Dual Panel1Nakanamo Bildad, "Siapapi sallonu la’bicara kamma antu? Kana-kanannu sanrapangi anging ammarrung.
2(8:1)
3Tale’bakai Napa’jekko Allata’ala kaadelanga; tale’bakai salasa ampaentengi katojenganga.
4Gassingka ana’-ana’nu doraka mae ri Ia, jari siratangi nihukkung ke’nanga ri Ia.
5Mingka punna a’la’langko mae ri Ia, appala’ pangngamaseang siagang appala’ popporo’,
6punna lambusu’ pa’mai’nu, tena callannu, laNatulungko linta’ Allata’ala; na a’jari pa’balasa’na, laNapakabajiki ammotere’ ruma tangganu.
7Kakalumanynyangngannu tappelaka tena anggaranna punna nipasinjai siagang apa nugappaya sallang.
8Parallui nuparhatikang tau cara’deka ri jammang riolo, na nunawa-nawa pangalamanna boe-boenu.
9Tallasatta bodoji, tena apa-apa niasseng; allota sanrapanji bayang-bayang.
10Pilangngeri kana-kananna tau cara’deka riolo, nasareko anne pappilajaranga, angkanaya,
11‘Ri tampa’ niaka bawang je’ne’na attimbo nipaya; ri butta appeokaji nia’ pandang.
12Punna kalotoro’ je’ne’na, ta’ronangi anjo nipaya, lintakkangngangi timbona timbo-timboang maraenganga. Na sitojenna coppongiji siagang teaipi wattunna nialle siagang nipake.
13Kammaminjo tau tenaya Batarana. Nakaluppai Allata’ala, siagang tenamo panrannuanna.
14Bannang alusu’ a’jari panrannuanna; ru’mung lawa’-lawa’ napatappa’.
15Maka gassingkai anjo ru’mung kammaya punna nipareki pammanjengang? Maka attahangi anjo bannang kammaya punna nipareki panna’gallang?’
16Sanrapang rea, bajiki nasa’ring tallasa’na tau tenaya Batarana; punna nisingari ri allo, coppongi timbona na napirassi kokoa.
17Aka’na nakaluki batu-batu ri buttaya; akkalu’ jarreki, tagampangai ta’lagasa’.
18Mingka, cobasai bi’bu’ kamma-kamma anne anjo reaya, kamma le’ba’ tenale’bakai nia’ anjoreng.
19Iyo, kasannanganna tau ja’dalaka iaji anjo bawang; battui tau maraenga nampa nisambeang.
20Mingka Allata’ala tale’bakai Nabokoi tau jarreka tappa’na, tale’baka tongi Natulung tau dorakaya.
21Bawanu laNapakakkalaki, muncennu lama’reja-rejai.
22Lasiri’-siriki siagang latunai nasa’ring tau birisika ri kau, na balla’ tau ja’dalaka lanipanraki sa’genna ancuru’."