Dual Panel1Anjo wattua sadiai suku Efraim ero’ a’lampa mange a’bundu’. A’lampami ke’nanga, na’ limbang ri Binanga Yordan, mange ri Zafon. Nakanamo ke’nanga ri Yefta, "Angngapa nu’lampa ambunduki bansa Amon na tena nukio’ tongki’? Kamma-kamma anne lakitunuko siagang sikontu bone balla’nu."
2Nakanamo Yefta, "Nia’ passisalang lompona ikambe tu Gilead siagang tu Amon. Le’ba’ mako kukio’ untu’ ambantua’ untu’ allappassanga’ battu ri anjo tu Amon, mingka tena ngaseng nubattu.
3Jari, kuassennamo angkanaya ma’nassa tena nulabattu untu’ ambantua’, a’lampama’ ampa’baraniangi kalengku mange ambunduki anjo tu Amon, manna pole kumusti mate. Nampa Nasarea’ Batara pammetang mae ri ke’nanga. Angngapa nanubattu kamma-kamma anne ero’ ambundukia’?"
4Nampa napa’rappungang ngaseng Yefta tau niaka ri Gilead. Nanabundukimo sa’genna nabeta tu Efraim. (Tu Gilead niaka ammantang ri Efraim siagang Manasye nitudumi ri tu Efraim angkanaya nasa’la’mi kalenna ke’nanga battu ri sukuna iamintu Efraim.)
5Anjo tu Gilead lalang a’bunduka, naempoimi tampa’-tampa’ pa’limbanganga ri Binanga Yordan, sollanna akkulle naruppai tu Efraim eroka lari. Ri wattunna nia’ se’re tu Efraim ero’ lari, appala’ paramisimi untu’ a’limbang. Akkuta’nammi tu Gileadka ri ia angkana, "Apaka tu Efraimko?" Punna appiali angkana "Teai,"
6nasuromi antappui "Syibolet". Lanatappui "Sibolet," lanri tanaassengai natappu baji’ anjo kana kammaya. Nampa lanajakkala’ siagang nabuno ri se’reang tampa’ ri anjo pa’limbanganga. Jari nia’mo 42.000 tu Efraim anjo wattua nibuno.
7Annang taungi sallona Yefta ampimpingi tu Israel. Nampa matemo, na nitarawang ri kamponna, iamintu ri kota Mizpa ri Gilead.
8Le’ba’na Yefta, nipimpimmi umma’ Israel ri Ebzan, battua ri Betlehem.
9Anjo Ebzan nia’ tallumpulo ana’ bura’nena siagang tallumpulo ana’ bainena. Anjo ana’-ana’ bainena napa’buntingi siagang tau battua ri suku-suku maraenga. Kammayatompa angngallei tallumpulo tulolo battua ri suku-suku maraeng untu’ napasialle siagang ana’-ana’ bura’nena. Tuju taungi sallona Ebzan ampimpingi umma’ Israel.
10Nampa matemo, na nitarawang ri Betlehem.
11Le’ba’na Ebzan, nipimpimmi umma’ Israel ri Elon, battu ri suku Zebulon. Sampulo taungi sallona Elon ammimping.
12Nampa matemo, na nitarawang ri Ayalon ri daera Zebulon.
13Le’ba’na Elon, nipimpimmi umma’ Israel ri Abdon ana’na Hilel battu ri Piraton.
14Nia’ patampulo ana’ tu bura’nena, na nia’ tallumpulo cucu-cucu bura’nena. Massing nia’ tasse’renna ke’nanga sikayu keledaina. Sagantuju taungi sallona nipimping umma’ Israel ri Abdon.
15Nampa matemo Abdon, na nitarawang ri Piraton ri daera Efraim, ri daera monconna tu Amalek.