Alkitab Mobile SABDA
[VER] : [MAKASAR]     [PL]  [PB] 
 <<  Bilangan 18 >> 

1Nakana Batara mae ri Harun, "Ikau, ana’-ana’nu siagang tu Lewia, musti natanggongi kale’bakkanna kakodianna sikamma kasalang kajarianga lalang ri KemaKu; mingka ikauji bawang siagang sikamma ana’nu antanggongi kasalang kajarianga lalang ri jama-jamanna imanga.

2Bija pammanakannu, suku Lewi, musti nupapinawangi a’jari lalang nugaukanna tugasa’nu siagang tugasa’na sikamma ana’nu.

3Suku Lewia musti nagaukangi kawajibanna ke’nanga mae ri kau ngaseng siagang najamai tugasa’na ke’nanga ri KemaKu; mingka takkulleai ke’nanga anreppesi tampa’ pakkoro’bangnganga yareka anseroi barang-barang matangkasaka ri Kamara’ Matangkasaka. Punna nadakkai ke’nanga anjo paratoranga, baji’ ke’nanga kammayatompa ikau, lamatei.

4Musti anjamai ke’nanga siagang ikau, kammayatompa nagaukangi tugasa’ niaka passisambunganna siagang sikamma palayananga lalang ri KemaKu; mingka tenaya nanisarei ha’ untu’ anjo jama-jamanga, tena nipa’biangi anjama siagang ikau.

5Ikauji bawang, Harun, siagang sikamma ana’-ana’nu musti anggaukangi tugasa’ lalanga ri Kamara’ Matangkasaka siagang tampa’ pakkoro’bangnganga, sollanna tenamo naKularro poleang mae ri bansa Israel.

6Sikontutojenna, le’ba’mi Kupilei sikamma bija pammanakannu tu Lewi battu ri alla’na bansa Israel salaku passare mae ri Nakke. Le’ba’mi Kusa’la’ ke’nanga untu’ KalengKu, untu’ allayaniA’ ri KemaKu.

7Mingka ikauji bawang siagang sikamma ana’nu akkulle anggaukangi tugasa’ imanga, lalang sikontu jama-jamang niaka passisambunganna siagang tampa’ pakkoro’bangnganga kammayatompa apa-apa niaka lalang ri Kamara’ Kaminang Matangkasaka. Iaminjo tanggong jawa’nu, lanri le’ba’ mako Kusare empoang salaku imang. Sikamma tau tenaya ha’na lanihukkungi punna nareppesi anjo barang-barang matangkasaka."

8Nakana Batara mae ri Harun, "U’rangi! Sikontu passare nisa’la’ nipassareanga mae ri Nakke, ia tenaya nitunui, iaminjo bageannu. Iaminjo bageannu le’baka nipattantu sa’genna satunggu-tungguna. Anjo Kupassareangi mae ri kau siagang mae ri jari-jarinu.

9Battu ri passare kaminang matangkasa’ tenaya nitunui irate ri tampa’ pakkoro’bangnganga, anne kammaya anne untu’ ikau: Koro’bang nipatala, koro’bang pammopporang dosa, siagang koro’bang passambe karugiang. Yangasenna anjo sikammaya passare matangkasa’ a’jaria bageannu siagang bageanna sikamma ana’nu.

10Anjo kammaya matangkasaki mae ri kau, jari musti anjoreng tongi ri tampa’ matangkasaka musti nukanre. Tu bura’neaji bawang akkulle angkanrei.

11Sikontu passare nisa’la’ maraenganga napassareanga tu Israel mae ri Nakke, bageannu todong. Kupassareangi mae ri kau siagang mae ri sikamma ana’-ana’nu bura’ne baine. Anne paratoranga tappakei sa’genna satunggu-tungguna. Tunggala’ anggota kaluarganu tenaya nara’masa’ akkullei nakanre.

12Kupassareangi mae ri kau sikamma kaminang bajika battu ri kattoang uru-urua, napassareanga tu Israel mae ri Nakke tunggala’ taung, iamintu minynya’ zaitun, je’ne’ anggoro’ siagang gandung.

13Yangasenna anjo kammaya untu’ ikau. Tunggala’ anggota kaluarganu tenaya nara’masa’ akkullei nakanre.

14Sikontu apa-apa niaka ri butta Israel, ia le’baka nisa’la’ untu’ iNakke, iaminjo untu’ ikau.

15Sikontu bungasa’ lassuka battu ri rupataua kammayatompa olo’-olo’ napassareanga tu Israel mae ri Nakke, iami bageannu. Mingka musti nupasuluki sikamma ana’ bungasa’nu, kammayatompa olo’-olo’ harang bungasa’ lassuka.

16Sikamma ana’-anaka musti nipasuluki ri wattunna umuru’ sibulang ke’nanga. Anggaranna nipattantua iamintu lima doe’ pera’, situru’ anggarang niaka nipake ri KemaKu.

17Mingka sapi, gimbala’ siagang bembe bungasa’ lassuka, tena nakkulle nipasulu’. Anjo olo’-oloka musti untu’ iNakke siagang musti nikoro’bangkangi. Patiriki cera’na mae ri tampa’ pakkoro’bangnganga siagang tunui jannana a’jari koro’bang. Rasanna napakasannangi nyawaKu.

18Dagenna a’jari bageannu, sangkammaya tompa barambanna siagang bongga kananna anjo passare nipappicinikanga mae ri Nakke.

19Sa’genna satunggu-tungguna, sikontu passare nisa’la’ naeranga tu Israel mae ri Nakke, Kupassareangi mae ri kau siagang mae ri sikamma ana’nu bura’ne baine. Anne paratoranga nipakei sa’genna satunggu-tungguna siagang a’jari passikko’ parjanjiang tenaya nakkulle nipinra, battu ri Nakke siagang ikau na jari-jarinu."

20Nakanamo pole Batara mae ri Harun, "Ikau tena nunggappa pambageang warisi’ apa-apa. Ri pa’rasangang Kupa’janjianga mae ri kau tena manna sicappi’ butta la’jari nupatang. INakke, Batara, a’jari bageang warisi’nu."

21Nakana Batara mae ri Harun, "Sikontu passare bagesampulona tu Israel Kupassareangi mae ri tu Lewi. Iaminjo bageang warisi’na ke’nanga untu’ jama-jamanna ke’nanga ri KemaKu.

22Tu Israel maraengannaya takkulleai a’reppese’ mae ri KemaKu, sollanna tena nanitujui ke’nanga hukkungang mate.

23Appakkaramula kamma-kamma anne tu Lewiji bawang akkulle angngurusuki KemaKu siagang ampisangi tanggong jawaka mae ri anjo jama-jamanga. Anjo paratoranga nipake tongi mae ri jari-jarinu sa’genna satunggu-tungguna. Tu Lewi tena pambageang warisi’na ri Israel,

24lanri untu’ pambageang warisi’na ke’nanga le’ba’mi Kupassareang sikontu bage sampulona apa napassareanga tu Israel mae ri Nakke salaku passare nisa’la’. Iaminjo saba’na naKukana ri passala’na tu Lewi angkanaya tena nanggappa pambageang warisi’ ke’nanga ri Israel."

25Nasuromi Batara anjo Musa

26ampabattui anne parentaya mae ri tu Lewi: Punna annarimako passare battu ri tu Israel iamintu passare bage sampulona panggappanna ke’nanga, ia Napassareanga Batara untu’ a’jari bageannu, musti nupassareangi bage sampulona mae ri Batara untu’ passarenu nisa’laka.

27Anjo passare nisa’laka musti nibilang sangkammai siagang passare gandung berua siagang anggoro’ berua.

28Lanri kammana anjo musti assare tongko passare nisa’la’ mae ri Batara, iamintu bageang battua ri passare bage sampulona panggappana tu Israel. Anjo passare nisa’laka musti nupassareangi mae ri Imang Harun.

29Passareangi bageang kaminang bajika battu ri apa nutarimaya.

30Punna le’ba’mo nupassareang anjo bageang kaminang bajika, akkullemi nualle sesanna, sangkamma sitau pamarri angngalleai apa tassesaya ri wattu le’ba’namo naerang passarena.

31Anjo tassesaya akkullei nukanre ri kere-keremae siagang kaluarganu, salaku sawala’nu ri jama-jamanga lalang ri KemaNa Batara.

32Tena nusala punna nukanrei, assala’ le’ba’mi nupassareang bageang kaminang bajika mae ri Batara. Teako ra’massi passare matangkasa’na tu Israel, lanri nukanrena anjo passarea natenapa nusa’laki bageang kaminang bajika untu’ Batara. Punna nudakkai anjo parentaya, tena tamatenu.


  Share Facebook  |  Share Twitter

 <<  Bilangan 18 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran