Alkitab Mobile SABDA
[VER] : [MAKASAR]     [PL]  [PB] 
 <<  1 Tawarikh 22 >> 

1Jari nakanamo Daud, "Anrinnimi ri tampaka musti nibangung Balla’ untu’ Karaeng Allata’ala. Siagang ri iaminne tampa’ pakkoro’bangnganga tu Israel musti assare koro’bang nitunu untu’ Batara."

2Nasuromi Daud ampa’rappungangi sikontu tubattu-battua ammantang ri Israel, nampa napajama ke’nanga. Sipa’gang ke’nanga ammaha’ batu untu’ ambangungi Balla’Na Batara.

3Untu’ nipare’ paku siagang engsele’ untu’ sikamma pakke’bu’ lompona anjo Balla’Na Batara appasse’remi Daud jai sikali bassi. Appasse’remi jai sikali parunggu, sa’genna takkulleami nitimbang.

4Appasammi sanna’ jaina kayu camara battu ri Libanon ri tu Tirus siagang tu Sidon.

5Nagaukang ngasemmi Daud sikammaya anjo lanri napikkiriki angkana, "Musti kupasadiai apa niparalluanga untu’ bangunanna Balla’Na Batara. Nasaba’ Salomo anakku rungka iji siagang kurang iji pangalamanna. Nampa anjo Balla’Na Batara eroka nabangung musti sannaki ga’gana siagang masahoroki mae ri sikontu linoa." Jari lalang tenanapa namate Daud, appasadiami jai sikali bahang bangunang.

6Nakio’mi Daud ana’ bura’nena iamintu Salomo, nampa naparentakang untu’ ambangungi anjo Balla’Na Karaeng Allata’ala nasombaya umma’ Israel.

7Nakanamo Daud ri Salomo, "Anakku, salloma’ ero’ ambangung se’re balla’ untu’ ampakala’biriki Karaeng Allata’alaku.

8Mingka Nakana Batara angkanaya masarro sikalia’ a’bundu’ siagang jai sikalimi tau le’ba’ kubuno. Jari lanri kammana minjo natena Napa’bianga’ inakke untu’ ampabangungangi balla’.

9Mingka manna nakamma, le’ba’ma’ Najanji angkana: ‘Langgappako sitau ana’ bura’ne laamanga ammarenta, nasaba’ laKubantui sa’genna tena musu lambunduki. Laniarengi Salomo nasaba’ lalang ammarentana, laKusarei kasannangang siagang kaamangngang ri sikontu Israel.

10Iaminjo ana’ bura’nenu lambangung balla’ untu’ iNakke. Ia la’jari anakKu siagang iNakke la’jari manggena. Empoang kakaraenganna Israel latuli niaki ri turunganna sa’genna satunggu-tungguna.’"

11Nampa nakanamo pole Daud, "Kamma-kamma anne, anakku, poro tuli natulungko Karaeng Allata’alanu. Siagang poro a’wasselekko ambangung balla’ untu’ Batara sangkamma anjo apa le’baka Napa’janjiang.

12Na poro Nasareko Karaeng Allata’alanu kacara’dekang siagang pangngassengang untu’ ammarenta ri Israel situru’ hukkung-hukkunNa.

13Punna nuturuki sikontu hukkung Napassareanga Batara ri Musa untu’ bansa Israel, la’wasselekko. Paralluko matappa’ siagang barani. Teako mallakki andallekangi manna pole apa mamo.

14Na passala’na anjo Balla’Na Batara, le’ba’ma’ usaha tojeng-tojeng appasse’re 3.400 tong battala’na bulaeng siagang la’bi 34.000 tong battala’na pera’. Napantaranganna anjo nia’ todong parunggu siagang bassi, ia takkullea nibilang lanri jaina. Kayu siagang batu kupasadiami, mingka musti nutambai pole.

15Jai tau anjamanu. Nia’ akkulle anjama batu, nia’ tukang kayu, tukang batu, siagang jai sikali tau cara’de’ anjama

16bulaeng, pera’, parunggu, siagang bassi. Jari appakkaramula mako linta’! Poro Natulungko Batara."

17Nampa nasuromo Daud sikontu pamimping niaka ri Israel ambantui Salomo.

18Nakana, "Le’ba’ mako Natulung Karaeng Allata’alanu, siagang Nasareko kasiamakkang kammayatompa kasannangngang ri sikontu pa’rasangang. Nasarema’ pakkulle untu’ ambetai sikontu bansa niaka riolo ammantang ri anne pa’rasanganga. Kamma-kamma anne tundu’mi ke’nanga ri kau siagang mae ri Batara.

19Jari paralluko anynyomba mae ri Karaeng Allata’alanu lalang sikontu nyawanu siagang batangkalennu. Appakkaramula mako ambangung balla’ untu’ Batara, sollanna akkulle niboli’ anjoreng Patti ParjanjianNa siagang sikontu pakkakasa’ maraenganga ia eroka nipake anynyomba ri Ia."


  Share Facebook  |  Share Twitter

 <<  1 Tawarikh 22 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran