’ GUSTE Allahna ba’na, Allahna bangatowana ba’na. Abassagi tana e adha’anna ba’na rowa. Entare, kobasae ban kennengnge akantha se epakonnagi PANGERAN. Ja’ pamangmang ban ja’ tako’.
21(1:20)
22Tape ba’na pas nyander ka sengko’, laju ngoca’, ‘Langkong sae ngereng ngotos reng-oreng, pakon mangkat kaadha’, nalektegi nagara ka’dhissa’, daddi reng-oreng gapaneka dhaggi’ bisa noduwagi jalan se ka’dhimma se kodu elebadi, sareng bisa notorragi kadi ponapa kabadha’annepon tha-kottha ka’dhissa’.’
23Usul jareya bi’ sengko’ etarema, daddi sengko’ laju mele oreng dhubellas, dhari saneyap suku ekala’ settong.
24Reng-oreng jareya maso’ ka dhaera pagunongan jareya sampe’ napa’ ka Cora Eskol, pas nalektegi nagara jareya epabalattra.
25Saellana jareya reng-oreng jareya padha abali ngeba wa’-buwa’an ollena ngala’ e tana jareya, eduduwagi ka sengko’ ban ka ba’na kabbi, sarta abala ja’ nagara paparengnga PANGERAN jareya talebat landhuna.
26Tape ba’na ta’ ngestowagi dhabuna PANGERAN, Allahna ba’na, ban ta’ endha’ maso’ ka nagara jareya.
27Ba’na ango’ngo’an kantha reya, ‘PANGERAN reya baji’ ka sengko’. Daddi sengko’ ebakta dhari Messer ebagiya ka bangsa Amori me’ olle padha epate’e.
28Daddi arapa’a me’ entara dha’ essa’? Reng-oreng se eotos dha’ essa’ abala ja’ bangsa jareya araja’an ban akowadan dhari tang bangsa; ca’na, tha-kotthana bangsa jareya badha pagar alassa se tenggina sampe’ gan langnge’. Para otosan jareya nangale’e buta e jadhiya. Daddi sengko’ tako’!’
29Tape sengko’ ngoca’: Ta’ osa tako’ ka reng-oreng jareya.
30GUSTE Allahna ba’na se mimpina ba’na ban se nolongana ba’na aperrang akantha se la ekataowe ba’na dibi’ e Messer
31ban e ra-ara beddhi rowa. Ba’na nangale’e baramma PANGERAN se abakta ba’na, ba’na epasalamet salanjangnga parjalanan sampe’ napa’ dha’ enna’, tadha’ bidana ban oreng towa se ngemban ana’na.
32Tape, maske sengko’ la ngoca’ kantha jareya, ba’na paggun ta’ parcaja ka PANGERAN,
33la’-mala’ maskeya Pangeran alomampa e adha’anna ba’na, noduwagi kennengngan se ekennengngana ba’na akemah. Pangeran noduwagi jalan ka ba’na e baja malem e dhalem cangga apoy, ban e baja seyang e dhalem cangga ondhem, se alomampa e adha’anna ba’na."
34"PANGERAN meyarsa ngo’ngo’na ba’na, laju duka. Salerana asompa,
35‘Tadha’ settonga dhari angkadan se jahat reya se maso’a ka nagara se landhu se ejanjiyagi Sengko’ ka bangatowana.
36Pera’ Kaleb ana’na Yefune se bakal maso’a ka jadhiya sabab Kaleb jareya esto ka Sengko’. Kaleb ban toronanna bi’ Sengko’ eberri’ana nagara se la ejanjiyagi Sengko’ jareya.’
37Polana ba’na PANGERAN laju duka ka sengko’ keya; dhabuna, ‘Mosa, ba’na keya ta’ olle maso’ ka nagara jareya.
38Tape pakoko atena Yusak ana’na Nun se abanto ba’na rowa. Yusak jareya se mimpina bangsa Isra’il se arebbu’a tana jareya.’
39PANGERAN laju adhabu ka ba’na kabbi, ‘Na’-ana’na ba’na se gi’ kene’ se gi’ ta’ tao abida’agi becce’ ban juba’, na’-ana’na ba’na se ca’na ba’na bakal erampasa so-mosona ba’na, na’-kana’ jareya se bi’ Sengko’ epanarema’a tana jareya, tana se bakal ekobasa’ana ban ekennengngana.
40Tape ba’na, kassa’ abali ka ra-ara beddhi lebat lorong se ka Tellok Akaba.’
41Ba’na nyaot, ‘Mosa, abdina dusa ka PANGERAN. Namong samangken abdina poron noro’a aperrang akadi se epakonnagi GUSTE Allah abdina.’ Ba’na kabbi laju padha mekol sanjata se entara aperrang, sabab ba’na apekker ja’ nyerrang dhaera pagunongan reya parkara gampang.
42Tape PANGERAN adhabu ka sengko’, ‘Ja’ bagi aperrang reng-oreng jareya, sabab Sengko’ ta’ abarengngana, dhaggi’ tanto epakala bi’ mosona.’
43Sengko’ ngabala ka ba’na apa se edhabuwagi PANGERAN jareya, tape ba’na ta’ marduli. Ba’na ta’ ngedhingngagi dhabuna PANGERAN, maksa mangkat ka dhaera pagunongan jareya.
44Reng-oreng Amori se ngennengnge pagunongan jareya kalowar ngadhebbi ba’na. Orengnga ce’ bannya’na, sampe’ padha ban nyarowan. Ba’na eserser sampe’ ka Horma, sarta epakala e dhaera pagunongan Edom.
45Daddi ba’na pas aserro pole ka PANGERAN nyo’on partolongan, tape PANGERAN ta’ kasokan meyarsa’agi ba’na, ba’na ta’ eparduli."
46"Saellana jareya sengko’ ban ba’na kabbi pas neng e Kades sampe’ ce’ abidda.